بۇگىن، 15 تامىز – قازاق دالاسىن انمەن تەربەتكەن ۆالس پاتشاسى ءشامشى قالداياقوۆتىڭ تۋعان كۇنى، دەپ حابارلايدى «ادىرنا» ءتىلشىسى.
بەلگىلى سازگەر 1930 جىلى 15 تامىزدا وڭتۇستىك قازاقستان وبلىسى، وتىرار اۋدانىندا دۇنيەگە كەلگەن. ونىڭ مۋزىكا ونەرىندە ورنى ەرەكشە 300-گە جۋىق ءانى بار.
«انا تۋرالى جىر»-دىڭ 25 نۇسقاسىن جازعان
«انا تۋرالى جىر» ءانىنىڭ دۇنيەگە كەلۋىنە اناسىنىڭ مەزگىلسىز دۇنيە سالۋى سەبەپ بولدى. بۇل تۋرالى ءشامشى «انام بالاسىنىڭ قىزىعىن كورە الماي، ومىردەن ءوتتى. وسى مەنىڭ جانىما قاتتى باتتى. سوندىقتان ول كىسىگە ارناپ ءبىر ءاننىڭ 25 ۆاريانتىن جازدىم. ەڭ سوڭىندا قازىر ءوزىم ورنىنداعالى تۇرعان نۇسقاسىنا توقتادىم»،-دەيدى.
«اق بانتيك» - تويعا تارتۋ ەتكەن ءان
بىردە سازگەردىڭ قاراجان ءابىلازيموۆ ەسىمدى دوسى شاڭىراق كوتەرەدى. ونىڭ جۇبايى جاڭادان مەكتەپ بىتىرگەن بالاۋسا قىز ەكەن. وسىنى ارقاۋ ەتىپ، سازگەر «اق بانتيك» ءانىن دۇنيەگە اكەلىپ، جاستاردىڭ تويىندا تارتۋ ەتەدى.
«قايىقتا»
«قايىقتا» ءانىنىڭ شىعۋ تاريحى دا قىزىق. «1957 جىلى جاس كومپوزيتورلاردىڭ اندەرىنەن رەسپۋبليكالىق بايقاۋ وتەتىن بولدى. بىردە اقىن ن. الىمقۇلوۆ ەكەۋمىز الماتىداعى گوركي پاركىنە كول جاعاسىنا دەمالۋعا باردىق. كول بەتىندە ەكەۋ – ەكەۋ جاراسقان جاستار قايىقپەن تەربەلە ءجۇزىپ ءجۇر. وسى ءبىر اسەم كورىنىس كوڭىلگە ءان ۇيالاتىپ، ومىرگە «قايىقتا» ءانى كەلدى»،- دەيدى سازگەردىڭ ءوزى.
«وسى ءانىم بولاشاقتا گيمن بولادى»
ال ەلىمىزدىڭ ءانۇرانىنا اينالعان «مەنىڭ قازاقستانىم» ءانىن جازعاندا ءشامشى 26 جاستا ەدى. العاشقى ورىنداۋشىسى - جامال وماروۆا. بۇل ءان كوپشىلىكتىڭ كوڭىلىنەن بىردەن شىعادى. ءشامشى دە ءبىر سوزىندە «وسى ءانىم بولاشاقتا گيمن بولادى» دەگەن ەكەن. 1986 جىلى جەلتوقسانشىلارعا ەرەكشە رۋح بەرگەن، ولاردىڭ ۇرانى بولعان ءان 50 جىلدان كەيىن قازاقستاننىڭ ءانۇرانىنا اينالدى.
ايتا كەتەيىك، كومپوزيتور 1965 جىلى قازاقستان كومسومول سىيلىعىن الدى. ال 1991 جىلى وعان قازاقستان رەسپۋبليكاسىنىڭ حالىق ءارتىسى قۇرمەتتى اتاعى بەرىلدى.
