قازاقستاندا ەكىنشى اتوم ەلەكتر ستانتسياسى (اەس) سالىناتىن ايماق رەسمي تۇردە انىقتالدى. نىسان الماتى وبلىسىنىڭ جامبىل اۋدانىندا سالىناتىن بولدى. بۇل شەشىم 5 جەلتوقساندا «ۇلكەن» اۋىلىندا وتكەن قوعامدىق تىڭداۋدا جەرگىلىكتى تۇرعىندارعا تانىستىرىلدى، دەپ حابارلايدى "ادىرنا".
جيىنعا كەلگەندەر ۇسىنىستى قولداعان.
اتوم ەنەرگياسى جونىندەگى اگەنتتىك مالىمەتىنشە، ەكىنشى اەس-ءتىڭ ورنىن تاڭداۋ ءۇشىن «قازاقستان اتوم ەلەكتر ستانتسيالارى» كومپانياسىمەن بىرلەسكەن جان-جاقتى تالداۋ جۇرگىزىلگەن.
ەنەرگەتيكالىق جۇيەدەگى قۋات قاجەتتىلىگى، ينفراقۇرىلىمنىڭ قولجەتىمدىلىگى جانە قاۋىپسىزدىك تالاپتارى سياقتى كوپتەگەن فاكتور ەسكەرىلگەن. وسى زەرتتەۋ ناتيجەسى ارنايى كوميسسيانىڭ وتىرىسىندا قارالىپ، جامبىل اۋدانىن اەس سالۋعا قولايلى ايماق رەتىندە بەكىتۋ ۇسىنىلدى.
تىڭداۋ بارىسىندا ماماندار جەرگىلىكتى حالىققا اتوم رەاكتورىنىڭ قاۋىپسىز جۇمىسىن قامتاماسىز ەتەتىن شارالار كەشەنىن تانىستىرعان. سونداي-اق ستانتسيانىڭ وڭىرگە جانە جالپى ەلگە اكەلەتىن الەۋمەتتىك-ەكونوميكالىق اسەرلەرى ءتۇسىندىرىلدى.
اگەنتتىكتىڭ رەسمي حابارلاماسىندا تۇرعىندار جوبانى قولداپ، ونىڭ جاڭا جۇمىس ورىندارىن اشۋعا، ينفراقۇرىلىمدى دامىتۋعا جانە ايماقتاعى ەنەرگيا تاپشىلىعىن ازايتۋعا مۇمكىندىك بەرەتىنىن اتاپ وتكەنى جازىلعان.
ايتا كەتسەك، العاشقى اەس تە ۇلكەن اۋىلى ماڭىندا سالىنادى. ول «بالقاش» دەپ اتالاتىن بولدى. اەس قۇرىلىسى 10-12 جىلعا سوزىلۋى مۇمكىن.
