ماڭعىستاۋ وبلىسىندا كاسپي تەڭىزى جاعالاۋىندا مىڭداعان يتبالىق قىرىلىپ قالدى، دەپ حابارلايدى "ادىرنا" ۇلتتىق پورتالى كتك-عا سىلتەپ.
العاشىندا ءولى يتبالىقتار تۇپقاراعان اۋدانىندا انىقتالعان. قازىر ولاردىڭ ولەكسەلەرى قاراقيا اۋدانىنان دا تابىلۋدا، اقتاۋدا دا يتبالىقتىڭ ولەكسەلەرى انىقتالىپ جاتىر.
قازىرگى تاڭدا 1034 يتبالىقتىڭ ءولىمى قۇجات جۇزىندە راستالعان. بۇل جاعدايدىڭ ناقتى سەبەبى ءالى انىقتالماعان.
«گيدروبيولوگيا جانە ەكولوگيا ينستيتۋتىنىڭ» ديرەكتورى ميرعالي بايمۇقانوۆتىڭ تاسس اگەنتتىگىنە حابارلاۋىنشا، مۇنداي كولەمدەگى ءولىم ءبىرىنشى رەت تىركەلگەن.
«مۇمكىن، ءولى جانۋارلاردىڭ شىعارىلۋى توقتامايدى، ويتكەنى بۇل ءبىزدىڭ جاعالاۋعا سوققان باتىس جەلدەرىمەن بايلانىستى، جانە تاعى دا ولەكسەلەردىڭ تابىلۋىن كۇتۋىمىز كەرەك»، — دەدى ول. بايمۇقانوۆ قىرىلۋدىڭ سەبەبىن اتاۋعا قينالعانىن ايتىپ، بۇل ءۇشىن كوپتەگەن سالانىڭ قاتىسۋى قاجەت ەكەنىن ايتتى. «مۇمكىن، بۇل كەيبىر لاستاۋشى زاتتاردىڭ توگىلۋى، سەيسميكالىق بەلسەندىلىك سياقتى تابيعي كاتاكليزمدەر بولۋى مۇمكىن، ياعني گەولوگتار دا پىكىرىن ايتۋى ءتيىس. جانۋارلار اراسىندا ۆيرۋس بولۋى مۇمكىن بە ەكەنىن انىقتاۋ ءۇشىن ۆيرۋسولوگتار دا ءوز ءسوزىن ايتۋى كەرەك»، — دەدى بايمۇقانوۆ.
ونىڭ ايتۋىنشا، ءاربىر يتبالىقتىڭ قىرىلۋى پوپۋلياتسياعا ۇلكەن زيان كەلتىرەدى.
«ءبىزدىڭ مالىمەتتەرىمىز بويىنشا، 30-50 جاسقا دەيىن جەتەتىن يتبالىقتار وتە از. ءولىپ جاتقان يتبالىقتار كوبىنە ورتا جاستاعىلار، ولار پوپۋلياتسيانىڭ كوبەيۋىنە ۇلەس قوسار ەدى. ەگەر يتبالىقتار وسىنداي جاستا قىرىلىپ قالسا، بۇل ورنى تولماس شىعىن»، — دەپ تۇيىندەدى بايمۇقانوۆ.
كاسپي يتبالىعى قازاقستاننىڭ قىزىل كىتابىنا ەنگىزىلگەن. عالىمداردىڭ باعالاۋى بويىنشا، قازىرگى ۋاقىتتا قازاقستاننىڭ كاسپي تەڭىزىندەگى اۋماعىندا 240 مىڭنان استام يتبالىق تىرشىلىك ەتەدى.
