تۇركىستان تورىندە قازاق مۋزىكاسىنىڭ كورنەكتى وكىلى، ءان الەمىنىڭ دارا تۇلعاسى ءشامشى قالداياقوۆتىڭ شىعارماشىلىعىن ۇلىقتاۋعا ارنالعان ء«شامشى اندەرى» ونەر فەستيۆالى باستالدى.
فەستيۆالدىڭ باستى ماقساتى – كومپوزيتوردىڭ مول مۋزىكالىق مۇراسىن ناسيحاتتاۋ، ۇلتتىق ونەردى دارىپتەۋ، جاس ورىنداۋشىلاردىڭ شىعارماشىلىق الەۋەتىن قولداۋ جانە كورەرمەنگە ءشامشى اندەرىنىڭ ماڭگىلىك قۇندىلىعىن پاش ەتۋ.
جوعارى دەڭگەيدە ۇيىمداستىرىلعان فەستيۆالگە تۇركىستان وبلىسىنىڭ اكىمى نۇرالحان كوشەروۆ، ءوڭىردىڭ زيالى قاۋىم وكىلدەرى مەن ءوڭىر تۇرعىندارى جانە قوناقتار قاتىسىپ جاتىر.
كەش بارىسىندا ەلىمىزدىڭ تانىمال ەسترادا جۇلدىزدارى مەن جاس ورىنداۋشىلار كومپوزيتوردىڭ كوپشىلىك ءسۇيىپ تىڭدايتىن اندەرىن شىرقاۋدا. ساحنادا «جىگىتتەر» كۆارتەتى، «Melomen»، «سارىن» جانە «Turan Boys» توپتارى، سونداي-اق ءمولدىر اۋەلبەكوۆا، مارجان اراپباەۆا، التىناي جوراباەۆا، دوسىمجان تاڭاتاروۆ، ءالي وقاپوۆ، عازيزحان شەكەربەكوۆ، اسقار جۇنىسبەكوۆ، قاناي، رۋسلان اقىنباەۆ، اياجان نۇرماحانبەت، مارجان ەرلانقىزى، دانيار بارىس، ەلۆيرا مامىتوۆا جانە وزگە دە ونەرپازدار ونەر كورسەتەدى. مەرەكەلىك كەشتىڭ جۇرگىزۋشىلەرى – نۇرسۇلتان ەسجان مەن اللا گاۆرينا.
ايتا كەتەيىك، پرەزيدەنت باستاماسىمەن تۇركىستان قالاسىنا ەرەكشە مارتەبە بەرىلىپ، ارنايى زاڭ قابىلدانعان. ول قۇجاتتا تۇركىستاندى تۇركى الەمىنىڭ مادەني، رۋحاني، تاريحي جانە تۋريستىك ورتالىعىنا اينالدىرۋ باعىتىنداعى جۇمىستاردى جانداندىرۋعا مول مۇمكىندىك قاراستىرىلعان. بۇگىندە شاھاردا ءتيىستى جۇمىستار اتقارىلىپ، تۋريستەر سانى جىلدان-جىلعا ارتۋدا.
