رەسەي پرەزيدەنتى ۆلاديمير پۋتين زاپاستاعى رەسەيلىكتەردى اسكەري جيىندارعا شاقىرۋ تۋرالى جارلىققا قول قويدى. قۇجات رەسەي فەدەراتسياسىنىڭ رەسمي قۇقىقتىق اقپارات پورتالىندا 16 قاڭتاردا جاريالانىپ، جاريالانعان كۇنىنەن باستاپ كۇشىنە ەنگەن، دەپ حابارلايدى “ادىرنا” ۇلتتىق پورتالى.
جارلىق بويىنشا ناقتى قانشا ادامنىڭ شاقىرتۋ الاتىنى جانە اسكەريى جيىنداردىڭ قانشا ۋاقىتقا سوزىلاتىنى بەلگىسىز.
قۇجاتتا اسكەريلەردى جيناۋ ماقساتىنا بايلانىستى بىرنەشە تارماق جاسىرىلعان.
اسكەري جيىندارعا تەك زاپاستاعى ەر ازاماتتار عانا شاقىرىلادى. 1998 جىلى قابىلدانعان زاڭعا سايكەس جيىن 2 ايدان اسپاۋى ءتيىس. زاپاستاعى ازاماتتار 3 جىلدا ءبىر رەت جيىنعا كەلۋگە مىندەتتى. اسكەري جاعدايعا بايلانىستى جيىن ۋاقىتى سوزىلعان كۇننىڭ وزىندە 1 جىلدان اسپاۋى كەرەك. جيىنعا قاتىسۋشىلاردى سوعىس ءىس-قيمىلدارى ايماعىنا جىبەرۋگى بولمايدى، تەك رەسەيدىڭ ءوز اۋماعىنداعى قورعانىس شارالارىنا قاتىسا الادى.
شاقىرتۋ العان ازاماتتار جيىنعا كەلمەسە 10 مىڭنان 30 مىڭ رۋبلگە دەيىن ايىپپۇل سالىنادى. اسكەرگە شاقىرۋدان جالتارۋ نەمەسە قاشۋ قىلمىستىق جاۋاپكەرشىلىككە الىپ كەلەدى.
2023 جىلدىڭ شىلدەسىندە پۋتين زاپاستاعى اسكەريلەردىڭ زەينەت جاسىن 5 جىلعا كوتەردى. ياعني جوعارى لاۋازىمدى وفيتسەرلەر 65 جاسقا دەيىن، كىشى وفيتسەرلەر 60 جاسقا دەيىن زاپاس جيىندارىنا كەلۋى قاجەت.
