قىتايدا قازاق اندەرى اۋەلەدى. كورشى مەملەكەتتىڭ استاناسى بەيجىڭدە 30 قازاق ءانى وزگە تىلگە اۋدارىلىپ، جاڭا جيناق جارىق كوردى. ونىڭ ىشىندە اباي قۇنانباەۆ، ءشامشى قالداياقوۆ، التىنبەك قورازباەۆ جانە نۇرعيسا تىلەنديەۆتىڭ شىعارمالارى بار، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى، سىرتقى ىستەر مينيسترلىگىنىڭ حابارلاۋىنشا, بەيجىڭدە قىتاي تىلىندەگى تانىمال قازاق اندەرىنىڭ العاشقى اۋدارما جيناعىنىڭ تۇساۋكەسەرى ءوتتى. اۋدارمانىڭ اۆتورى – جازۋشى اكبار ءماجيت. قالامگەر وسىدان 2 جىل بۇرىن ابايدىڭ ولەڭدەرى مەن قارا سوزدەرىن دە قىتاي تىلىنە اۋدارعان ەدى.
«ال ءان ءسوزىن اۋدارۋ وڭاي بولعان جوق. ويتكەنى ءسوزدى ماعىناسىمەن ريتمگە كەلتىرۋ ماڭىزدى» دەيدى. اۆتور بۇل اۋدارماعا وسىدان 40 جىل بۇرىن كىرىسكەنىن ايتادى. ال قىتاي جۇرتى قازاق اندەرىن بۇرىننان ءسۇيىپ تىڭدايدى ەكەن. ماسەلەن، «قارلىعاش» 1930 جىلداردىڭ وزىندە قىتاي تىلىنە اۋدارىلعان.
بۇل 30 ءاندى مەن بىلتىرعى جىلى قازاقستان مەن قىتايدىڭ ديپلوماتيا بايلانىستىڭ 30 جىلدىعىنا ارناعام. سوندىقتان 30 ءان تالداندى. بىراق بىلتىر ىندەت جاعدايىنان ۋاقىتىندا شىعا الماي قالدى. سوندىقتان بيىل شىعىپ وتىر. بۇدان كەيىن وسىنداي مادەنيەت اۋىس-كيىس بولىپ جاتسا، ەكى ەلدىڭ حالقىنىڭ كوڭىلى توعىسىپ جاتسا، وسى ماڭگى ىرگەلەس ەلمىز، ەكى ەلدىڭ دوستىعى، بەرەكە-بىرلىگى بىتپەي، وسىلاي جالعاسا بەرسە دەيمىن، - دەيدى جازۋشى، اۋدارماشى، II دارەجەلى دوستىق وردەنىنىڭ يەگەرى اكبار ءماجيتۇلى.
اكبار ءماجيتۇلى (1954 ج. تۋعان) – قىتاي تىلىندە جازاتىن از ۇلتتارى وكىلدەرىنەن تۇراتىن قحر-دىڭ كورنەكتى جازۋشىلارىنىڭ ءبىرى. 1982 ج. باستاپ قىتاي جازۋشىلار وداعىنىڭ مۇشەسى، قحر حالىقتىق ساياسي كونسۋلتاتيۆتىك كەڭەسىنىڭ دەپۋتاتى بولعان، ءۇش رەت قحر مەملەكەتتىك سىيلىعىنىڭ يەگەرى، II دارەجەلى «دوستىق» وردەنىنىڭ كاۆالەرى، وننان استام كىتاپتىڭ، ونىڭ ىشىندە اباي شىعارمالارى اۋدارمالارىنىڭ اۆتورى بولىپ تابىلادى.
اكبار ءماجيتۇلىنىڭ اۋدارمالارى مەن شىعارماشىلىق ىزدەنىستەرىنىڭ ارقاسىندا بۇگىنگى تاڭدا قىتايلىق وقىرماندار قازاق ادەبيەتىنىڭ كورنەكتى كلاسسيكتەرى مەن تانىمال كومپوزيتورلاردىڭ شىعارمالارىمەن تانىسا الادى.
ءىس-شاراعا قوناق ەسەبىندە قىتايدىڭ مەملەكەتتىك ورگاندارى، اكادەميالىق جانە شىعارماشىلىق زيالىلارى، قازاق دياسپوراسىنىڭ وكىلدەرى، سونداي-اق قىتايلىق جانە قازاقستاندىق باق جۋرناليستەرى قاتىستى.
"ادىرنا" ۇلتتىق پورتالى
