فوتو: Report
كاسپي تەڭىزى دەڭگەيىنىڭ تومەندەۋى بۇكىل ايماق ءۇشىن ەكولوگيالىق، ەكونوميكالىق جانە الەۋمەتتىك سىن-قاتەرگە اينالىپ وتىر. بۇل تۋرالى ازەربايجان پرەزيدەنتىنىڭ كليمات ماسەلەلەرى جونىندەگى وكىلى مۇحتار باباەۆ بۇۇ-نىڭ كليماتتىڭ وزگەرۋى جونىندەگى نەگىزدەمەلىك كونۆەنتسياسى تاراپتارىنىڭ 31-كونفەرەنتسياسى (COP31) اياسىندا انتاليادا وتكەن كاسپي تەڭىزىنە ارنالعان جوعارى دەڭگەيدەگى جيىندا مالىمدەدى، دەپ جازادى “ادىرنا”.
ازەربايجان پاۆيلونىندا وتكەن تالقىلاۋ بارىسىندا 2025 جىلى كاسپي تەڭىزىنىڭ سۋ دەڭگەيى 14 سانتيمەترگە تومەندەگەنى ايتىلدى. سونىڭ سالدارىنان ازەربايجان سەكتورىنداعى 30 مىڭ گەكتار اۋماق سۋدان بوساعان.
مۇحتار باباەۆتىڭ ايتۋىنشا، ايماقتا اۋا تەمپەراتۋراسى مەن جاۋىن-شاشىن كورسەتكىشتەرى دە ايتارلىقتاي وزگەرگەن. 2025 جىلى باقىلاۋ جۇرگىزىلگەن اۋماقتا جاۋىن-شاشىننىڭ جىلدىق مولشەرى 198,3 ميلليمەترگە جەتكەن. بۇل – سوڭعى ون جىلداعى ەڭ جوعارى كورسەتكىش. سوعان قاراماستان، كاسپيدەگى سۋ دەڭگەيى تومەندەۋىن جالعاستىرعان.
«بۇل وزگەرىستەر ينفراقۇرىلىم مەن ەكونوميكالىق قىزمەتكە جاڭا قيىندىقتار تۋعىزىپ وتىر. پورتتار مەن كەمە قاتىناسىنا جۇمسالاتىن شىعىن ارتىپ، بالىق شارۋاشىلىعى، بالىقتاردىڭ كوشى-قون جولدارى مەن بيوالۋانتۇرلىلىككە تونەتىن قاۋىپ كۇشەيىپ كەلەدى. بۇل – بۇكىل ايماعىمىز ءۇشىن ەكولوگيالىق، ەكونوميكالىق جانە الەۋمەتتىك سىن-قاتەر»، – دەدى ول.
باباەۆ تۇرىكمەنباشى قالاسىندا وتكەن العاشقى كاسپي ەكولوگيالىق ءسامميتىن دە ەسكە سالدى. ونىڭ ايتۋىنشا، ازەربايجان پرەزيدەنتى يلحام اليەۆ اتالعان سامميتتە كاسپي تەڭىزى دەڭگەيىنىڭ جىلدام تومەندەۋى اپاتتى سالدارعا اكەلۋى مۇمكىن ەكەنىن ەسكەرتكەن.
وسىعان بايلانىستى مۇحتار باباەۆ حالىقارالىق قاۋىمداستىقتى ماسەلەنى بۇۇ الاڭدارىندا، كليماتتىق جانە ەكولوگيالىق فورۋمداردا بەلسەندى كوتەرۋگە شاقىردى. سونداي-اق ول كاسپي جاعالاۋىنداعى بەس مەملەكەتتىڭ بىرلەسىپ ارەكەت ەتىپ، زالال قايتىمسىز سيپاتقا يە بولماي تۇرىپ ناقتى ناتيجەلەرگە قول جەتكىزۋى قاجەت ەكەنىن اتاپ ءوتتى.
جيىنعا قاتىسۋشىلار سۋ دەڭگەيىنىڭ تومەندەۋىنە بايلانىستى كاسپي ماڭى مەملەكەتتەرى بىرلەسكەن عىلىمي زەرتتەۋلەر مەن دەرەكتەر الماسۋ باستامالارىن كۇشەيتكەنىن جەتكىزدى.
ايتا كەتەيىك، ءىس-شاراعا قازاقستان، ازەربايجان، رەسەي، يران جانە تۇرىكمەنستان وكىلدەرى، سونداي-اق بۇۇ قورشاعان ورتا جونىندەگى باعدارلاماسىنىڭ (يۋنەپ) اتقارۋشى ديرەكتورى ينگەر اندەرسەن قاتىستى.
«قارۋ ءتۇرىن تەرگەۋ انىقتايدى». ازەربايجان ءمينيسترى ۇشاق اپاتىنا سىرتتان سوققىنىڭ سەبەپ بولعانىن ايتتى
