اقمولا وبلىسىندا تاۋەلسىزدىكتىڭ 30 جىلدىعىنا وراي ۇلتتىق ات سپورتى تۇرلەرىنەن جارىس ءوتتى. ايتۋلى دوداعا 100-گە تارتا سايگۇلىك قاتىسىپ، 4 سپورت تۇرىنەن شاباندوزدار باق سىناستى. بۇل تۋرالى “ادىرنا” ۇلتتىق پورتالى “قازاقستان” ۇلتتىق ارناسىنا سىلتەمە جاساپ حابارلايدى.
باعى مەن بابى سىنعا تۇسەتىن نەبىر سايگۇلىك وسى الاڭدا.. بايراقتى باسەكەگە كىل مىقتى اتبەگىلەر جينالعان. جارىس تەڭگە الۋ، بايگە، كوكپار سىندى بىرنەشە ۇلتتىق ويىننان تۇردى. العاشقىسى «كوكپار» ويىنى.
ويىن ءاۋ باستان اق قىزا ءتۇستى. ورتاعا وتىز كەلى سەركە تاستالدى. 48 شاباندوزدىڭ تالاسۋ ءساتى باستالدى. ءۇش ساعاتقا سوزىلعان ويىندا ەرەيمەنتاۋلىق كوكپارشىلار العاشقى كەزەڭنەن كوزگە ءتۇسىپ، باس جۇلدەنى قانجىعاسىنا بايلادى.
ساعي امانتاەۆ، «اقمىرزا» كومانداسىنىڭ قورعاۋشىسى:جارىسقا ۇلكەن دايىندىقپەن كەلدىك. قارسىلاستارىمىز جايلى بارلىق مالىمەتتەردە بولدى. جاتتىقتىرۋشىلارىمىزدىڭ ارقاسىندا وسىنداي جەتىستىككە جەتتىك.
جامبى اتۋدا جاس جىگىتتەردىڭ مەرگەندىگى سىنعا ءتۇستى. 20-عا جۋىق شاباندوز نىسانانى مەيلىنشە ءدال كوزدەۋگە تىرىستى. دەسە دە ەلوردالىق دياس بەرىكۇلىنىڭ باعى جانىپ، 26 ۇپايمەن ءبىرىنشى ورىن يەلەندى.
ال تەڭگە ىلۋدە ەپتىلىك قاجەت. ات ۇستىندە وتىرىپ، ولجا الۋ وڭاي ەمەس. 10 مىقتىنىڭ ىشىنەن كوكشەتاۋلىق ءادىل ماقساتۇلى 8 سەكۋندتا 3 تەڭگەنى ءىلىپ، سۋىرىلىپ العا شىقتى.
ءادىل ماقساتۇلى، تەڭگە الۋ سايىسىنىڭ جەڭىمپازى:وسى سپورتقا ەڭ كىشى جاستان كەلدىم. قازاقستان چەمپيوناتىنداعى جەڭىستەن ءۇمىتىم بار.
سايگۇلىكتەر باسەكەسىن ادەتتەگىدەي الامان بايگە تۇيىندەدى. اۋىزدىعىمەن الىسقان 20 جورعا 7 شاقىرىمعا شاپتى. اينالىمنان شىعىپ قالعان تۇلپارلار دا از بولمادى. سولاردىڭ ىشىنەن ەلوردالىق «سارقىراما» اتتى سايگۇلىك قارا ءۇزىپ شىقتى. جۇيرىك جانۋاردى ەرتتەگەن ەڭ كىشى قاتىسۋشى 11 جاستاعى ديدارعا بايگەنىڭ باس جۇلدەسى بۇيىردى.
ديدار سەركەن، الامان بايگەنىڭ جەڭىمپازى:9 جاسىمنان باستاپ بايگەگە شاپتىم. اتىمىز مىقتى بولدى.
پاندەميادان كەيىن قايتا جاڭدانعان ۇلتتىق سپورت تۇرلەرىن الداعى ۋاقىتتا دا كەڭىنەن ناسيحاتتاۋ جوسپاردا بار دەيدى، ۇيىمداستىرۋشىلار.
عالىمجان كەنجەشۇلى، اقمولا وبلىسى اكىمىنىڭ ورىنباسارى:تاۋەلسىزدىگىمىزدىڭ 30 جىلدىعىنا وراي وسىنداي ءىس-شارا ۇيىمداستىرۋ جوسپارلاندى. كەلەسى جىلعا اۋدانداردا وتكىزىلەدى. مۇنىڭ تۇپكى نەگىزگى ماقساتى - جىگىتتەردىڭ ءپاتريوتيزمىن، جەرگە دەگەن سۇيىسپەنشىلىگىن ارتتىرۋ.
بايقاۋ سوڭى كورمەگە ۇلاستى. ياعني، جانكۇيەرلەرگە وسى دوداعا قاتىسقان 100 تۇلپاردى تاماشالاۋ مۇمكىندىگى بەرىلدى.
“ادىرنا” ۇلتتىق پورتالى
