Aqtöbe oblysy Temır audany Qaiyŋdy auyldyq okrugı äkımdıgı "Qaiyŋdydaǧy saiabaqty suaru jäne kütıp ūstau qyzmetı" degen taqyryppen tender jariialap, biudjetten 2 232 143 teŋge qarjy böldı, dep habarlaidy Adyrna ūlttyq portaly satypalu.gov.kz saityna sılteme jasap.
Memlekettık satyp alu turaly habarlama 13 qyrküiek künı jariialanǧan. Tender jeŋımpazy 20 qyrküiek künı anyqtalady. Tehnikalyq sipattamada memlekettık satyp aludy jüzege asyruşy kompaniia saiabaqtaǧy aǧaş köşetterıne tamşylatyp suaru jüiesın ornatuy kerektıgı jazylǧan. Tapsyrys beruşı tarap tamşylatyp suarudyŋ artyqşylyqtaryna da toqtalyp, saiabaqtaǧy köşetter bırkelkı su ışetının, künge küiıp, topyraǧy kerış bolyp qatyp qalmaitynyn, t.b mäselelerdı tızıp şyǧypty. Otyrǧyzylǧan köşetterdı suaru tapsyrys beruşınıŋ jauapty mamanynyŋ qataŋ baqylauymen jüzege asatynyn da eskertken. Tapsyrysty oryndauşy kompaniia bekıtılgen keste boiynşa arnaiy ydystardy suǧa toltyru arqyly aptasyna 3 ret saiabaqty suaryp tūruǧa mındettı. Sondai-aq tehnikalyq sipattamada qūrylys jūmystarynyŋ barlyq türı, sonyŋ ışınde qorşaular men suaru jüielerıne arnalǧan şyǧys materialdary jetkızuşınıŋ esebınen jüzege asyrylatyny, syiymdylyǧy kemınde 10 m3 su tasyǧyş boluy qajettıgı, jūmysty kemı 2 adam jürgızuı kerektıgı körsetılgen.
2024 jyldyŋ aiaqtaluyna bar bolǧany 3 ai uaqyt qaldy. Sonda Qaiyŋdy auyldyq okrugı äkımdıgı saiabaqqa jaŋadan egılgen köşetterdı qaqaǧan suyqta suarmaq pa? Saiabaqty suaruǧa köktemde, ia jazda 2 232 143 teŋge bölınıp jatsa, tüsınuge bolar. Qyrküiektıŋ aiaǧynda saiabaqty suǧaruǧa qazyna qarjysynan aqşa bölu aqylǧa siia ma?
Būl sūraqtardy tiıstı mekemege joldadyq. Olardan jetken jauapty aldaǧy uaqytta jariialaityn bolamyz.
Abai Asyl
“Adyrna” ūlttyq portaly
