بۇگىن قازاقستان بريكس-كە قوسىلمايدى دەگەن اقپارات شىقتى. وتە دۇرىس پوزيتسيا! بريكس دەگەنىمىز نە؟ ول ءتىپتى تولىققاندى ۇيىم دا ەمەس. نە تۇشىمدى جارعىسى جوق، نە ارنايى باسشىلىعى جوق، نە حاتشىلىعى جوق. ءبىر عانا مۇددەسى بار – ول جينالىپ الىپ، باتىستى ايىپتاۋ، كۇبىر-كۇبىر جامانداۋ.
«بريكس بولاشاقتا ناتو-عا قارسى بولادى»، «ويباي ەو-نى قۇلدىراتاتىن قۋاتقا يە»، «بريكس دەگەن بولاشاقتا الەمنىڭ نەگىزگى ۇيىمى بولادى»، «بريكس-تىڭ ۆاليۋتاسى پايدا بولىپ، ەۋرو مەن دوللاردى تاريحتىڭ قوقىسىنا تاستايدى» دەيتىندەر بار. ولار بريكس-كە مۇشە مەملەكەتتەردىڭ حالقىنىڭ سانىن، ەكونوميكاسىن، اسكەرىن، جەر كولەمىن قوسادى دا، «ەڭ قۋاتتى ۇيىم» دەپ سيپاتتايدى. الايدا بۇل ۇيىم(سىماق)قا مۇشە ەلدەر شىنايى تۇرعىدان ءوزارا وداقتاستىق قۇرا الا ما؟ كۇمانىم بار.
قۇرامىن قارايىقشى. برازيليا، ءۇندىستان، قىتاي، وڭتۇستىك افريكا، رەسەي، يران، ءباا، ەفيوپيا، مىسىر. بريكس مىنبەرىندە ءبىر جاعادان باس شىعارار سىڭاي تانىتسا دا، شىندىعىندا بۇل ەلدەردىڭ ءوزارا مۇددەلەرى دە، گەوساياسي كوزقاراستارى دا ءبىر-بىرىنە قاراما قايشى. قىتاي مەن ءۇندىستان اتا جاۋ، يران مەن اراب ەلدەرىنىڭ باسى پىسپەيدى جانە كورىنبەيتىن قاقتىعىستارى كوپ دەگەندەي. وتكەن جىلى وڭتۇستىك افريكادا بريكس-تىڭ ءسامميتى ءوتتى. سوندا وڭتۇستىك افريكا تاراپى رەسەي پرەزيدەنتى پۋتين سامميتكە كەلمەسىن، كەلسە تۇتقىنداۋعا ءماجبۇرمىز، گااگانىڭ شەشىمىنەن اتتاپ كەتە المايمىز دەگەندەي سيگنال جىبەردى. پۋتين بارمادى. بريكس-تىڭ بەتپەردەسى وسى جەردە سىپىرىلىپ ءتۇستى.
سوندىقتان مۇنداي ۇيىمعا مۇشە بولۋدىڭ قاجەتى جوق. ءار ەكىنشى باسقوسۋى «ىرىگەن-شىرىگەن باتىس» دەپ باستالاتىن جيىندارى كوپ. البەتتە، ونداي جيىندارعا قازاقستان بارىپ قاتىسادى، ءسوز سويلەر، بالكىم ۇسىنىستار دا ايتىپ قالار. الايدا ۇيىمعا كىرۋدىڭ قاجەت شامالى.
كوپ ۇيىمعا كىرۋ - كوپتەگەن مىندەتتەمەنى موينىڭا الۋ دەگەن ءسوز. اۋزى كۇيگەن ءۇرىپ ىشەدى دەگەندەي، گەوساياسي قاقتىعىستار كۇشەيگەن ساتتە، ۇقشۇ مەن ەاەس دەگەن ۇيىمداردىڭ زياندى ەكەنىن تۇسىنە باستادىق. سوندىقتان بىزگە ۇلكەن دەرجاۆالارعا سەن جاقسىسىڭ، سەندە جاقسىسىڭ دەپ قاقتىعىستارىنا ارالاسپايتىن جولدى ىزدەۋ ابزالىراق. ءبىزدىڭ باعىتىمىز گەوساياسي قاقتىعىستاردا بەيتاراپتىق ۇستانۋ، ال الەمدىك ساياساتتا كوپۆەكتورلىقتى جۇرگىزۋ بولۋى ءتيىس.
Ashat Kasengali
