قازاقستاندىق جۋرناليست دانيار مولدابەكوۆ وسىدان ەكى جىل بۇرىن ەلدە بولعان قاڭتارداعى تارتىپسىزدىكتەر تۋرالى جازعان كىتابىن شىعارا الماي قالدى، دەپ حابارلايدى “ادىرنا” ۇلتتىق پورتالى.
بۇل تۋرالى ول ءوزىنىڭ Telegram-كانالىندا حابارلادى.
«قانتار تۋرالى كىتابىمدى شىعارۋدى قولعا العان باسپا بارلىق باسپاحانالاردىڭ ونى باسىپ شىعارۋدان باس تارتقانىن حابارلادى. الدىن الا تاپسىرىس بەرگەندەردىڭ جاقىن ارادا اقشاسىن قايتارىلادى. كىتاپتى مىندەتتى تۇردە شىعارامىن، بىراق ەندى قاشان، قايدا جانە قالاي بولاتىنىن ويلانۋ كەرەك»، - دەلىنگەن حابارلامادا.
مولدابەكوۆتىڭ ايتۋىنشا، ەكى جىل بۇرىن تەرەزەدەن اتىلعان وقتىڭ داۋسى ەستىلىپ، الاڭداعى جەرلەستەرىمىزدىڭ مۇردەسى جاتقاندا “قاڭتار جىلى” كىتابىن جازا باستاعان. كۇنى كەشەگە دەيىن قولجازبا باسپاحانادا بولعان، الايدا، جۋرناليست ايتقانداي، كىتاپ باسىلىپ شىقپاس بۇرىن ونىڭ مازمۇنىمەن تانىسقىسى كەلگەن قۇقىق قورعاۋ ورگاندارىنىڭ وكىلدەرى كەلگەن.
“ولار مەنەن وقۋعا رۇقسات بەرۋىمدى سۇرايدى. مەن ولارعا بەرمەڭدەر دەدىم”، - دەدى ول.
مولدابەكوۆ «رەسپۋبليكاعا» بەرگەن تۇسىنىكتەمەسىندە ونىڭ كىتابىنا بۇرىن دا قاۋىپسىزدىك كۇشتەرى قىزىعۋشىلىق تانىتقانىن ايتتى.
«ۇلتتىق قاۋىپسىزدىك كوميتەتىنەن دەگەن ادامدار باسپاعا حابارلاسىپ، مەنىمەن بايلانىسۋدى سۇراعان. بۇل كىتاپ تۋرالى الەۋمەتتىك جەلىدە جازىپ، مۇقاباسىن كورسەتكەن كۇنىم ەدى. سونداي-اق كىتاپتى تانىستىرۋ ءۇشىن باسقا جەر ىزدەۋگە تۋرا كەلدى، ويتكەنى بۇرىنعى تانىستىرىلىم ءوتۋى ءتيىس ورىن باس تارتتى»، - دەيدى جۋرناليست.
2022 جىلدىڭ قاڭتار ايىنىڭ باسىندا قازاقستاندا گاز باعاسىنىڭ ەكى ەسە وسۋىنە قارسى نارازىلىق شەرۋلەرى باستالىپ، ول جاپپاي تارتىپسىزدىكتەرگە ۇلاسقان بولاتىن. وسىدان كەيىن پرەزيدەنت قاسىم-جومارت توقاەۆ توڭكەرىس جاساۋ ارەكەتىن جاريالاپ، ۇقشۇ-دان كومەك سۇرادى. 7 قاڭتاردا جاعداي تۇراقتاندى، 19 قاڭتاردا بۇكىل ەلدە توتەنشە جاعداي جويىلدى. تارتىپسىزدىك سالدارىنان قازا تاپقانداردىڭ رەسمي تىزىمىندە 238 ادامنىڭ اتى-ءجونى بار. وسى تاقىرىپ بويىنشا بارلىق ماتەريالدار وسىندا جيناقتالعان.
“ادىرنا” ۇلتتىق پورتالى
