قاراعاندىدا ەكى جۇكتى ايەل ەسىرتكى ساۋداسىمەن اينالىسقان. ولار سينتەتيكالىق ەسىرتكىنى كولىكپەن تاسىمالداعان، - دەپ حابارلايدى “ادىرنا” ۇلتتىق پورتالى.
قاراعاندى وبلىسىنىڭ پوليتسيا دەپارتامەنتىنىڭ مالىمەتىنشە، ەسىرتكى تاسىمالداۋشىلاردىڭ ءبىرى قاراعاندىدان شامامەن 20 شاقىرىم جەردە ۇستالدى. ونىڭ كولىگىنىڭ جۇكسالعىشىنان ەكى كەلىدەن استام سينتەتيكالىق ەسىرتكى تابىلعان. تەرگەۋ بارىسىندا ايەل تىيىم سالىنعان زاتتاردى ەلىمىزدىڭ وڭتۇستىك وبلىستارىنان اكەلگەنىن مويىندادى. پوليتسيا ەكىنشى كۋرەردى ءدال قالانىڭ ورتاسىنان ۇستادى. ونى ءتىنتۋ بارىسىندا سينتەتيكانىڭ ۇلكەن پارتياسى تابىلدى.
"ەكەۋى دە اۋقاتتى وتباسىنان شىققان، تابىسى بار. بىرەۋىنىڭ بالالارى كوپ. جاعدايلارىنا قاراماستان، ولار "جەڭىل" اقشاعا جەلىگىپ، اقىرى باس بوستاندىعىنان ايىرىلدى. ولار سوتتالىپ، 10 جىلعا دەيىن قاماۋعا الىندى” دەلىنگەن پد مالىمدەمەسىندە.
بيىل جىل باسىنان بەرى ەسىرتكى تاراتۋمەن اينالىسقان 53 ادام ۇستالعانى ايتىلدى.
سونىمەن قاتار، جىل باسىنان بەرى وبلىستا اقپاراتتىق رەسۋرستار ارقىلى ەسىرتكى ساتۋ بويىنشا 71 قىلمىستىق ءىس قوزعالسا، ونىڭ 40-ى گراففيتي ارقىلى جارنامالاۋعا قاتىستى بولعانى اتالدى. پوليتسيا قابىرعاداعى مۇنداي جارنامامەن بەلسەندى كۇرەسىپ جاتىر: جىل باسىنان بەرى 10 مىڭعا جۋىق ەسىرتكى گراففيتيى جويىلدى.
«13 قىركۇيەكتە ءبىز ەسىرتكىنىڭ تارالۋىنا قارسى كۇرەس جانە سالاۋاتتى ءومىر سالتىن ناسيحاتتاۋعا باعىتتالعان اۋقىمدى ءىس-شارا وتكىزدىك، وعان مىڭنان استام ادام قاتىستى، ءتورت مىڭنان استام ەسىرتكى گراففيتيى بويالدى، ءۇش مىڭنان استام ەسكەرتپەلەر جانە بۋكلەتتەر تاراتىلدى، گراففيتي ارقىلى ەسىرتكىنى جارنامالاۋدىڭ قانداي ءتۇرى بولماسىن 3 جىلدان 6 جىلعا دەيىن باس بوستاندىعىنان ايىرۋ تۇرىندەگى قىلمىستىق جاۋاپكەرشىلىككە تارتىلاتىنىن ەسكە سالامىز»، - دەپ تولىقتىردى پوليتسيانىڭ ءباسپاسوز قىزمەتى.
بۇعان دەيىن، قازاقستاندا ىشكى ىستەر مينيسترلىگى جانىنان ەسىرتكى قىلمىسىنا قارسى كۇرەس كوميتەتى قۇرىلعانى حابارلانعان بولاتىن. ەسىرتكى قىلمىسىمەن كۇرەس جونىندەگى قازىرگى ءبولىم جاڭا باسقارما بولىپ وزگەرتىلدى.
