Bügın, 15 tamyz – qazaq dalasyn änmen terbetken vals patşasy Şämşı Qaldaiaqovtyŋ tuǧan künı, dep habarlaidy «Adyrna» tılşısı.
Belgılı sazger 1930 jyly 15 tamyzda Oŋtüstık Qazaqstan oblysy, Otyrar audanynda düniege kelgen. Onyŋ muzyka önerınde orny erekşe 300-ge juyq änı bar.
«Ana turaly jyr»-dyŋ 25 nūsqasyn jazǧan
«Ana turaly jyr» änınıŋ düniege keluıne anasynyŋ mezgılsız dünie saluy sebep boldy. Būl turaly Şämşı «Anam balasynyŋ qyzyǧyn köre almai, ömırden öttı. Osy menıŋ janyma qatty batty. Sondyqtan ol kısıge arnap bır ännıŋ 25 variantyn jazdym. Eŋ soŋynda qazır özım ornyndaǧaly tūrǧan nūsqasyna toqtadym»,-deidı.
«Aq bantik» - toiǧa tartu etken än
Bırde sazgerdıŋ Qarajan Äbıläzimov esımdı dosy şaŋyraq köteredı. Onyŋ jūbaiy jaŋadan mektep bıtırgen balausa qyz eken. Osyny arqau etıp, sazger «Aq bantik» änın düniege äkelıp, jastardyŋ toiynda tartu etedı.
«Qaiyqta»
«Qaiyqta» änınıŋ şyǧu tarihy da qyzyq. «1957 jyly jas kompozitorlardyŋ änderınen respublikalyq baiqau ötetın boldy. Bırde aqyn N. Älımqūlov ekeumız Almatydaǧy Gorkii parkıne köl jaǧasyna demaluǧa bardyq. Köl betınde ekeu – ekeu jarasqan jastar qaiyqpen terbele jüzıp jür. Osy bır äsem körınıs köŋılge än ūialatyp, ömırge «Qaiyqta» änı keldı»,- deidı sazgerdıŋ özı.
«Osy änım bolaşaqta gimn bolady»
Al elımızdıŋ änūranyna ainalǧan «Menıŋ Qazaqstanym» änın jazǧanda Şämşı 26 jasta edı. Alǧaşqy oryndauşysy - Jamal Omarova. Būl än köpşılıktıŋ köŋılınen bırden şyǧady. Şämşı de bır sözınde «Osy änım bolaşaqta gimn bolady» degen eken. 1986 jyly jeltoqsanşylarǧa erekşe ruh bergen, olardyŋ ūrany bolǧan än 50 jyldan keiın Qazaqstannyŋ änūranyna ainaldy.
Aita keteiık, kompozitor 1965 jyly Qazaqstan Komsomol syilyǧyn aldy. Al 1991 jyly oǧan Qazaqstan Respublikasynyŋ Halyq ärtısı qūrmettı ataǧy berıldı.
