قازتالوۆ اۋدانىنىڭ ورتالىعىنا قاشىق ورنالاسقان قايىڭدى اۋىلىندا مادەنيەت ءۇيىنىڭ عيماراتى پايدالانۋعا بەرىلدى. مادەنيەت ءۇيىنىڭ جالپى اۋدانى 3600 شارشى مەتردى قۇرايدى. وسى ۋاقىتقا دەيىن اۋدان اكىمىنىڭ حالىقپەن كەزدەسۋىندە قايىڭدىلىقتار اۋىلعا جاڭا مادەنيەت ءۇيىنىڭ قاجەت ەكەندىگى جونىندە ماسەلەنى ءجيى كوتەرىپ ءجۇردى. حالىقتىڭ تالاپ-تىلەگى ورىندالىپ، زامان تالابىنا ساي رۋحاني وردا ەسىگىن ايقارا اشتى.
مادەنيەت ءۇيىنىڭ اشىلۋ سالتاناتىنا قاتىسقان ءوڭىر باسشىسى ناريمان تورەعاليۇلى اۋىل حالقىن جاڭا نىساننىڭ اشىلۋىمەن قۇتتىقتاپ، جىلى لەبىزىن ءبىلدىردى.
— وبلىسىمىزدا بىرقاتار ينفراقۇرىلىمدىق جوبالار مەن مەملەكەتتىك باعدارلامالار جۇزەگە اسۋدا. وبلىس ورتالىعى مەن اۋدانداردا ءبىلىم وردالارى مەن مادەنيەت ۇيلەرىنىڭ قۇرىلىستارى جۇرگىزىلۋدە. قايىڭدى اۋىلىنداعى مادەنيەت ءۇيىنىڭ جوباسىن وزگە دە اۋىلدار مەن ەلدى مەكەندەردە جۇزەگە اسىرامىز. الداعى ۋاقىتتا كازتالوۆ-قايىڭدى باعىتىنداعى جول قۇرىلىسى ماسەلەسىن دە قاراستىراتىن بولامىز. مادەنيەت ۇيىنەن ەلگە بەلگىلى ونەر مايتالماندارى قانات قاعادى دەگەن سەنىمدەمىن، — دەدى وبلىس اكىمى.
«اۋىل — ەل بەسىگى» باعدارلاماسى اياسىندا سالىنعان مادەنيەت وشاعىنىڭ قۇرىلىس جۇمىستارىن «دارەن ستروي سەرۆيس» جشس جۇرگىزدى. 150 ورىندىق كورەرمەن زالى، اۋىلدىق كىتاپحانا ورنالاسقان عيماراتتا 5 ادام جۇمىسپەن قاستىلىپ وتىر. قاۋىپسىزدىك ماسەلەسى دە نازاردان تىس قالماي، ىشكى جانە سىرتقى بەينەباقىلاۋ كامەرالارى ورناتىلعان.
نىساننىڭ سالتاناتتى اشىلۋىندا ءسوز العان اۋىل تۇرعىنى، سالا ارداگەرى توقجان وراز جەرگىلىكتى اتقارۋشى ورگاندارعا حالىق اتىنان العىسىن ايتتى.
— بۇگىن اۋىلىمىزدا كوپتەن كۇتكەن قۋانىش. اق تۇيەنىڭ قارنى جارىلىپ، مادەنيەت ءۇيى حالىققا ەسىگىن ايقارا اشقالى وتىر. «كوپ تىلەگى كول» دەيدى دانا حالقىمىز. اۋىلعا مادەنيەت ءۇيىنىڭ قاجەت ەكەنى ءجيى كوتەرىلىپ جۇرگەن ماسەلە ەدى. بۇگىن جاڭا مادەنيەت وشاعىنىڭ اشىلۋ سالتاناتىنا كۋا بولىپ وتىرمىز. پرەزيدەنتىمىزدىڭ ءار باستاماسىن مۇقيات قاراپ وتىرامىز. سوڭعى جولداۋىندا اتاپ وتكەن ەلىمىزدى دامىتۋداعى باستامالارىن تولىعىمەن قولدايمىز. اتوم ەلەكتر ستانتسياسىن سالۋ تاۋەلسىز مەملەكەت رەتىندە دامۋدىڭ بىردەن ءبىر جولى دەپ بىلەمىز. اۋىلىمىزدا مادەنيەت وشاعى بوي كوتەرىپ جاڭا تۇرعىن ۇيلەر سالىنۋدا، الداعى ۋاقىتتا اۋىلدىڭ ىشكى جولدارى دا جوندەلەتىن بولادى. حالىقتىڭ ۇنىنە قۇلاق تۇرگەن جەرگىلىكتى اتقارۋشى ورگاندارعا اۋىل حالقى اتىنان العىسىمدى بىلدىرەمىن! ۇلتىمىزدىڭ رۋحىنا قالقان بولار مادەنيەتىمىز اسقاقتاي بەرسىن، — دەگەن اۋىل تۇرعىنى وبلىس باسشىلىعىنا كازتالوۆ اۋىلىنا قاتىنايتىن تىكە جولدىڭ سالىنۋىنا ىقپال ەتۋىن سۇرادى.
مادەنيەت وشاعىنىڭ لەنتاسىن وبلىس اكىمى ناريمان تورەعاليەۆ، اۋداندىق ءماسليحات توراعاسى سارسەنباي مولداشەۆ، مادەنيەت سالاسىنىڭ ارداگەرى سانسىزباي نابيەۆ قيدى. جاڭا مادەنيەت وشاعىنا وبلىس اكىمىنىڭ اتىنان 3 كونديتسيونەردىڭ سەرتيفيكاتى تابىستالدى.
