شىمكەنت پوليتسەيلەرى ەسىرتكى زەرتحاناسىن جويدى، دەپ حابارلايدى «ادىرنا» ۇلتتىق پورتالى.
پوليتسيا قىزمەتكەرلەرىنىڭ مالىمەتىنشە, ناشاقورلىققا جانە ەسىرتكى بيزنەسىنە قارسى كۇرەس جونىندەگى كەشەندى جوسپار اياسىندا ارنايى ءىس-شارالاردى وتكىزۋ كەزىندە قالالىق پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەرگىلىكتى 23 جاستاعى تۇرعىننىڭ باسقارۋىنداعى Toyota ساmrۋ اۆتوكولىگىن ۇستاعان.
تەكسەرۋ بارىسىندا كولىكتىڭ سالونىنان جالپى سالماعى 150 گراممنان اساتىن ەسىرتكى تابىلىپ، تاركىلەندى. ۇستالعان ادامنىڭ پاتەرىن تەكسەرۋ كەزىندە جەدەل ۋاكىلدەر ەلەكتروندى تارازىلاردى، سينتەتيكالىق ەسىرتكى جاساۋعا ارنالعان پسيحوتروپتىق جانە وسىمدىك زاتتارى سالىنعان پاكەتتەردى، حيميالىق زاتتارمەن جۇمىس ىستەۋگە ارنالعان رەسپيراتور ماسكاسىن، ەسىرتكى قۇرالدارىن ارالاستىرۋعا ارنالعان كونتەينەرلەردى جانە قىسىمعا ارنالعان جابدىقتى تاپتى. سونىمەن قاتار ەسىرتكىنى وراۋعا قاجەتتى پوليەتيلەندى پاكەتتەر، يزولەنتالار، ىلعال وتكىزبەيتىن قۇرىلعىلار مەن ماگنيتتەر تابىلدى، – دەلىنگەن حابارلامادا.
ساراپتاما قورىتىندىسىنا سايكەس، تاركىلەنگەن ەسىرتكى زاتتارىنىڭ سالماعى – شامامەن 800 گرامم، بۇل اسا ءىرى مولشەرگە جاتادى. بەلگىلى بولعانداي، كۇدىكتى تامىزدا ينتەرنەت ارقىلى ەسىرتكىنى وراۋشى جانە ءوندىرۋشى بولىپ جۇمىسقا ورنالاسقان. سودان كەيىن ول ەليتالىق تۇرعىن ءۇي كەشەندەرىنىڭ بىرىندە پاتەر جالداپ، سول جەردە مەسسەندجەر ارقىلى الىنعان نۇسقاۋلاردى ورىنداي وتىرىپ، ساتۋ ماقساتىندا كۇشتى ەسىرتكىلىك اسەرى بار «سپايس» قوسپاسىن دايىنداعان.
قازىر ەر ادام تەرگەۋ يزولياتورىندا قاماۋدا. اتالعان جايتقا قاتىستى قر قك-ءنىڭ 297-بابى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
«ادىرنا» ۇلتتىق پورتالى
