اپەللياتسيالىق سوت اتىراۋ وبلىسى ماقات اۋدانىنىڭ بۇرىنعى اكىمى رينات يبراگيموۆقا قاتىستى ءبىرىنشى ساتىداعى سوت ۇكىمىن وزگەرتتى. بۇل تۋرالى وبلىستىق سوت مالىمدەدى، دەپ حابارلايدى “ادىرنا” ۇلتتىق پورتالى.
«اتىراۋ قالاسىنىڭ №2 سوتى يبراگيموۆتى ماتەريالدىق تاۋەلدىلىكتە بولعان ادامعا قاتىستى دەنساۋلىققا قاساقانا اۋىرلىعى ورتاشا زيان كەلتىرگەنى ءۇشىن كىنالى دەپ تانىپ (قك-ءنىڭ 107-بابى 2-بولىگىنىڭ 3-تارماعى), 2 جىل مەرزىمگە باس بوستاندىعىن شەكتەدى. جابىرلەنۋشىنىڭ مورالدىق شىعىن ءوندىرۋ تۋرالى ازاماتتىق تالاپ قويۋى ءىشىنارا قاناعاتتاندىرىلدى: سوتتالۋشىدان 2 ملن تەڭگە مورالدىق زيان وتەماقىسى ءوندىرىلدى»، - دەلىنگەن وبلىستىق سوت حابارلاماسىندا.
سوت القاسى ءىس ماتەريالدارىن زەردەلەپ، يبراگيموۆتىڭ قىلمىس جاساۋداعى كىناسى جابىرلەنۋشىنىڭ جاۋاپتارىمەن، سوت-دارىگەرلىك ساراپتاما قورتىندىسىمەن دالەلدەندى دەگەن تۇجىرىمعا كەلدى.
القا «كىنالى ادامعا كورىنەۋ بەلگىلى ماتەريالدىق جاعىنان تاۋەلدى ادامعا قاتىستى» سارالاۋ بەلگىسى دۇرىس تاعىلماعان دەپ شەشتى. جابىرلەنۋشىنىڭ سوتتالعانعا ماتەريالدىق تاۋەلدىلىگى تۋرالى دالەل ۇسىنىلمادى. جابىرلەنۋشىنىڭ كاسىپكەرلىك قىزمەتتى جۇزەگە اسىرعانى، ونىڭ شوتىنا اقشا تۇسكەنى تۋرالى قۇجاتتار ۇسىنىلدى.
وسىعان بايلانىستى، يبراگيموۆتىڭ ارەكەتى قك-ءتىڭ 107-بابىنىڭ 1-بولىگىنە قايتا سارالاندى. وعان 700 ايلىق ەسەپتىك كورسەتكىش مولشەرىندە ايىپپۇل جازاسى تاعايىندالدى (2 415 000 تەڭگە).
ەسكە سالساق، يبراگيموۆكە قاتىستى ۇرىپ-سوعۋ تۋرالى قىلمىستىق ءىس وسى جىلدىڭ اقپان ايىندا سوتقا بەرىلدى، بىراق ول اكىم قىزمەتىن جالعاستىرا بەرگەن ەدى. ول اۋدان باسشىسى قىزمەتىنەن مامىر ايىنىڭ سوڭىندا عانا ءوز ەركىمەن كەتكەن. ماۋسىمدا سوت ۇكىم شىعارعان بولاتىن.
