Jazýshy, dramatýrg Muhtar Áýezovtiń týǵan kúninde “Atamura” baspasynyń “Alashtyń tuńǵysh bilim ordasy” atty kitaby jaryq kórdi, dep habarlaıdy “Adyrna” ulttyq portaly. Bul týraly “Atamura” baspasynyń prezıdenti Raqymǵalı Abraruly óziniń jelidegi jazbasynda jazdy.
“Búgingi úlken merekege, Muhtar Áýezovtiń týǵan kúnine oraı taǵy bir tamasha kitaptyń tusaýyn kestik. «Alashtyń tuńǵysh bilim ordasy» dep atalatyn bul kitap – óte qundy tarıhı kitap. Kitapta ǵulama jazýshy Muhtar Áýezov atyndaǵy pedagogıkalyq kolledjdiń ótken tarıhy men búgingi damý jaǵdaıy, jetistikteri baıandalady” dep jazdy ol.
Sondaı-aq, ol kitapta bilim ordasynyń tarıhy jaıly, naqtyraq aıtqanda qazaqtyń tulǵalary tuńǵysh bilim alǵany jaıly jazylǵanyn jetkizdi.
“Túsingen adamǵa bul kitap - tunyp turǵan tarıh. Mysaly, osy bilim ordasynda elimizdiń uly tulǵalary Qanysh Sátbaev, Muhtar Áýezov, Júsipbek Aımaýytov, Álkeı Marǵulan, Ahat Shákárimuly, Sháken Aımanov, Ázilhan Nurshaıyqov taǵy basqalardyń bilim alǵanyn nemese dáris oqyǵanyn jurttyń bári bile bermeıdi.
Bul kitapta sol uly tulǵalardyń óz qolymen jazylǵan ómirbaıandary, tarıhı fotolary, mektep bitirgen kezde alǵan attestattary, tipti, alǵan baǵalaryna deıin berilgen” dep qosty ol.
