كازتالوۆ اۋدانىندا «قالادان-اۋىلعا» باعدارلاماسى قارقىندى جۇرگىزىلۋدە. وڭىرلىك باعدارلاما اياسىندا بولاشاق اۋىلدىق وكرۋگىنىڭ جاڭاتاڭ جانە كوپكۇتىر ەلدى مەكەندەرىنەن 4 وتباسى جاڭا باسپاناعا يە بولدى. باسپانالى بولعان وتباسىلاردى وبلىس اكىمى ناريمان تورەعاليەۆ قۇتتىقتاپ، تۇرعىن ءۇي كىلتىن سالتاناتتى تۇردە تابىستادى.
— وڭىرىمىزدە مەملەكەت باسشىسىنىڭ تاپسىرماسىمەن بىرقاتار ينفراقۇرىلىمدىق جوبالار، مەملەكەتتىك باعدارلامالار جۇزەگە اسۋدا. ونىڭ سىرتىندا وڭىرلىك باعدارلامالارىمىزدى دا ىسكە قوسىپ جاتىرمىز. سونىڭ ىشىندە «قالادان اۋىلعا» باعدارلاماسى جاس وتباسىلار ءۇشىن، حالىقتىڭ ءال-اۋقاتىن ارتتىرۋ جانە اۋىلدار مەن ەلدى مەكەندەردى دامىتۋعا سەپ بولادى. باعدارلاما اياسىندا كازتالوۆ اۋدانىنا كوشىپ كەلگەن جاس وتباسىلاردى قۇتتىقتايمىن! شاڭىراقتارىڭىز بەرەكەلى بولىپ، قۋانىش پەن شاتتىققا تولسىن!، — دەدى وبلىس اكىمى.
اۋداندا جوبا ىسكە اسىرىلاتىن اۋىلداردا 16 تۇرعىن ءۇي ساتىپ الىنۋدا. بۇگىنگى كۇنى، اۋىلدارعا قۇرامىندا 78 ادام بار (سونىڭ ىشىندە 50 بالا) 14 وتباسى كوشىپ كەلىپ، ۋاقىتشا ۇيلەرگە ورنالاستىرىلدى. بارلىق وتباسىلار تۇراقتى جۇمىسپەن قامتىلىپ، مەكتەپ جاسىنداعى 24 بالا مەكتەپكە، 25 بالا مەكتەپكە دەيىنگى ۇيىمدارعا ورنالاستى.
جاڭاتاڭ ەلدى مەكەنىندەگى سالتاناتتى ءىس-شارادا سيسەنوۆتار مەن سۇندەتوۆتەر وتباسى (جاڭاتاڭ ەلدى مەكەنى), جاكۋپوۆتار مەن ابدراحمانوۆتار (كوپكۇتىر ەلدى مەكەنى) وتباسى جاڭا باسپاناعا يە بولدى. باعدارلامانىڭ يگىلىگىن كورىپ وتىرعان سيسەنوۆتار جانۇياسىنىڭ وتاناسى شىناراي تورەمۇراتوۆا قۋانىشىمەن ءبولىسىپ، وبلىس باسشىلىعىنا ريزاشىلىعىن ءبىلدىردى.
— وبلىس اكىمى ناريمان تورەعاليۇلىنىڭ باستاماسىمەن جۇزەگە اسىپ جاتىرعان جوبانىڭ ناقتى جەمىسىن بۇگىنگى كىلت الىپ جاتىرعان جاس وتباسىلارمەن بىرگە ءبىزدىڭ وتباسى دا كورۋدە. سول ءۇشىن وبلىس باسشىلىعىنا بارشا «قالادان-اۋىلعا» باعدارلاماسىنا قاتىسۋشى وتباسىلاردىڭ اتىنان شىنايى ريزاشىلىعىمىزدى بىلدىرەمىز. ءبىز وسى باعدارلاما ارقىلى كازتالوۆ اۋدانىنىڭ جاڭاتاڭ اۋىلىنا اقپان ايىنىڭ باسىندا كوشىپ كەلگەن بولاتىنبىز. قالادان كوشىپ كەلۋ بارىسىندا جەرگىلىكتى اتقارۋشى ورگاندار بارلىق مۇمكىندىكتى قاراستىرىپ، ۋاقىتشا تۇرعىن ۇيمەن جانە سيىر، قوي مەن ەشكى مالدارىمەن قامتاماسىز ەتتى. قازىر سول ءتورت تۇلىكتىڭ يگىلىگىن كورىپ وتىرمىز. جولداسىم ايات ەكەۋىمىزدى تۇراقتى جۇمىسقا دا ورنالاستىردى. جولداسىم مەردىگەرمەن بىرگە وسى ءۇيدىڭ سالىنۋىنا اتسالىستى، ءبىزدىڭ وتباسىمىز ءۇشىن بۇل ءۇي وتە ىستىق. وزەگىنەن تەپپەي، قۇشاق جايا قارسى العان اۋىل حالقىنا دا العىسىمىز شەكسىز!، — دەدى ول.
سالتاناتتى ءىس-شارادا جاس وتباسىلارعا تۇرعىن ءۇي كىلتىمەني قاتار، ەكى باس ءىرى قارا جانە 10 باس يقوي مەن ەشكىنىڭ سەرتيفيكاتى تابىستالدى. ال اۋىلدىڭ باتاگوي اقساقالى مۋسين ەسماعۇل جاس وتباسىلارعا اق باتاسىن بەردى.
ايتا كەتەيىك، قوس ەلدى مەكەندە تۇرعىن ءۇي قۇرىلىستارىن جەرلەستەرىمىز، جەكە ينۆەستورلار مەيىربەك فاتيحوۆ جانە امانجول كەرەەۆ جۇرگىزدى.
