Tegeran soty ırandyq quqyq qorǵaýshy, 2023 jylǵy Nobel beıbitshilik syılyǵynyń laýreaty Nargıs Mohammadıdi qosymsha alty aıǵa bas bostandyǵynan aıyrý týraly úkim shyǵardy. Bul týraly onyń kúıeýi Tagı Rahmanı áleýmettik jelide jarııalady, dep habarlaıdy “Adyrna” ulttyq portaly.
Jańa úkim Mohammadıdiń uzaq ýaqyt jazasyn ótep jatqan túrmedegi qyzmetine qatysty. Oǵan jáne taǵy tórt tutqynǵa ólim jazasyna qarsy málimdeme jarııalaǵany jáne otyrys uıymdastyrǵany úshin ıslamdyq júıege qarsy úgit-nasıhat júrgizdi degen aıyp taǵyldy. Sot ótken senbide ótti.
«Bostandyq Nargıs» halyqaralyq koalıııasy sot úkimin aıyptap, ony Mohammadıdiń aýzyn jabý áreketi dep atady. Quqyq qorǵaýshynyń ózi bul sheshimge baǵynbaıtynyn, qyzmetin jalǵastyratynyn málimdedi.
Nargıs Mohammadı 2021 jyldan beri túrmede otyr jáne adam quqyqtary salasyndaǵy qyzmeti úshin qosymsha jazaǵa tartylǵan. Ol buryn bas bostandyǵynan aıyrý jazasyna kesilgen.
Mohammadı buǵan deıin adam quqyqtaryn qorǵaǵany úshin 13 ret qamaýǵa alynyp, 9 ret sottalǵan jáne barlyǵy 36 jyldan astam bas bostandyǵynan aıyrylǵan.
Halyqaralyq qaýymdastyq Mohammadıdiń Irandaǵy adam quqyqtary jónindegi jumysynyń mańyzdylyǵyn atap ótip, ony bosatýdy talap etýdi jalǵastyrýda.
Beıbitshilik salasyndaǵy Nobel syılyǵy ırandyq quqyq qorǵaýshy Nargıs Mohammadıge 2023 jyldyń qazan aıynda «Irandaǵy áıelderge qysym kórsetýge qarsy kúresi jáne barshaǵa arnalǵan adam quqyǵy men bostandyǵyn ilgeriletý jolyndaǵy kúresi úshin» berildi. Norvegııalyq Nobel komıteti Mohammadıdiń ondaǵan jyldar boıy áıelder quqyqtaryn qorǵaýyn, onyń Iran túrmelerindegi ólim jazasy men azaptaýlarǵa qarsy naýqandaryn jáne Mahsa Amını qaıtys bolǵannan keıin bastalǵan 2022 jylǵy narazylyqtardaǵy rólin atap ótti.
Marapattaý kezinde 51 jastaǵy Mohammadı Tegerandaǵy Evın túrmesinde qamaýda boldy. Ol qamaýǵa alynǵanyna jáne jalpy 31 jylǵa sottalǵanyna qaramastan adam quqyqtaryn qorǵaý jumysyn jalǵastyrýda.
