22 قازان كۇنى الماتى قالاسىندا «اتامۇرا» كورپوراتسياسىنىڭ دەمەۋشىلىگىمەن «ءدىلمار» شەشەندىك ونەر بايقاۋى ءوتتى.
«ءدىلمار» شەشەندىك ونەر كلۋبى رەسپۋبليكالىق بايقاۋدى بىرنەشە رەت ۇيىمداستىردى. ستۋدەنتتەر اراسىندا وتكەن سايىستىڭ ماقساتى - جاستاردىڭ شەشەندىك قابىلەتتەرىن دامىتۋ، ولاردىڭ ويلاۋ جۇيەسىن جەتىلدىرۋ جانە قوعامدىق سويلەسۋدە وزدەرىن ەركىن ۇستاۋعا ۇيرەتۋ. جارىسقا قازاقستاننىڭ ءتۇرلى جوعارى وقۋ ورىندارىنان كەلگەن ستۋدەنتتەر قاتىسىپ، ولاردىڭ ريتوريكالىق شەبەرلىكتەرى، ويلارىن انىق جانە سەنىمدى جەتكىزۋ قابىلەتتەرى سىنعا ءتۇستى.
«ستۋدەنتتەر اراسىنداعى «ءدىلمار» شەشەندىك ونەر بايقاۋى وسىمەن ءۇشىنشى رەت ءوتىپ وتىر. ءار جىلى ءبىز تالاپتار مەن شارتتاردى كۇردەلەندىرە تۇستىك. ماقساتىمىز شەشەندىكتىڭ سۋىرىپ سالما، اقىل-ويدىڭ تەرەڭدىگى، وي ۇشقىردىعى دەگەن ەڭ نەگىزگى تالاپتاردى ورىنداۋ بولاتىن. بيىل سول تالاپتاردى بەلگىلى ءبىر دەڭگەيدە ورىندادىق دەپ ايتا الامىن. ارينە، تۇپكىلىكتى دەڭگەيدە باياعى شەشەندىككە بارۋ ءالى ەرتەلەۋ. ويتكەنى اتام-قازاق «كورە-كورە كوسەم، سويلەي-سويلەي شەشەن بولاسىڭ» دەيدى. بۇل ءۇشىنشى رەت ءوتىپ جاتقان بايقاۋعا ەلىمىزدىڭ 12 جوعارى وقۋ ورنىنان 12 ستۋدەنت قاتىستى»، - دەدى رەسپۋبليكالىق «ءدىلمار» ونەر كلۋبىنىڭ نەگىزىن قالاۋشى جارقىن سالەنۇلى.
بايقاۋ بارىسىندا ستۋدەنتتەر سوزدەن جاڭىلىپ، توپ الدىندا قوبالجۋ ساتتەرى دە بولدى. الايدا العاش رەت ءسوز دوداسىنا قاتىسىپ، ءوزىنىڭ شەشەندىگىن كورسەتكەن ستۋدەنتتەر قارجىلاي سىيلىقتارمەن ماراپاتتالدى. سايىسقا قاتىسىپ، تاجىريبە جيناعان جاس شەشەندەر قامشى سالدىرماي، تورەشىلەردىڭ كوڭىلىنەن تولىقتاي شىعا ءبىلدى. بايقاۋ بىرنەشە كەزەڭنەن تۇردى: شەشەندىك ءسوز، پىكىرتالاس جانە ناقتى ماسەلە بويىنشا ءسوز سويلەۋ. ءار كەزەڭدە قاتىسۋشىلاردىڭ ءتىل بايلىعى، لوگيكالىق ويلاۋى جانە اۋديتوريانى باۋراپ الۋ شەبەرلىگى باعالاندى.
«اتامۇرا» كورپوراتسياسى اتالمىش بايقاۋعا 3 ميلليون تەڭگە بولگەن. قارجىنىڭ باسىم بولىگى سايىسكەرلەردىڭ ساعىن سىندىرماۋ ماقساتىندا جۇلدە قورىنا جۇمسالعانداي. سەبەبى ءۇشىنشى ورىندى يەلەنگەن ءۇش جەڭىمپازعا 100 مىڭ تەڭگەدەن بەرىلسە، ەكىنشى ورىنعا جايعاسقان ەكى قاتىسۋشىعا 200 مىڭ تەڭگەدەن ءتيدى. ال ءبىرىنشى ورىن يەلەنگەن اقىن 400 مىڭ تەڭگەنى، باس جۇلدەنى يەلەنگەن جەڭىمپاز 600 مىڭ تەڭگەنى قانجىلادى. ودان بولەك، كورەرمەندى ونەرىمەن ءتانتى ەتكەن وزگە قاتىسۋشىلار ەلۋ مىڭ تەڭگە سىياقى الدى.
«اتامۇرا باسپا-كورپوراتسياسىنىڭ قۇرىلعانىنا 30 جىلدان استام ۋاقىت بولدى. وسى ارالىقتا ءبىز مۇمكىندىگىنشە ۇلتتىق قۇندىلىقتارىمىزعا دەمەۋشىلىك جاساپ كەلەمىز. اتاپ ايتار بولساق، ايتىس ونەرىمىز، انشىلىك ونەرىمىز بار. قازاقشا كۇرەس بار. ءبىز مۇنى الەم دەڭگەيىنە جەتكىزدىك. ءبىزدىڭ حالقىمىز و باستا ءسوز ونەرىن قادىرلەگەن. شەشەندىك ونەرگە ۇلكەن ءمان-ماعىنا بەرگەن. ءبىر اۋىز سوزبەن ەردىڭ داۋىن دا، جەردىڭ داۋىن دا، جاۋدىڭ دا بەتىن قايتارا بىلگەن. ال ەندى سوڭعى كەزدە ءبىزدىڭ جاستاردىڭ ءتىلى شۇبارلانىپ جاتقان سياقتى. مۇنداي جارىسقا قاتىسۋ ءۇشىن جاستار كوپ ىزدەنەدى، كوپ كىتاپ وقۋى كەرەك. سوندا عانا ءوز ءتىلىن بايىتا بىلەدى. سول سەبەپتى وسىنداي سايىستار انا ءتىلىمىزدىڭ دامۋىنا ۇلكەن ۇلەس قوسادى دەپ ويلايمىن»، - دەدى ءوز سوزىندە سايىستىڭ باس دەمەۋشىسى، «اتامۇرا» كورپوراتسياسىنىڭ ديرەكتورى راقىمعالي قۇل-مۇحاممەد.
اكادەميك رادلوۆ ءوز جيناعىندا:
«قازاقتار… مۇدىرمەي، كىدىرمەي، ەرەكشە ەكپىنمەن سويلەيدى. ويىن ءدال، ايقىن ۇعىندىرادى. اۋىز ەكى سويلەپ وتىرعاننىڭ وزىندە سويلەگەن سوزدەر ۇيقاسپەن، ىرعاقپەن كەلەتىندىگى سونشالىق، بەينە ءبىر ولەڭ ەكەن دەپ تاڭ قالاسىڭ»، - دەپ جازعان بولاتىن. وعان دالەل – «ءدىلمار» بايقاۋىندا ونەر كورسەتكەن جاستار دەۋگە بولادى.
«اراعا توپتى جارىپ، مىنە كىردىم،
ىستىق قوي ماحابباتى بۇل ەلىمنىڭ.
ءال-قۋاتى ءوزىڭسىڭ شابىتىمنىڭ،
بار قۋاتى ءوزىڭسىڭ جىگەرىمنىڭ.
«قازاق» دەپ سوعىپ وتەدى ۋادە بەرەم،
ەڭ سوڭعى ءدۇرسىلى دە جۇرەگىمنىڭ»، - دەپ ءبىرىنشى ورىن يەگەرى قازىبەك جالعاس ماراپاتتاۋ راسىمىندە ءسوز سويلەدى.
ءۇشىنشى رەت وتكىزىلگەن «ءدىلمار» شەشەندىك ونەر بايقاۋىنىڭ ءۇشىنشى ورنىن يەلەنگەن – ءشامىل تيمۋرلانۇلى (الماتى), ەلەمەس اقەركە (الماتى), نۇرجانقىزى ارۋجان (الماتى) الدى. ال ەكىنشى ورىنعا ناسيحات سەيفۋللين (استانا), تۇرالى سانجار (سەمەي) جايعاستى. ءبىرىنشى ورىندى قازىبەك جالعاس (الماتى) يەلەندى. باس جۇلدەنى جاپپاس اياۋلىم (الماتى) جەڭىپ الدى.
«شەشەندىككە، جالپى ۇلتتىق قۇندىلىقتارعا، ءوزىمىزدىڭ اتا-بابامىزدان قالعان سۇبەلى سوزدەردى دارىپتەۋگە قىزىعۋشىلىعىم 9-شى سىنىپتا اشىلدى. ءوزىمنىڭ «اباي» اتىنداعى رەسپۋبليكالىق مامانداندىرىلعان قازاق ءتىلى مەن ادەبيەتىن تەرەڭدەتىپ وقىتاتىن مەكتەپتىڭ تابالدىرىعىن اتتاعاننان وسى ءسوز ونەرىنە قىزىعۋشىلىعىم ەرەكشە اۋدى. مىرجاقىپ دۋلاتۇلى ايتادى عوي: «مەن بىتكەن ويپاڭ جەرگە الاسا اعاش، ەمەسپىن جەمىسى كوپ تاماشا اعاش. قالعانشا جارتى جاڭقام مەن سەنىكى - پايدالان شارۋاڭا جاراسا، الاش!» دەگەن ۇراندى ءسوزدى ءاردايىم ءوز جۇرەگىمدە، ويىمدا ساقتاپ، وسى قاعيدانىڭ نەگىزىندە بيىك بەلەستەردى باعىندىرۋعا ارەكەت ەتىپ كەلە جاتىرمىن»، - دەدى بايقاۋ جەڭىمپازى.
«ءدىلمار» شەشەندىك ونەر كلۋبى – ستۋدەنتتەر مەن وقۋشىلار اراسىندا شەشەندىك شەبەرلىكتى دامىتۋعا باعىتتالعان ۇيىم. كلۋبتىڭ نەگىزگى ماقساتى – جاستاردى كوپشىلىك الدىندا سويلەۋ قابىلەتىن جەتىلدىرۋ، ءوز ويىن ساۋاتتى جانە سەنىمدى جەتكىزۋگە ۇيرەتۋ، ريتوريكا مەن لوگيكالىق ويلاۋدى دامىتۋ.
سىمبات ناۋحان
«ادىرنا» ۇلتتىق پورتالى
