الماتى مەن جەتىسۋ وبلىستارى ءبولىنىپ، وبلىس ورتالىعى قوناەۆ قالاسىنا كوشكەلى بەرى مەملەكەتتىك مەكەمەلەردىڭ دەنى كەڭسەلەردى جالعا الىپ وتىر. ماسەلەن، الماتى وبلىسىنىڭ سوت اكىمشىلىگى الداعى بەس ايعا عيمارات جالداۋ ءۇشىن قازىنا قارجىسىنان 50 752 232 تەڭگە قارجى بولگەن، دەپ حابارلايدى “ادىرنا” ۇلتتىق پورتالى satypalu.gov.kz/kz/ سايتىنا سىلتەمە جاساپ.
بۇگىن، ياعني 17 شىلدە كۇنى satypalu.gov.kz سايتىندا "قوناەۆ قالاسىندا ءبىر سوتقا عيمارات جالداۋ" دەگەن اتاۋمەن تەندەر جاريالاندى. تەندەر جەڭىمپازى 24 شىلدە كۇنى انىقتالادى. تەحنيكالىق سيپاتتامادا قوناەۆ قالاسىنان جالعا الىناتىن عيماراتتىڭ 20 ادامعا دەيىن سىيىمدىلىعى بار زالى، 1 ءماجىلىس زالى، ۆاننا بولمەلەرى، 2273,7 شارشى مەتردەن كەم ەمەس اكىمشىلىك عيماراتتا 2 سوت توراعاسى، 3 القا توراعالارى، 20 سۋدياعا ارنالعان كابينەتتەر، ت.ب بولۋى كەرەكتىگى جازىلعان.
سونداي-اق، "اكىمشىلىك عيماراتتى كۇتىپ ۇستاۋ، قوقىس شىعارۋ، كوممۋنالدىق تولەمدەر جالداۋ اقىسىنا كىرەتىنى، تەندەر جەڭىمپازىندا اكىمشىلىك عيماراتقا قۇقىق بەلگىلەيتىن قۇجاتتارى بولۋى كەرەكتىگى، عيمارات ماڭىندا قىزمەتتىك كولىك قۇرالدارىن، سوت پروتسەسىنە قاتىسۋشىلاردىڭ كولىكتەرىن قوياتىن اۋماق بولۋى قاجەتتىگى" بەلگىلەنگەن. "عيماراتتى جالداۋ مەرزىمى 2024 جىلعى 31 جەلتوقسانعا دەيىن" دەپ كورسەتىلگەن.
ياعني، الماتى وبلىسىنىڭ سوت اكىمشىلىگى الداعى بەس اي ءۇشىن عيمارات جالداۋعا 50 752 232 تەڭگە قارجى جۇمساماق. وبلىس بولىنگەلى ەكى جىلدان استام ۋاقىت ءوتتى. سودان بەرى سوت اكىمشىلىگى عيمارات جالداۋعا بيۋدجەت قارجىسىنان قانشا اقشا شىعىندادى؟ بۇل ءۇردىس قاشانعا دەيىن جالعاسادى؟ عيماراتتى جالعا الۋعا كەتكەن قارجىمەن مەملەكەتتىك مەكەمەگە عيمارات سوعىپ الۋعا نە كەدەرگى؟
بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى قوسىمشا جاريالايتىن بولامىز.
اباي اسىل
“ادىرنا” ۇلتتىق پورتالى
