الماتىدا قالا كۇنىنە وراي ۇيىمداستىرىلعان «كىتاپFest» قالالىق كىتاپ جارمەڭكەسى باستالدى. ەكى كۇنگە جوسپارلانعان مادەني شارانىڭ العاشقى كۇنى اربات الاڭىندا قالا تۇرعىندارى مەن قوناقتارىنا كىتاپ الەمىنە ەنىپ، قالامگەرلەرمەن جۇزدەسىپ، ادەبي جاڭالىقتارمەن تانىسۋعا مۇمكىندىك بەرۋدە.
بيىل جارمەڭكەگە 60-تان استام باسپا قاتىسىپ، وقىرمان نازارىنا ءتۇرلى جانر مەن باعىتتاعى جاڭا كىتاپتار مەن تاڭداۋلى باسىلىمداردى ۇسىنىپ وتىر. كەلۋشىلەر وزدەرىنە قاجەتتى ادەبيەتتەردى تاڭداپ قانا قويماي، وتاندىق اۆتورلارمەن كەزدەسىپ، شىعارماشىلىق تۋرالى پىكىر الماسۋعا مۇمكىندىك الدى.
جارمەڭكەنىڭ العاشقى كۇنىندە بەلگىلى اقىن-جازۋشىلاردىڭ قاتىسۋىمەن ادەبي كەزدەسۋلەر وتۋدە. قالامگەرلەر ءوز شىعارماشىلىعى، كىتاپ وقۋ مادەنيەتىنىڭ ماڭىزى جانە قازىرگى وقىرماننىڭ تالعامى تۋرالى وي ءبولىسىپ، كوپشىلىك ساۋالىنا جاۋاپ بەردى.
كەزدەسۋ بارىسىندا جازۋشى، دراماتۋرگ الىشەر راحات الماتى تۇرعىندارىن قالا كۇنىمەن قۇتتىقتاپ، «كىتاپFest» جارمەڭكەسىنىڭ جىل سايىن وقىرمان مەن قالامگەردى جاقىنداستىرىپ، ادەبي ورتا مەن قالا تۇرعىندارىن ءبىر الاڭعا توعىستىراتىن ماڭىزدى مادەني شارا ەكەنىن اتاپ ءوتتى.
جارمەڭكەگە كەلگەن قالا تۇرعىندارى دا شارانىڭ مازمۇنىنا وڭ باعاسىن بەرىپ، كىتاپ تاڭداۋعا جانە اۆتورلارمەن جۇزدەسۋگە قىزىعۋشىلىق تانىتۋدا.
«بۇگىن كىتاپ جارمەڭكەسىنە ارنايى كەلدىم. مۇندا ءارتۇرلى جانرداعى كىتاپتار كوپ ەكەن، وزىمە ۇناعان بىرنەشەۋىن تاۋىپ الدىم. اسىرەسە وتاندىق اۆتورلارمەن كەزدەسىپ، شىعارمالارى تۋرالى وزدەرىنەن ەستۋ قىزىق بولدى»، – دەدى جارمەڭكە قوناعى الماتىلىق ستۋدەنت اسىلجان باۋىرجانۇلى.
الماتىدا كىتاپقا دەگەن قىزىعۋشىلىقتى ارتتىرۋعا، وقىرمان مەن ادەبي ورتانىڭ بايلانىسىن نىعايتۋعا باعىتتالعان جوبالار تۇراقتى تۇردە جۇزەگە اسىرىلىپ كەلەدى. «كىتاپFest» جارمەڭكەسى دە وسى باعىتتاعى ماڭىزدى مادەني باستامالاردىڭ ءبىرى. مۇنداي باستامالار كىتاپ وقۋ مادەنيەتىن قالىپتاستىرۋعا، وتاندىق ادەبيەتتى كەڭىنەن ناسيحاتتاۋعا جانە قالا تۇرعىندارىنىڭ رۋحاني-مادەني ءومىرىن بايىتۋعا باعىتتالعان.
ايتا كەتەيىك، «كىتاپFest» قالالىق كىتاپ جارمەڭكەسى 19–20 قىركۇيەك كۇندەرى ساعات 10:00-دەن 18:00-گە دەيىن اربات الاڭىندا وتەدى. جارمەڭكەگە بارلىق قالا تۇرعىندارى مەن قوناقتارى شاقىرىلادى
