قازاقستاندىق جاس شاحماتشىلار گرەكيانىڭ رودوس ارالىندا وتكەن راپيد جانە بليتس بويىنشا جاسوسپىرىمدەر اراسىنداعى الەم چەمپيوناتىنان 10 التىن جانە 4 قولا مەدال جەڭىپ الدى، دەپ حابارلايدى “ادىرنا” ۇلتتىق پورتالى.
تۋرنيرگە 49 ەلدەن 8 بەن 18 جاس ارالىعىنداعى 433 سپورتشى قاتىستى.
قازاقستان شاحمات فەدەراتسياسىنىڭ مالىمەتىنشە، ءوز جاس كاتەگوريالارىندا راپيد پەن بليتستەن چەمپيون اتانعاندار – اليشا بيساليەۆا، اميرجان انەتوۆ، ەرعالي سۇلەيمەن جانە ەلناز قالياحمەت. سونىمەن قاتار، راپيدتەن ءبىرىنشى ورىندى ادينۇر ادىلبەك پەن ايارۋ التىنبەك يەلەندى. بۇعان دەيىن قازاقستاندىقتار جىل سايىن تەك 2-3 التىن مەدالمەن ورالىپ جۇرگەن ەدى. بيىلعى ناتيجە – رەكوردتىق كورسەتكىش.
گرەكيادا ەكى قولا مەدالدى جانسايا شولپانبەك ەنشىلەسە، بليتستە ءۇشىنشى ورىننان كورىنگەندەر – سۇلەيمان نۇراقىن مەن دانيال ساپەنوۆ.
ءتۋرنيردىڭ باستى قاھارمانى 8 جاستاعى اليشا بيساليەۆا بولدى. استانالىق شاحماتشى راپيد پەن بليتس بويىنشا 22 پارتيانىڭ بارلىعىندا جەڭىسكە جەتىپ، قارسىلاستارىنا ەش مۇمكىندىك قالدىرمادى.
«ءبىزدىڭ جاس شاحماتشىلارىمىزدىڭ ناتيجەسى بارلىق كۇتكەنىمىزدەن اسىپ ءتۇستى! جەتكىنشەكتەرىمىز كەرەمەت ويىن كورسەتتى. ءار حالىقارالىق تۋرنيردە وزدەرىن تانىتىپ جۇرگەن جاڭا تولقىنمەن ماقتانامىز. جۇيەلى جۇمىس پەن جاستارعا دەگەن سەنىم – وسىنداي جەڭىسكە جەتكىزەتىن جول»، – دەدى قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ.
FIDE ۇيىمداستىرعان بۇل چەمپيونات التى جاس ساناتىندا، ۇلدار مەن قىزدار اراسىندا بولەك ءوتتى. قازاقستاننان 22 شاحماتشى قاتىسىپ، ولاردىڭ توعىزى جۇلدەگەر اتاندى.
بايقاۋلار شۆەيتساريالىق جۇيە بويىنشا 11 تۋردان تۇردى. راپيدتە ءار ويىنشىعا 15 مينۋت جانە ءار ءجۇرىس سايىن 5 سەكۋند قوسىمشا ۋاقىت بەرىلدى، ال بليتستە ۋاقىت فورماتى «5+3» بولدى.
