قۇرمانعازى اتىنداعى قازاق ۇلتتىق حالىق اسپاپتار وركەسترى «الەم تانىعان اسەم توپ» اتتى كۇي كەشىن ۇسىنادى. كونتسەرتتىك باعدارلاما قازاقتىڭ ءداستۇرلى كۇيشىلىك مەكتەبىنىڭ كورنەكتى وكىلدەرى – ماحامبەت بوكەيحانوۆ، لۇقپان مۇحيتوۆ جانە قامبار مەدەتوۆتىڭ شىعارماشىلىق مۇراسىنا ارنالعان.
1934 جىلى نەگىزى قالانعان قۇرمانعازى ۇلتتىق وركەسترىنىڭ قالىپتاسۋ جولى وسىنداي دارا دارىنداردىڭ شىعارماشىلىق ەڭبەگىمەن تىعىز بايلانىستى. قازاقتىڭ ءداستۇرلى ورىنداۋشىلىق ونەرىن كاسىبي وركەسترلىك دەڭگەيگە كوتەرۋ باعىتىندا اكادەميك احمەت جۇبانوۆپەن قاتار, ماحامبەت بوكەيحانوۆ، لۇقپان مۇحيتوۆ جانە قامبار مەدەتوۆتىڭ اتقارعان قىزمەتى ەرەكشە.
كورنەكتى تۇلعالاردىڭ عۇمىر جولى
ماحامبەت بوكەيحانوۆ – قازاقتىڭ كۇي مۇراسىن جيناقتاپ، ساقتاپ، كەيىنگى ۇرپاققا جەتكىزگەن كورنەكتى كۇيشى-كومپوزيتور. ول قۇرمانعازى، داۋلەتكەرەي، الىكەي، سەيتەك سىندى حالىق كومپوزيتورلارىنىڭ شىعارمالارىن كەڭىنەن ناسيحاتتادى. بەلگىلى مۋزىكا زەرتتەۋشىسى الەكساندر زاتاەۆيچ ونىڭ ورىنداۋىنان «بايجۇما»، «بۇلبۇل»، «ويباي، بالام»، «جوشى»، «شورا» جانە باسقا دا 28 كۇيدى نوتاعا تۇسىرگەن. ماحامبەت بوكەيحانوۆ ۇلتتىق مۋزىكالىق اسپاپتاردى جەتىلدىرىپ، العاشقى حالىق اسپاپتار وركەسترىن ۇيىمداستىرۋعا زور ۇلەس قوستى.
لۇقپان مۇحيتوۆ – ءداستۇرلى كۇيشىلىك ونەردىڭ ساباقتاستىعىن ساقتاعان شەبەر ورىنداۋشى، ۇلاعاتتى ۇستاز. حالىق كومپوزيتورى مۇحيت مەرالىۇلىنىڭ نەمەرەسى رەتىندە ول جاستايىنان ۇلتتىق مۋزىكا داستۇرىمەن سۋسىنداپ، قۇرمانعازى مەن وزگە دە حالىق كۇيشىلەرىنىڭ شىعارمالارىن تەرەڭ مەڭگەردى. 1934 جىلدان باستاپ وركەستردە دومبىراشى-كونتسەرتمەيستەر بولىپ ەڭبەك ەتىپ، قازاقتىڭ اسپاپتىق مۋزىكاسىن كاسىبي ساحنادا تانىتۋعا اتسالىستى. سونىمەن قاتار الماتى مەملەكەتتىك كونسەرۆاتورياسىندا ۇستازدىق ەتىپ، نۇرعيسا تىلەنديەۆ باستاعان تالانتتى شاكىرتتەردى تاربيەلەدى.
قامبار مەدەتوۆ – دومبىرا ورىنداۋشىلىعىنىڭ وزىندىك مەكتەبىن قالىپتاستىرعان كورنەكتى كۇيشى، ۇلتتىق وركەستر ونەرىنىڭ باستاۋىندا تۇرعان قايراتكەرلەردىڭ ءبىرى. ونىڭ كۇي تارتۋداعى ەرەكشە تەحنيكاسى مەن ورىنداۋشىلىق مانەرى زامانداستارىنىڭ جوعارى باعاسىنا يە بولدى. اكادەميك احمەت جۇبانوۆ قامبار مەدەتوۆتىڭ ساۋساق باسۋ شەبەرلىگىن وزگەلەردەن دارالاپ، ونىڭ ورىنداۋشىلىق قولتاڭباسىنا ايرىقشا باعا بەرگەن. كۇيشى ەل ىشىندەگى دارىندى ونەرپازداردى الماتىعا جيناپ، كاسىبي مۋزىكالىق ۇجىمنىڭ قالىپتاسۋىنا بەلسەنە اتسالىستى.
«الەم تانىعان اسەم توپ» كونتسەرتى – تالانتقا تاعزىم, ۇلتتىق ونەردىڭ بۇگىنگى تىنىسى مەن بولاشاعىنا ارنالعان تاعىلىمدى مادەني جوبا. كءۇي كەشىندە كورەرمەن قازاق حالقىنىڭ كۇيشىلىك مەكتەپتەرىنىڭ كوركەمدىك ەرەكشەلىگىن، ورىنداۋشىلىق ءداستۇرءىن جانە ۇلتتىق مۋزىكانىڭ تەرەڭ فيلوسوفيالىق مازمۇنىن سەزىنە الادى.
