قازاقستاندا ەلەكتر ەنەرگياسىنىڭ 70% كومىر ستانتسيالارىندا وندىرىلەدى، ولاردىڭ توزۋ دەڭگەيى وتە جوعارى. بۇل تۋرالى قر ەنەرگەتيكا مينيسترلىگىنىڭ اتوم ەنەرگەتيكاسى جانە ونەركاسىپ دەپارتامەنتى ديرەكتورىنىڭ ورىنباسارى گۇلميرا مۋرسالوۆا استانادا ءوتىپ جاتقان قازاقستاندا اتوم ەلەكتر ستانتسياسىن سالۋ ماسەلەسى بويىنشا كوپشىلىك تالقىلاۋىندا مالىمدەدى.
ونىڭ ايتۋىنشا، بۇل ستانتسيالاردىڭ كەيبىرى كەلەسى 10 جىل ىشىندە پايدالانۋدان شىعارىلۋى كەرەك. بۇل رەتتە ەلىمىزدە ەلەكتر ەنەرگياسىن تۇتىنۋ كولەمى جىلدان جىلعا ءوسىپ كەلەدى. بۇل سەبەپتەن 2035 جىلعا قاراي ارنايى جوسپار بەكىتىلگەن بولاتىن. بۇل جوسپار بويىنشا كەلەسى ونجىلدىقتا 26 مىڭ مۆت قۋاتتىلىعى بار ستانتسيالار ىسكە قوسىلادى. ارينە، ونىڭ ىشىندە قولدانىستاعى ستانتسيالاردى جاڭارتۋ جۇمىستارى دا بار، جاڭادان ستانتسيالاردى سالۋ دا جوسپارلانعان.
گ.مۋرسالوۆا قازاقستاندا جاڭارتىلعان ەنەرگيا كوزدەرى وتە جاقسى دامىتىلىپ جاتقانىن اتاپ ءوتتى. جاڭادان جەل ەلەكتر ستانتسيالارى، كۇن ەلەكتر ستانتسيالارى سالىنادى. بۇكىل 26 مىڭ مۆت قۋاتتىلىقتىڭ 10 مىڭ مۆت جۋىق جەك ىسكە قوسىلادى.
ونىڭ ايتۋىنشا، قازىرگى ۋاقىتتا كومىرمەن جۇمىس ىستەيتىن ستانتسيالارعا قارجى تارتۋ قيىن بولىپ تۇر. سەبەبى كومىرمەن جۇمىس ىستەيتىن ستانتسيالاردىڭ كومىرقىشقىل گازدارىنىڭ شىعىندارى وتە جوعارى.
“سول سەبەپتەن رەفەرەندۋمنىڭ ناتيجەسى وڭ بولعان جاعدايدا عانا ءبىز ۇلكەن قۋاتتى ەكى رەاكتورى بار ءبىر اتوم ەلەكتر ستانتسياسىن قاراستىرامىز. سەبەبى اەس جاسىل ەنەرگەتيكاعا جاتادى. كومىرقىشقىل گازدارىنىڭ شىعىندارى 0”، - دەدى گ. مۋرسالوۆا.
