كاسپي تەڭىزىنىڭ اقتاۋداعى 1-شاعىناۋدان تۇسىنداعى جاعالاۋى قىزىل تۇسكە بويالىپ، جەرگىلىكتى تۇرعىنداردىڭ الاڭداۋشىلىعىن تۋعىزدى. الايدا ەكولوگتار بۇل تابيعي قۇبىلىس ەكەنىن ايتىپ، ەشقانداي ەكولوگيالىق قاۋىپ جوق ەكەنىن مالىمدەدى، دەپ حابارلايدى “ادىرنا” ۇلتتىق پورتالى Massaget.kz-كە سىلتەپ.
الەۋمەتتىك جەلىلەردە قىزىل تۇسكە بويالعان جاعالاۋدىڭ سۋرەتتەرى تارالىپ، كەيبىر تۇرعىندار حيميالىق توگىندىلەردەن كۇدىكتەنگەن. الايدا «ەكو ماڭعىستاۋ» ۇەۇ باسشىسى كيريلل وسين بۇل قىستا ءجيى كەزدەسەتىن تابيعي قۇبىلىس ەكەنىن ءتۇسىندىردى.
“اسىرەسە قار جاۋعان كەزدە قوڭىر بالدىرلار قىزىل رەڭككە يە بولىپ، ەرەكشە كورىنىس بەرەدى. بۇل ەكولوگيا مەن ادامدارعا ەشقانداي قاۋىپ توندىرمەيدى،” – دەدى ول.
ماڭعىستاۋ وبلىسىنىڭ ەكولوگيا دەپارتامەنتى دە جاعدايعا قاتىستى رەسمي تۇسىنىكتەمە بەرىپ، تەڭىزدەن الىنعان سىنامالاردا حيميالىق زاتتار انىقتالماعانىن مالىمدەدى.
“دوستار” جاعاجايى، “نۇر-پلازا” جانە ياحتا كلۋبى اۋماعىنان سىنامالار الىندى. تالداۋ ناتيجەلەرى تەڭىزدەگى وزگەرىستەردىڭ بالدىرلاردىڭ تابيعي گۇلدەنۋىنەن بولعانىن كورسەتتى. بۇل قۇبىلىس ەشقانداي زيان كەلتىرمەيدى، سوندىقتان الاڭداۋعا نەگىز جوق،” – دەدى ەكولوگيالىق زەرتتەۋ زەرتحاناسىنىڭ گيدروبيولوگيا ءبولىمىنىڭ مامانى نۇربولات وتەمىسوۆ.
مامانداردىڭ ايتۋىنشا، قىس مەزگىلىندە تەڭىز بالدىرلارى بەلسەندى تۇردە كوبەيىپ، سۋ بەتىندە قىزىل ءتۇستى داقتار پايدا بولۋى مۇمكىن. ەكولوگتار تۇرعىنداردى سابىرعا شاقىرىپ، بۇل قۇبىلىستى قالىپتى جاعداي دەپ قابىلداۋعا كەڭەس بەردى.
