Qazaqstanda elektr energııasynyń 70% kómir stanııalarynda óndiriledi, olardyń tozý deńgeıi óte joǵary. Bul týraly QR Energetıka mınıstrliginiń Atom energetıkasy jáne ónerkásip departamenti dırektorynyń orynbasary Gúlmıra Mýrsalova Astanada ótip jatqan Qazaqstanda atom elektr stanııasyn salý máselesi boıynsha kópshilik talqylaýynda málimdedi.
Onyń aıtýynsha, bul stanııalardyń keıbiri kelesi 10 jyl ishinde paıdalanýdan shyǵarylýy kerek. Bul rette elimizde elektr energııasyn tutyný kólemi jyldan jylǵa ósip keledi. Bul sebepten 2035 jylǵa qaraı arnaıy jospar bekitilgen bolatyn. Bul jospar boıynsha kelesi onjyldyqta 26 myń MVt qýattylyǵy bar stanııalar iske qosylady. Árıne, onyń ishinde qoldanystaǵy stanııalardy jańartý jumystary da bar, jańadan stanııalardy salý da josparlanǵan.
G.Mýrsalova Qazaqstanda jańartylǵan energııa kózderi óte jaqsy damytylyp jatqanyn atap ótti. Jańadan jel elektr stanııalary, kún elektr stanııalary salynady. Búkil 26 myń MVt qýattylyqtyń 10 myń MVt jýyq JEK iske qosylady.
Onyń aıtýynsha, qazirgi ýaqytta kómirmen jumys isteıtin stanııalarǵa qarjy tartý qıyn bolyp tur. Sebebi kómirmen jumys isteıtin stanııalardyń kómirqyshqyl gazdarynyń shyǵyndary óte joǵary.
“Sol sebepten referendýmnyń nátıjesi oń bolǵan jaǵdaıda ǵana biz úlken qýatty eki reaktory bar bir atom elektr stanııasyn qarastyramyz. Sebebi AES jasyl energetıkaǵa jatady. kómirqyshqyl gazdarynyń shyǵyndary 0”, - dedi G. Mýrsalova.
