«قازمۇنايگاز» ۇك اق «وزەنمۇنايگاز» اق جۇمىسشىلارى كاسىپوداعىنىڭ تالاپتارىنا قاتىستى مالىمدەمە جاسادى، دەپ حابارلايدى “ادىرنا” ۇلتتىق پورتالى.
ايتا كەتسەك، «وزەنمۇنايگازعا» قاراستى «بۇرعىلاۋ جۇمىستارى باسقارماسى» كومپانياسىنىڭ جۇمىسشىلارى ەرەۋىلگە شىعىپ، باسشىلىققا بەس ءتۇرلى تالاپ قويعان:
- ومگ زەينەتكەرلەرى مەن دەنساۋلىعىنان ايىرىلعان مۇنايشىلاردىڭ بالالارىن تىكەلەي شتاتقا الۋ;
- جاڭاوزەن قالاسىندا جۇمىسسىزدىق ماسەلەسىن شەشۋ;
- ۇجىمدىق شارتتا 2013 دەيىن بولعان دەربەس ەڭبەكاقى تولەۋ جۇيەسىن قايتارۋ;
- ماشينيستەر مەن وپەراتورلاردىڭ دارەجەسىن كوتەرۋ;
- 30% قوسىمشا جالاقى ءتارتىبىن تولەۋدى ۇجىمدىق شارتقا ەنگىزۋ.
«ومگ زەينەتكەرلەرىنىڭ (بۇرىنعى قىزمەتكەرلەرىنىڭ) بالالارى كومپانيانىڭ شتاتىنا تىكەلەي الىنسا، 2020 جىلى بەكىتىلگەن جۇمىسقا ورنالاسۋ الگوريتمىن بۇزادى. الگوريتمگە سايكەس ومگ زەينەتكەرلەرىنىڭ بالالارى مەن جۇمىسسىز ازاماتتار 50/50 پروپورتسياسى بويىنشا تەڭ دارەجەدە جۇمىسقا قابىلدانادى. بۇل تالاپتى ورىنداۋ مۇمكىن ەمەس، ويتكەنى جۇمىسقا ورنالاسۋ كەزەگىن كۇتىپ وتىرعان جاڭاوزەن قالاسىنىڭ باسقا جۇمىسسىز تۇرعىندارىنىڭ قۇقىعىن بۇزادى.
ومگ-دە جۇمىسشىلارعا مەرزىمىنەن بۇرىن زەينەتكە شىعۋعا مۇمكىندىك بەرەتىن ارنايى باعدارلاما بار. زەينەت جاسىنا تاقاعان قىزمەتكەرلەرگە ارنالعان باعدارلامانىڭ تالاپتارى ايلىق ەسەپتىك كورسەتكىشكە (اەك), مۇنايشىنىڭ ءوتىلى مەن جاسىنا بايلانىستى، سونىمەن قاتار وتباسى مۇشەسىن جۇمىسقا ورنالاستىرۋ مۇمكىندىگى دە قاراستىرىلعان.
تولەم مولشەرى جۇمىسشىنىڭ وتىلىنە جانە زەينەتكە شىعۋعا دەيىن قالعان ايلار سانىنا بايلانىستى اەك نەگىزىندە ەسەپتەلەدى. بۇل رەتتە، تولەماقىنىڭ ەڭ جوعارى مولشەرى 125 اەك — 40 جىلدان استام ەڭبەك ءوتىلى بار قىزمەتكەرلەر ءۇشىن بەلگىلەنگەن. مىسالى، ومگ-دە 40 جىلدان استام جۇمىس ىستەگەن قىزمەتكەر بۇگىندە 60 جاسقا كەلىپ ەرتە زەينەتكە شىقسا، 16,6 ملن تەڭگە الادى»، دەلىنگەن حابارلامادا.
بۇل رەتتە جۇمىسشىلار كاسىپوداعى قويىپ وتىرعان تالاپ — اەك مولشەرىن 125-تەن 300 اەك-كە دەيىن ۇلعايتۋ، بۇل تولەم مولشەرىن ەكى ەسەدەن استامعا ارتتىرادى. الايدا كومپانيادا قازىردىڭ وزىندە جاقسى جاعداي جاسالعان، ءبىر قىزمەتكەرگە كورسەتىلەتىن الەۋمەتتىك قولداۋ مولشەرى — ەڭ جوعارى كورسەتكىشتەردىڭ ءبىرى ەكەنىن اتاپ ءوتتى.
«ومگ جىل سايىن ارنايى تەحنيكانى جاڭارتىپ وتىرادى. قازىرگى ۋاقىتتا بۇرعىلاۋ جۇمىستارى باسقارماسىنىڭ تەحنيكاسىن قوسا العاندا، اۆتوپاركتىڭ 65% جاڭارتىلدى. 2022-2024 جىلدار ارالىعىندا بۇعان 22 ملرد تەڭگەدەن اسا قارجى جۇمسالدى، ال 2029 جىلعا دەيىن تاعى 53 ملرد تەڭگەدەن استام بولىنەتىن بولادى. تەحنيكانى جاڭارتۋدىڭ ناتيجەسىندە جوندەۋ جۇمىستارى ازايدى، سوندىقتان جۇمىسشىلار تالاپ ەتكەندەي جاڭا جوندەۋ بازاسىن سالۋ تيىمسىز بولىپ وتىر. ارنايى تەحنيكانى جاڭارتۋ جۇمىستارى قمگ توبىنىڭ بارلىق كومپانياسىندا جۇرگىزىلىپ جاتىر.
كاسىپوداق 2013 جىلى قولدانىستا بولعان ومگ ۇجىمدىق شارتىنىڭ 5.19 تارماعىن قايتارۋدى ۇسىنادى. بۇل تارماق بويىنشا جەكە تابىس سالىعى مەن مىندەتتى زەينەتاقى جارنالارى جۇمىس بەرۋشىنىڭ ەسەبىنەن تولەنىپ كەلگەن. ال 2017 جىلدان بەرى قىزمەتكەرلەرگە جالاقى سالىق ۇستالعاننان كەيىن بەرىلەدى، بۇل قر زاڭناماسىنا تولىعىمەن سايكەس كەلەدى»، دەلىنگەن حابارلامدا.
ايتا كەتەيىك، 2024 جىلدىڭ شىلدەسىندە وزەنمۇنايگاز كومپانياسىندا ەڭبەكاقى تولەۋدىڭ جاڭا جۇيەسىنە ءوتۋ جۇمىستارى باستالعان. كاسىپوداقتار مەن قر ەڭبەك مينيسترلىگىنىڭ قاتىسۋىمەن كۇردەلى جۇمىستى ءادىل باعالاۋعا نەگىزدەلگەن ەرەجەلەر ازىرلەنگەن. قازىرگى ۋاقىتتا ومگ ىشىندە ءوزارا كەلىسىمدەر ءجۇرىپ جاتىر.
«جۇمىسشىنىڭ دارەجەسى قر ەڭبەك مينيسترلىگىنىڭ 2018 جىلعى بۇيرىعىمەن بەكىتىلگەن بىرىڭعاي تاريفتىك-بىلىكتىلىك انىقتامالىعى بويىنشا بەلگىلەنەدى. قازىر كۇردەلى جۇمىستارعا تارتىلعان ۇڭعىمالاردى جەراستى جوندەۋ ماشينيستەرى مەن وپەراتورىنا تولەم 6-شى دارەجە بويىنشا جۇرگىزىلەدى. بۇل وسىنداي جۇمىستار ءۇشىن ءادىل اقى تولەۋدى قامتاماسىز ەتەدى.
قر زاڭناماسىنا جانە ومگ-نiڭ 2023 جىلعى ەڭبەكاقى تولەۋ ەرەجەلەرىنە سايكەس 30%-عا دەيىنگى ۇستەماقى لاۋازىمداردى قوسا اتقارعانى، قىزمەت كورسەتۋ تۇرلەرىن كەڭەيتكەنى نەمەسە قوسىمشا فۋنكتسيالاردى ورىنداعانى ءۇشىن تولەنەدى. سونداي-اق ومگ جۇمىسشىلارىنىڭ جالاقىسىنا جىل سايىن يندەكساتسيا جۇرگىزىلەدى. بۇل وڭىردەگى باسقا مۇناي ءوندىرۋشى كاسىپورىندارداعى ورتاشا جالاقىدان اسادى»، دەپ ناقتىلادى «قازمۇنايگاز» ۇك اق.
