نوۆوروسسيسك تەڭىز پورتى ارقىلى قازاقستاندىق مۇنايدى جونەلتۋ قايتادان توقتاتىلدى، دەپ حابارلايدى «ادىرنا» ۇلتتىق پورتالى.
«كقك تەڭىز تەرمينالىندا مۇناي تيەۋ توقتاتىلدى، تانكەرلەر كۇتۋ ايماقتارىنا ءبولىندى. كومپانيانىڭ سۋ قويمالارى تولى. وسىعان بايلانىستى جۇك جونەلتۋشىلەردەن مۇناي قابىلداۋ تومەندەتىلگەن رەجيمدەردە جۇزەگە اسىرىلادى»,-دەپ حابارلايدى كاسپي قۇبىر كونسورتسيۋمىنىڭ (كقك) ءباسپاسوز قىزمەتى.
بۇل جاعداي اۋا رايىنىڭ اسا قولايسىزدىعىنا بايلانىستى بولىپ جاتىر. ناقتىراق ايتساق، جەل 22-24 م/س (79,2-86,4 كم/ساع), تولقىن بيىكتىگى 6-8 مەتر. جاعدايعا بايلانىستى تەڭىز پورتىنىڭ كاپيتانى داۋىلدى ەسكەرتۋ جاريالادى.
قاراشا ايىندا نوۆوروسسيسك تەڭىز پورتىندا قايتا تيەۋگە داۋىلدى شەكتەۋلەر بىرنەشە رەت جاريالاندى.
ايتا كەتەيىك، قازاقستان ءوز مۇنايىنىڭ 80 پايىزىن نوۆوروسسيسكىدەگى كاسپي قۇبىر كونسورتسيۋمى ارقىلى ەكسپورتتايدى.
«ادىرنا» ۇلتتىق پورتالى
