جازۋشى، دراماتۋرگ مۇحتار اۋەزوۆتىڭ تۋعان كۇنىندە “اتامۇرا” باسپاسىنىڭ “الاشتىڭ تۇڭعىش ءبىلىم ورداسى” اتتى كىتابى جارىق كوردى، دەپ حابارلايدى “ادىرنا” ۇلتتىق پورتالى. بۇل تۋرالى “اتامۇرا” باسپاسىنىڭ پرەزيدەنتى راقىمعالي ابرارۇلى ءوزىنىڭ جەلىدەگى جازباسىندا جازدى.
“بۇگىنگى ۇلكەن مەرەكەگە، مۇحتار اۋەزوۆتىڭ تۋعان كۇنىنە وراي تاعى ءبىر تاماشا كىتاپتىڭ تۇساۋىن كەستىك. «الاشتىڭ تۇڭعىش ءبىلىم ورداسى» دەپ اتالاتىن بۇل كىتاپ – وتە قۇندى تاريحي كىتاپ. كىتاپتا عۇلاما جازۋشى مۇحتار اۋەزوۆ اتىنداعى پەداگوگيكالىق كوللەدجدىڭ وتكەن تاريحى مەن بۇگىنگى دامۋ جاعدايى، جەتىستىكتەرى باياندالادى” دەپ جازدى ول.
سونداي-اق، ول كىتاپتا ءبىلىم ورداسىنىڭ تاريحى جايلى، ناقتىراق ايتقاندا قازاقتىڭ تۇلعالارى تۇڭعىش ءبىلىم العانى جايلى جازىلعانىن جەتكىزدى.
“تۇسىنگەن ادامعا بۇل كىتاپ - تۇنىپ تۇرعان تاريح. مىسالى، وسى ءبىلىم ورداسىندا ەلىمىزدىڭ ۇلى تۇلعالارى قانىش ساتباەۆ، مۇحتار اۋەزوۆ، جۇسىپبەك ايماۋىتوۆ، الكەي مارعۇلان، احات شاكارىمۇلى، شاكەن ايمانوۆ، ءازىلحان نۇرشايىقوۆ تاعى باسقالاردىڭ ءبىلىم العانىن نەمەسە ءدارىس وقىعانىن جۇرتتىڭ ءبارى بىلە بەرمەيدى.
بۇل كىتاپتا سول ۇلى تۇلعالاردىڭ ءوز قولىمەن جازىلعان ءومىرباياندارى، تاريحي فوتولارى، مەكتەپ بىتىرگەن كەزدە العان اتتەستاتتارى، ءتىپتى، العان باعالارىنا دەيىن بەرىلگەن” دەپ قوستى ول.
كىتاپتى “اتامۇرا” باسپاسىنىڭ كىتاپ ۇيلەرىنەن الۋعا بولادى.
