يراندا قازاق قىزى اتريە چالاكتىڭ «سۇر ءتۇستى اعاش» اتتى تۇڭعىش كىتابى جارىق كوردى. تۋىندى 50 دانا تيراجبەن جارىق كورگەن. بۇل تۋرالى گولروح جەمەنەي ايتتى، دەپ حابارلايدى «ادىرنا» ءتىلشىسى ماڭعىستاۋ گازەتىنە سىلتەمە جاساپ.
«بۇل كىتاپ – كۇنسۇلۋ ەسىمدى بويجەتكەنگە ەسسىز عاشىق بوزبالانىڭ ىشىنە بۇككەن سەزىم يىرىمدەرىنىڭ سىرشىل بايانى. كۇنسۇلۋ باسقا ەلگە قونىس اۋدارادى. ماحاببات دەرتى مەڭدەگەن جىگىت ءمانسىز، مازاسىز كۇندەردى كەشىپ جاتادى. سۇيىسپەنشىلىك ومىرگە وزگەشە رەڭك بەرەدى. ماحابباتپەن عۇمىر ءماندى بولا تۇسەتىندەي مە؟! ال قۇلاي ءسۇيۋدىڭ قاسىرەتىنە تۇنشىققان ءماجنۇن اقىل مەن سەزىم ازابىن قاتار تارتادى. جىگىتتىڭ جان دۇنيەسىندەگى بىتىسپەس ەگەس، ىشكى پسيحولوگيالىق ارپالىس ونىڭ وبرازىن اشا تۇسەدى. كەيىپكەر تۇستەر كورە باستايدى. كوڭىلى قۇلازىعان ساتتەردە شەككەن كۇيiگi مەن تارتقان تاقسiرەتiن قاعاز بەتىنە تۇسىرەدى. وقيعا وسىلايشا ءوربيدى. سۇر، سۇرعىلت ءتۇس ادەتتە «قايعى»، «ازالى مۇڭ» ۇعىمىمەن استاسادى. سۇر ءتۇس – سول ساتتەگى كۇيزەلىس كۇيرەتكەن جىگىتتىڭ جان كورىنىسى. سوندىقتان مەن وسى اتاۋدى قۇپ كوردىم»،- دەيدى كىتاپ اۆتورى.
ول العاشقى ادەبي ولجاسىن سيۋررەاليزم جانرىنا جاتقىزادى.
اتريە چالاك يران ەلىندە بەندەر – تۇرىكمەن قالاسىندا تۋىپ-وسكەن. رۋى – كورپە. ول – پارسى ادەبيەتىن جەتىك مەڭگەرگەن قازاق جاستارىنىڭ ءبىرى. بولاشاقتا تانىمال كينورەجيسسەر بولۋدى ارماندايدى. قازاق قىزى شىعارماشىلىق قابىلەتىن كينو سالاسىنا، سونىڭ ىشىندە قازاق كينوسىنىڭ دامۋىنا باعىتتاۋعا قۇلىقتى. يرانداعى وقۋىن اياقتاعان سوڭ، ءال-فارابي اتىنداعى قازاق ۇلتتىق ۋنيۆەرسيتەتىنە قانداستارعا ارنالعان باعدارلاما اياسىندا وقۋعا تۇسپەك. اتريە قازاق ءتىلىن تەرەڭ مەڭگەرۋگە زەيىن قويعان. يرانداعى قانداستاردىڭ كوبى قازاق ءتىلىن تۇرمىستىق دەڭگەيدە مەڭگەرگەن. سوندىقتان اتريە انا تىلىندە ەركىن سويلەپ، كورىكتى ويدى كوركەم جەتكىزە الاتىنداي دارەجەدە يگەرگىسى كەلەدى.
