Almaty men Jetisý oblystary bólinip, oblys ortalyǵy Qonaev qalasyna kóshkeli beri memlekettik mekemelerdiń deni keńselerdi jalǵa alyp otyr. Máselen, Almaty oblysynyń Sot ákimshiligi aldaǵy bes aıǵa ǵımarat jaldaý úshin qazyna qarjysynan 50 752 232 teńge qarjy bólgen, dep habarlaıdy “Adyrna” ulttyq portaly satypalu.gov.kz/kz/ saıtyna silteme jasap.
Búgin, ıaǵnı 17 shilde kúni satypalu.gov.kz saıtynda "Qonaev qalasynda bir sotqa ǵımarat jaldaý" degen ataýmen tender jarııalandy. Tender jeńimpazy 24 shilde kúni anyqtalady. Tehnıkalyq sıpattamada Qonaev qalasynan jalǵa alynatyn ǵımarattyń 20 adamǵa deıin syıymdylyǵy bar zaly, 1 májilis zaly, vanna bólmeleri, 2273,7 sharshy metrden kem emes ákimshilik ǵımaratta 2 sot tóraǵasy, 3 alqa tóraǵalary, 20 sýdıaǵa arnalǵan kabınetter, t.b bolýy kerektigi jazylǵan.
Sondaı-aq, "Ákimshilik ǵımaratty kútip ustaý, qoqys shyǵarý, kommýnaldyq tólemder jaldaý aqysyna kiretini, tender jeńimpazynda ákimshilik ǵımaratqa quqyq belgileıtin qujattary bolýy kerektigi, ǵımarat mańynda qyzmettik kólik quraldaryn, sot proesine qatysýshylardyń kólikterin qoıatyn aýmaq bolýy qajettigi" belgilengen. "Ǵımaratty jaldaý merzimi 2024 jylǵy 31 jeltoqsanǵa deıin" dep kórsetilgen.
Iaǵnı, Almaty oblysynyń Sot ákimshiligi aldaǵy bes aı úshin ǵımarat jaldaýǵa 50 752 232 teńge qarjy jumsamaq. Oblys bólingeli eki jyldan astam ýaqyt ótti. Sodan beri Sot ákimshiligi ǵımarat jaldaýǵa bıýdjet qarjysynan qansha aqsha shyǵyndady? Bul úrdis qashanǵa deıin jalǵasady? Ǵımaratty jalǵa alýǵa ketken qarjymen memlekettik mekemege ǵımarat soǵyp alýǵa ne kedergi?
Bul suraqtardy tıisti mekemege joldadyq. Olardan jetken jaýapty qosymsha jarııalaıtyn bolamyz.
Abaı Asyl
“Adyrna” ulttyq portaly
