باتىس قازاقستان وبلىسى قازتالوۆ اۋدانىنىڭ اۋماعىنا ۇشقىشسىز ۇشاتىن اپپاراتتىڭ بولشەكتەرى قۇلاعانى تۋرالى اقپارات تارادى. وقيعا 27 ناۋرىز كۇنى كەشكى ۋاقىتتا كوكتەرەك اۋىلدىق وكرۋگى ماڭىندا بولعان، دەپ حابارلايدى “ادىرنا” ۇلتتىق پورتالى.
بقو پوليتسيا دەپارتامەنتىنىڭ ءباسپاسوز قىزمەتىنىڭ حابارلاۋىنشا، اپپاراتتىڭ بولشەكتەرى سارالجىن (كيروۆ) اۋىلىنان شامامەن 10 شاقىرىم قاشىقتىقتا تابىلعان. قازىرگى ۋاقىتتا ۋاكىلەتتى ورگاندار وقيعانىڭ ءمان-جايىن انىقتاۋ ماقساتىندا تەكسەرۋ جۇمىستارىن جۇرگىزىپ جاتىر.
“نىسان ەلدى مەكەننەن الىس اۋماقتا تابىلدى. قازىرگى كەزدە ءتيىستى قىزمەتتەرمەن بىرلەسىپ تەكسەرۋ ءىس-شارالارى جالعاسۋدا”، – دەپ مالىمدەدى ۆەدومستۆو وكىلدەرى.
ايتا كەتەيىك، بۇل باتىس قازاقستان وبلىسىندا تىركەلىپ وتىرعان العاشقى جاعداي ەمەس. بۇعان دەيىن وسىنداي وقيعالار بوكەي ورداسى اۋدانى ۇيالى، تاسقالا اۋدانى اتامەكەن، جانىبەك اۋدانى ۇزىنكول جانە قامىستى اۋىلدارى ماڭىندا دا بولعان.
قۇزىرلى ورگاندار وقيعانىڭ سەبەپتەرىن انىقتاپ، قوسىمشا اقپارات بەرۋگە ۋادە ەتتى.
