18 قاراشادا قىرعىزستان پارلامەنتىنىڭ دەپۋتاتى نۇربەك سىدىعاليەۆ ەل استاناسىن بىشكەكتەن وش قالاسىنا كوشىرۋ تۋرالى ۇسىنىس ايتتى. ونىڭ سوزىنشە، بۇعان قازىرگى استاناداعى كولىك كەپتەلىسى سەبەپ بولىپ وتىر. بۇل تۋرالى Kaktus.media جازدى، دەپ حابارلايدى «ادىرنا» ءتىلشىسى.
سىدىعاليەۆ وش قالاسىنا بارعان ساپارىندا كوپىرلەر مەن جولايرىقتاردىڭ سالىنىپ جاتقانىن كورگەنىن ايتتى. سونداي-اق ول بىشكەك مەرياسىنا وسى تاجىريبەنى ۇلگى ەتىپ، كولىك قوزعالىسى كوپ قيىلىستاردا وسىنداي جولايرىقتار سالۋدى ۇسىندى.
قىرعىزستاننىڭ قۇرىلىس، ساۋلەت جانە تۇرعىن ءۇي-كوممۋنالدىق شارۋاشىلىق ءمينيسترى نۇردان ورىنتاەۆ وش قالاسىندا ەستاكادالىق كوپىرلەردىڭ تولىق قۇجاتتار توپتاماسىنسىز سالىنا باستاعانىن مالىمدەدى. قازىر، ونىڭ ايتۋىنشا، قاجەتتى قۇجاتتار رەتكە كەلتىرىلىپ، قۇرىلىس شىعىندارى ەسەپتەلىپ جاتىر. ال بىشكەك قالاسىنىڭ مەرى ايبەك جۇنىشاليەۆ استانادا دا وسىنداي نىسانداردىڭ قۇرىلىسى ءجۇرىپ جاتقانىن اتاپ ءوتتى.
«ول جاقتا جولدار مەن كوپىرلەردى قانداي جاقسى سالعان! بىزگە دە وسىنداي جوبالاردى جۇزەگە اسىرۋ قاجەت. ايتپەسە، كولىك كەپتەلىسى ماسەلەسىن شەشە المايمىز. كۇن سايىن جاعداي قيىنداپ بارادى. بۇل ماسەلەنى وسىنداي جولمەن شەشۋ كەرەك نەمەسە استانانى كوشىرۋ قاجەت»، – دەدى سىدىعاليەۆ.
بۇعان جاۋاپ رەتىندە ايبەك جۇنىشاليەۆ استانا كوشىرىلگەن جاعدايدا بىشكەك تۇرعىندارىنىڭ دا جاڭا استاناعا قونىس اۋداراتىنىن ايتتى. ال دەپۋتات حالىقتىڭ ءبىر بولىگى قازىرگى استانادا قالا بەرەتىنىن جەتكىزدى. سونىمەن قاتار ول كولىك ماسەلەسىنە قالا ورتالىعىندا كوپقاباتتى تۇرعىن ۇيلەر سالۋعا رۇقسات بەرگەن ساۋلەتشىلەردى كىنالادى. ونىڭ پىكىرىنشە، قۇرىلىس جۇمىستارىن بىشكەك قالاسىنىڭ شەت ايماقتارىندا دامىتۋ قاجەت ەدى.
ايتا كەتەيىك، وتكەن جىلدىڭ قاڭتار ايىندا قىرعىزستان پارلامەنتىنىڭ تاعى ءبىر دەپۋتاتى باقىتبەك ماريپوۆ تا ەل استاناسىن بىشكەكتەن باسقا قالاعا كوشىرۋدى ۇسىنعان بولاتىن. ونىڭ پىكىرىنشە، بۇل باستاما ارقىلى ءتۇتىن مەن كولىك كەپتەلىسى ماسەلەسىن شەشۋگە بولادى.
بىلتىر كۇزدە قىرعىزستاندا استانانى ماناس قالاسىنا كوشىرۋ مۇمكىندىگى دە ايتىلعان ەدى. مۇنداي ۇسىنىستى ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى توراعاسى، مينيسترلەر كابينەتىنىڭ بۇرىنعى توراعا ورىنباسارى قامشىبەك تاشيەۆ كوتەرگەن بولاتىن.
