قازاقستاننىڭ ءبىرىنشى، الەمنىڭ جەتىنشى راكەتكاسى ەلەنا رىباكينا مايامي WTA 1000 ءتۋرنيرىنىڭ فينالىندا قارسىلاسىنا ەسە جىبەردى، دەپ حابارلايدى “ادىرنا” ءتىلشىسى.
قازاقستاندىق تەننيسشى فينالدا الەمنىڭ 12-راكەتكاسى، چەحيالىق پەترا كۆيتوۆامەن كەزدەسكەن. قارسىلاستار وسىعان دەيىن ەكى مارتە كەزدەسىپ، ءبىر-بىردەن جەڭىسكە جەتكەن ەدى.
بۇل جولى ءبىرىنشى پارتيادا ەسەپ 4:4 بولعان مەزەتتە چەحيالىق تەننيسشى برەيك جاساپ كەتكەنىمەن، ەلەنا سول بويدا تارازى باسىن تەڭەستىردى – 5:5. اسا تارتىستى وتكەن تاي-برەيكتە ول بەس سەت-پوينتتى پايدالانا المادى – 6:7 (14:16). ءبىر ساعات 6 مينۋتقا سوزىلعان ءبىرىنشى سەتتىڭ وزىندە رىباكينا 10 ەيس جاساپ ۇلگەردى.
ەكىنشى سەتتە كۆيتوۆا برەيكپەن العا كەتتى – 2:0. اقىرى ول ماتچتى تاعى ءبىر برەيكپەن تۇيىندەدى – 6:2.
وسىلايشا، ەلەنا رىباكينا مايامي ماستەرس جارىسىنىڭ فينالىندا جەڭىلىس تاپتى.
1 ساعات 42 مينۋتقا سوزىلعان باسەكە بارىسىندا قازاقستاندىق تەننيسشى 12 ەيس جاساپ، 2 برەيك-پوينتتىڭ بىرەۋىن ءوز ەسەبىنە جازدى. قارسىلاسى 5 ەيس، 3 برەيكپەن (8 برەيك-پوينت) كوزگە ءتۇستى.
