پەتروپاۆلدا ءۇش تۋىسىن پىشاقتاپ، تاعى ەكەۋىنىڭ ومىرىنە قاستاندىق جاساعان 30 جاستاعى ەر ادامعا سوت ۇكىمى شىقتى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
سولتۇستىك قازاقستان وبلىسىنداعى قىلمىستىق ىستەر بويىنشا مامانداندىرىلعان اۋدانارالىق سوت ءبىر ءۇيلى جاننىڭ قانىن موينىنا جۇكتەگەن قانىشەرگە ۇكىم شىعاردى. «ءولتىرۋ» جانە «ومىرگە قاستاندىق جاساۋ» باپتارى بويىنشا ايىپ تاعىلعان 30 جاستاعى بەكبولات عابدۋللين ءومىر بويىنا باس بوستاندىعىنان ايىرىلدى.
قايعىلى جاعداي ناۋرىز ايىندا پەتروپاۆلدا بولدى. تەرگەۋ مالىمەتتەرىنە سايكەس، الماتىلىق بەكبولات عابدۋللين ناۋرىزدىڭ 9-ى نۇر-سۇلتان قالاسىنان پەتروپاۆلعا تۋىستارىنىڭ ۇيىنە قوناققا كەلەدى. ەر ادام ەش جەردە جۇمىس ىستەمەگەن. قۇمار ويىنعا سالىنىپ، قارىزعا بەلشەدەن باتقان ەكەن.
«جابىرلەنۋشىلەردىڭ ايتۋىنشا، عابدۋللين ءۇي ءىشىن ارالاپ، ۇيدەگى قۇندى زاتتارعا قاتىستى قىزىعۋشىلىق بىلدىرگەن. وسىدان-اق ونىڭ تۋىستارىن توناماق بولعانى بايقالادى. ءۇي يەلەرىنە پىشاقپەن ۇمتىلعاندا دا ماعان اقشا كەرەك دەپ ايقايلاعان»، - دەيدى ءىستى قاراعان سۋديا سەرگەي ۆيكتورەنكو.
ناۋرىزدىڭ 10-ى كۇنى عابدۋللين اراققا سىلقيا تويىپ كەلىپ، ساعات 02.30 شاماسىندا شابۋىلىن باستاعان. الدىمەن نەمەرە ءىنىسىن تەمەكى شەگەيىك دەگەن سىلتاۋمەن شاقىرىپ الىپ، ارقاسىنا بىرنەشە رەت پىشاق سۇققان. جىگىت كومەككە شاقىرۋ ءۇشىن ەكىنشى قاباتقا اجەسىنىڭ بولمەسىنە جۇگىرەدى. ونداعى تەلەفون ارقىلى قاراما-قارسى تۇراتىن تۋىستارىنا تەلەفون سوعىپ، ەسىنەن تانىپ قالادى. عابدۋللين ونىڭ ارتىنان جۇگىرىپ كىرىپ، ۇيقىداعى قاريانى دا پىشاقتايدى. كەيىن 48 جاستاعى تاتەسىنە دە پىشاق سۇعادى.
«سوتتالۋشىنىڭ جاساعان قىلمىسى وتە اۋىر بولعاندىقتان سوت ونى قوعام ءۇشىن قاۋىپتى دەپ تانىدى. سول سەبەپتى عابدۋللين ءومىر بويىنا باس بوستاندىعىنان ايىرىلدى. جازاسىن قىلمىستىق-اتقارۋ جۇيەسىنىڭ توتەنشە قاۋىپسىزدىك مەكەمەسىندە وتەيدى»، - دەيدى سەرگەي ۆيكتورەنكو.
سونداي-اق عابدۋلليننەن جابىرلەنۋشىلەردىڭ پايداسىنا 14,8 ملن تەڭگەدەن استام ماتەريالدىق جانە مورالدىق شىعىن ءوندىرىلدى.
"ادىرنا" ۇلتتىق پورتالى
