تەگەران سوتى يراندىق قۇقىق قورعاۋشى، 2023 جىلعى نوبەل بەيبىتشىلىك سىيلىعىنىڭ لاۋرەاتى نارگيس ءموحامماديدى قوسىمشا التى ايعا باس بوستاندىعىنان ايىرۋ تۋرالى ۇكىم شىعاردى. بۇل تۋرالى ونىڭ كۇيەۋى تاگي راحماني الەۋمەتتىك جەلىدە جاريالادى، دەپ حابارلايدى “ادىرنا” ۇلتتىق پورتالى.
جاڭا ۇكىم ءموحامماديدىڭ ۇزاق ۋاقىت جازاسىن وتەپ جاتقان تۇرمەدەگى قىزمەتىنە قاتىستى. وعان جانە تاعى ءتورت تۇتقىنعا ءولىم جازاسىنا قارسى مالىمدەمە جاريالاعانى جانە وتىرىس ۇيىمداستىرعانى ءۇشىن يسلامدىق جۇيەگە قارسى ۇگىت-ناسيحات جۇرگىزدى دەگەن ايىپ تاعىلدى. سوت وتكەن سەنبىدە ءوتتى.
«بوستاندىق نارگيس» حالىقارالىق كواليتسياسى سوت ۇكىمىن ايىپتاپ، ونى ءموحامماديدىڭ اۋزىن جابۋ ارەكەتى دەپ اتادى. قۇقىق قورعاۋشىنىڭ ءوزى بۇل شەشىمگە باعىنبايتىنىن، قىزمەتىن جالعاستىراتىنىن مالىمدەدى.
نارگيس موحاممادي 2021 جىلدان بەرى تۇرمەدە وتىر جانە ادام قۇقىقتارى سالاسىنداعى قىزمەتى ءۇشىن قوسىمشا جازاعا تارتىلعان. ول بۇرىن باس بوستاندىعىنان ايىرۋ جازاسىنا كەسىلگەن.
موحاممادي بۇعان دەيىن ادام قۇقىقتارىن قورعاعانى ءۇشىن 13 رەت قاماۋعا الىنىپ، 9 رەت سوتتالعان جانە بارلىعى 36 جىلدان استام باس بوستاندىعىنان ايىرىلعان.
حالىقارالىق قاۋىمداستىق ءموحامماديدىڭ يرانداعى ادام قۇقىقتارى جونىندەگى جۇمىسىنىڭ ماڭىزدىلىعىن اتاپ ءوتىپ، ونى بوساتۋدى تالاپ ەتۋدى جالعاستىرۋدا.
بەيبىتشىلىك سالاسىنداعى نوبەل سىيلىعى يراندىق قۇقىق قورعاۋشى نارگيس موحامماديگە 2023 جىلدىڭ قازان ايىندا «يرانداعى ايەلدەرگە قىسىم كورسەتۋگە قارسى كۇرەسى جانە بارشاعا ارنالعان ادام قۇقىعى مەن بوستاندىعىن ىلگەرىلەتۋ جولىنداعى كۇرەسى ءۇشىن» بەرىلدى. نورۆەگيالىق نوبەل كوميتەتى ءموحامماديدىڭ ونداعان جىلدار بويى ايەلدەر قۇقىقتارىن قورعاۋىن، ونىڭ يران تۇرمەلەرىندەگى ءولىم جازاسى مەن ازاپتاۋلارعا قارسى ناۋقاندارىن جانە ماحسا اميني قايتىس بولعاننان كەيىن باستالعان 2022 جىلعى نارازىلىقتارداعى ءرولىن اتاپ ءوتتى.
ماراپاتتاۋ كەزىندە 51 جاستاعى موحاممادي تەگەرانداعى ەۆين تۇرمەسىندە قاماۋدا بولدى. ول قاماۋعا الىنعانىنا جانە جالپى 31 جىلعا سوتتالعانىنا قاراماستان ادام قۇقىقتارىن قورعاۋ جۇمىسىن جالعاستىرۋدا.
