قازاقستاندا حالىق 60 پايىزعا دەيىن گازبەن قامتىلادى - ەنەرگەتيكا ءمينيسترى

2171
Adyrna.kz Telegram
فوتو: vse42.ru
فوتو: vse42.ru

بيىل حالىقتى گازداندىرۋ ۇلەسىن 60% - عا دەيىن جەتكىزۋ جوسپارلانعان. بۇل تۋرالى ەنەرگەتيكا ءمينيسترى بولات اقشولاقوۆ ۆەدومستۆونىڭ كەڭەيتىلگەن القا ماجىلىسىندە ايتتى، دەپ حابارلايدى “ادىرنا” ۇلتتىق پورتالى.

ەنەرگەتيكا ءمينيسترى بولات اقشولاقوۆ گاز تاسىمالداۋ جۇيەسىنىڭ ودان ءارى دامۋىن ايقىندايتىن گازداندىرۋدىڭ 2022 – 2030 جىلدارعا ارنالعان باس سحەماسى وزەكتىلەندىرىلگەنىن ايتتى. 

“2023 جىلى بيۋدجەتتىك ينۆەستيتسيالاردىڭ جالپى سوماسى 74 ملرد تەڭگەگە 86 جوبانى ىسكە اسىرا وتىرىپ، حالىقتى گازداندىرۋ ۇلەسىن 60% - عا دەيىن جەتكىزۋ جوسپارلانۋدا. بۇل 56 اۋىلدىق ەلدى مەكەندەگى 167 مىڭ ازاماتتى گازبەن قامتاماسىز ەتۋگە مۇمكىندىك بەرەدى. ناتيجەسىندە رەسپۋبليكانىڭ 11 ملن-نان اسا ازاماتى گازعا قول جەتكىزە الادى”، - دەدى بولات اقشولاقوۆ. 

ءمينيستردىڭ سوزىنشە، قازاقستاننىڭ سولتۇستىك جانە شىعىس وڭىرلەرىن گازداندىرۋعا قاتىستى جوسپارلار پىسىقتالىپ جاتىر.

"سارىارقا" ماگيسترالدىق گاز قۇبىرىنىڭ 2 جانە 3-كەزەڭدەرىن سالۋ جانە رەسەيمەن پاۆلودار قالاسىنا تارماقتالعان "بارناۋل-رۋبتسوۆسك-سەمەي-وسكەمەن" ماگيسترالدىق گاز قۇبىرىن سالۋ بويىنشا كەلىسسوزدەر جۇرگىزىلىپ جاتىر. سونداي-اق وسكەمەنگە تارماقتالاتىن "ومبى-پاۆلودار-سەمەي" گاز قۇبىرىن سالۋ مۇمكىندىگى قاراستىرىلۋدا. بۇل رەتتە گازدىڭ رەسۋرستىق بازاسى جانە يمپورتتىق گازدىڭ قۇنى ماسەلەسى تەجەۋشى فاكتور بولىپ تابىلادى”،  - دەدى مينيستر. 

پىكىرلەر