Aqtóbe oblysy Temir aýdany Qaıyńdy aýyldyq okrýgi ákimdigi "Qaıyńdydaǵy saıabaqty sýarý jáne kútip ustaý qyzmeti" degen taqyryppen tender jarııalap, bıýdjetten 2 232 143 teńge qarjy bóldi, dep habarlaıdy Adyrna ulttyq portaly satypalu.gov.kz saıtyna silteme jasap.
Memlekettik satyp alý týraly habarlama 13 qyrkúıek kúni jarııalanǵan. Tender jeńimpazy 20 qyrkúıek kúni anyqtalady. Tehnıkalyq sıpattamada memlekettik satyp alýdy júzege asyrýshy kompanııa saıabaqtaǵy aǵash kóshetterine tamshylatyp sýarý júıesin ornatýy kerektigi jazylǵan. Tapsyrys berýshi tarap tamshylatyp sýarýdyń artyqshylyqtaryna da toqtalyp, saıabaqtaǵy kóshetter birkelki sý ishetinin, kúnge kúıip, topyraǵy kerish bolyp qatyp qalmaıtynyn, t.b máselelerdi tizip shyǵypty. Otyrǵyzylǵan kóshetterdi sýarý tapsyrys berýshiniń jaýapty mamanynyń qatań baqylaýymen júzege asatynyn da eskertken. Tapsyrysty oryndaýshy kompanııa bekitilgen keste boıynsha arnaıy ydystardy sýǵa toltyrý arqyly aptasyna 3 ret saıabaqty sýaryp turýǵa mindetti. Sondaı-aq tehnıkalyq sıpattamada qurylys jumystarynyń barlyq túri, sonyń ishinde qorshaýlar men sýarý júıelerine arnalǵan shyǵys materıaldary jetkizýshiniń esebinen júzege asyrylatyny, syıymdylyǵy keminde 10 m3 sý tasyǵysh bolýy qajettigi, jumysty kemi 2 adam júrgizýi kerektigi kórsetilgen.
2024 jyldyń aıaqtalýyna bar bolǵany 3 aı ýaqyt qaldy. Sonda Qaıyńdy aýyldyq okrýgi ákimdigi saıabaqqa jańadan egilgen kóshetterdi qaqaǵan sýyqta sýarmaq pa? Saıabaqty sýarýǵa kóktemde, ıa jazda 2 232 143 teńge bólinip jatsa, túsinýge bolar. Qyrkúıektiń aıaǵynda saıabaqty sýǵarýǵa qazyna qarjysynan aqsha bólý aqylǵa sııa ma?
Bul suraqtardy tıisti mekemege joldadyq. Olardan jetken jaýapty aldaǵy ýaqytta jarııalaıtyn bolamyz.
Abaı Asyl
“Adyrna” ulttyq portaly
