پەريزات قايرات 10 جىلعا باس بوستاندىعىنان ايىرىلدى. ول جازاسىن قاۋىپسىزدىگى ورتاشا مەكەمەدە وتەيدى، دەر حابارلايدى "ادىرنا".
سونداي-اق سوتتالعان 10 جىل مەرزىمگە قايىرىمدىلىق قاراجاتىن جيناۋمەن بايلانىستى قىزمەتپەن اينالىسۋ قۇقىعىنان ايىرىلدى.
قىلمىستىق ءىستى سۋديا سابىرجان كارىموۆ قارادى. سوت ۇكىمى كۇشىنە ەنگەن جوق. سوتتالعاندار ۇكىمگە اپەللياتسيالىق شاعىم تۇسىرە الادى.
پروكۋرورلار قىلمىستىق ىستە جازانى جەڭىلدەتەتىن ءمان-جايلار جوق ەكەنىن ايتتى. كەرىسىنشە، ارەكەت توتەنشە جاعداي كەزىندە جاسالعانىن ايتىپ، مۇنى جازانى اۋىرلاتاتىن جاعداي دەپ اتاعان.
پەريزات كايرات قىلمىستىق كودەكستىع 190-بابى 4-بولىگىنىڭ 2-تارماعى بويىنشا – «الاياقتىق»، 218-بابى 3-بولىگىنىڭ 3-تارماعى – «اسا ءىرى كولەمدە قىلمىستىق جولمەن الىنعان كىرىستەردى زاڭداستىرۋ (جىلىستاتۋ)» بويىنشا كىنالى دەپ تانىلىپ، تۇپكىلىكتى 10 جىلعا سوتتالدى.
مەملەكەتتىك ايىپتاۋشىنىڭ ايتۋىنشا، قوردى قۇرۋ كەزىندە دە زاڭبۇزۋشىلىقتار بولعان. قازاقستاننىڭ «قوعامدىق بىرلەستىكتەر تۋرالى» زاڭىنىڭ 10-بابىنا سايكەس، قوردى تىركەۋ ءۇشىن كەمىندە ءۇش ازاماتتىڭ باستاماسى قاجەت. 2021 جىلعى 14 قىركۇيەكتە پەريزات قايرات قۇرىلتاي جينالىسىنىڭ حاتتاماسىن دايىنداعان. وندا ول ءوزىن، سونداي-اق ماتيۋشەنكو، ماعزۇم، تۇرعانباي، امانباي، بولىسوۆ، حيسماتۋلينوۆ، سەرىكجانوۆ، سەيتكامال جانە ءحافيزدى قۇرىلتايشى رەتىندە كورسەتكەن. جينالىستا جارعى قابىلدانىپ، باسقارۋ ورگاندارى قۇرىلىپ، قايرات پرەزيدەنت بولىپ سايلانعان. الايدا ايىپتاۋ اكتىسىنە سايكەس، جينالىس توراعاسى مەن حاتشىسى رەتىندە كورسەتىلگەن ماتيۋشەنكو مەن سەرىكجانوۆانىڭ، سونداي-اق باسقا قۇرىلتايشىلاردىڭ قولدارى قولدان جاسالعان.
سونداي-اق قايراتتىڭ باستاماسىمەن پالەستينالىقتارعا كومەك رەتىندە 566 ميلليون تەڭگە كولەمىندە قايىرىمدىلىق قاراجاتى جينالعان. الايدا ونىڭ تەك 7 ميلليون تەڭگەسى عانا پالەستينا ەلشىلىگىنىڭ شوتىنا اۋدارىلعان. قالعان 559 ميلليون تەڭگە پەريزات قايرات پەن اناسى الاشباەۆا تاراپىنان ءوز قالاۋىنشا جۇمسالعان.
