«Levi Strauss & Co» كورپوراتسياسىنىڭ العاشقى كىرپىشىن قالاعان كاسىپكەر. دجينسى كورولى. جاڭا ۇلگىدە تىگىلگەن دجينسى شالبارى وعان ميلليونەر مارتەبەسىن سىيلادى. مەتسەنات. ەۆرەي پاتريوتى. لەۆي ستراۋسستىڭ ەسىمىن كيىم ديزاينەرلەرى ءالى كۇنگە دەيىن وزدەرىنە ءپىر تۇتادى.
ول 1829 جىلى 16-اقپاندا باۆارياداعى ەۆرەي وتباسىندا تۋدى. لەيب شتراۋسس جانۇياداعى جەتى بالانىڭ ەڭ كەنجەسى بولدى.
ول زاماندا گەرمانيا 36 شاعىن كنيازدىكتەن قۇرالعان كونگلومەرات ەدى. فەودالدىق قالدىقتار جاقسى ساقتالعان باۆاريادا انتيسەميتيستىك كوڭىل-كۇي ءورشىپ تۇردى. ءار وبششيناداعى ەۆرەيلەردىڭ ناقتى سانى انىقتالىپ، ءتىزىمى جاسالدى. ەۆرەيلەردىڭ سانىنىڭ كوبەيۋى قوعامدىق تارتىپكە نۇقسان كەلتىرەدى دەگەن سىلتاۋمەن ولاردىڭ ءبىر-بىرىنە ۇيلەنۋىنە، بالا تۋىنا تىيىم سالىنادى. جەر وڭدەۋمەن، ەگىنشىلىكپەن، وندىرىسپەن اينالىسۋعا دا رۇقسات بەرىلمەدى. ولاردىڭ تەك ۇساق-تۇيەك ساۋدامەن شۇعىلدانۋعا مۇمكىندىگى بولدى. جەرگىلىكتى كنيازدەردىڭ زاڭدى اسىرا پايدالانىپ، قوقان-لوقى كورسەتۋى باۆاريادان قونىس اۋدارۋشى ەۆرەيلەردىڭ قاراسىنىڭ كوبەيۋىنە ۇلكەن سەبەپ بولدى.
لەيبتىڭ ەڭ ۇلكەن ەكى اعاسى يوناس پەن ليپپمان نيۋ-يورككە باسقالاردان بۇرىن كوشەدى. ول جاققا جەتكەن سوڭ، اعايىندى ەكەۋ كيىم تىگۋمەن اينالىسادى. يوناس پەن ليپپمان باۆاريادا قالعان انالارى مەن باۋىرلارىنا جازعان حاتتارىندا امەريكادا انتيسەميتيزم جوق ەكەنىن العا تارتىپ، ولارعا نيۋ-يورككا كوشىپ كەلۋگە كەڭەس بەرەدى. اكەلەرىنىڭ ولگەنىنە ەكى جىل تولعاننان سوڭ، جانۇيانىڭ قالعان مۇشەلەرى امەريكاعا جول تارتادى. بۇل 1847 جىل ەدى. بەس ايعا سوزىلعان كەمەدەگى جولساپار بارلىعىنا اۋىر ءتيدى. اسىرەسە، لەيبتىڭ اپكەسىنىڭ دەنساۋلىعى جاڭا قۇرلىققا دەيىن ازەر شىدايدى.
اقش-قا اياق باسقان ەۆرەي وتباسى مۇندا دا تىرشىلىكتەرىن قۇمىرسقا تىرلىكپەن جالعاستىرا بەردى. ارقايسىسى باسقا كەلىمسەكتەر سياقتى ءبىرىنشى كەزەكتە اتى-جوندەرىن امەريكالاندىردى. يوناس دجوناسقا، ليپپمان لۋيسكە اينالدى. ال لەيب شتراۋسستىڭ ءوزى بۇدان بىلاي لەۆي ستراۋسس بولدى.
امەريكاداعى بيىك ۇيلەردى كورىپ ءتانتى بولعان لەۆي ونداعى تۇرعىندارعا كوپ زاتتار كەرەك ەكەنىن جاقسى ءتۇسىندى. قاپ ارقالاعان جاس جىگىت قالا كوشەلەرىن ارالاپ، تاراق، تۇيرەۋىش، ينە، ءجىپ، تۇيمە، قايشى جانە تاعى باسقا تۇرمىستىق بۇيىمدار ساتادى.
1847 جىلى امەريكانىڭ باتىسىنداعى كاليفورنيا شتاتىنان التىن كەن ورنى تابىلعاندا، ەلدىڭ تۇستىگىندەگى، تەرىستىگىندەگى، شىعىسىنداعى پايدا ىزدەگەن ادامدار باتىس تاراپقا قاراي اعىلادى. تىڭ جاڭالىق ستراۋسستار اۋلەتىن دە بەيجاي قالدىرمايدى. بارلىعى اقىلداسا كەلە لەۆي ستراۋسستى كاليفورنيانىڭ تىنىس-تىرشىلىگىن بارلاۋعا جىبەرۋگە شەشىم قابىلدايدى. جوسپار بويىنشا لەۆي اعالارىنىڭ ماتالارى مەن توقىعان كيىمدەرىن كاليفورنيا شتاتىنداعى سان-فرانتسيسكو قالاسىنا دەيىن جەتكىزىپ، سول جاقتان تاۋارلاردى ساتاتىن دۇكەن اشۋعا ءتيىس بولدى.
سان-فرانتسيسكو پورتى. 1850 جىل
اقش-تىڭ كۇنشىعىسىنداعى نيۋ-يوركتان كۇنباتىسىنداعى سان-فرانتسيسكوعا دەيىنگى جول تىم ۇزاق ءارى قاۋىپتى بولاتىن. ول ءۇشىن سولتۇستىك امەريكا قۇرلىعىنا ءتان كوگالدى، شالعىندى ايماقتاردى جارا كەسىپ، جارتاس تاۋلاردان اسىپ ءوتۋ كەرەك. ەڭ باستىسى ۇندىستەردىڭ داكوتا-سيۋ دەپ اتالاتىن ءىرى تايپالار وداعىنىڭ كوسەمدەرى – ايگىلى قونجيعان ايۋ مەن قۇتىرعان جىلقىنىڭ قولىنا ءتۇسىپ قالماۋى ءتيىس. سول زاماندا بۇل ەكى كوسەمگە قاراستى ءۇندىس تايپالارى اق ناسىلدىلەرمەن سوعىسىپ جاتقان. بۇلاردان باسقا قارااياقتى كروۋ جانە شايەن اتتى تايپالار ءومىر ءسۇردى. قىراتتار مەن ۇستىرتتەردىڭ اراسىندا دامىل تاپپاي جورتىپ جۇرەتىن ولاردىڭ قولىنا تۇسسەڭ سوزگە كەلمەستەن بىردەن باس تەرىڭدى سىپىرىپ الاتىن. اق ناسىلدىلەردىڭ ءوز ىشىنەن شىققان باسكەسەرلەر دە فەرمەرلەر مەن باقتاشىلاردى توناپ، ۇلكەن اڭعاردىڭ ىشىندە ءورىپ ءجۇرۋشى ەدى.
ال لەۆي ستراۋسس تەك باس تەرىسىن ەمەس، تاۋارلارىن دا سان-فرانتسيسكوعا دەيىن امان-ەسەن جەتكىزۋگە ءتيىس بولاتىن. ول قۇرلىقپەن باراتىن جولدان باس تارتىپ، تەڭىز جولىن تاڭدايدى. جۇك تيەلگەن كەمەمەن مەكسيكا جاعالاۋىن بويلاي، پاناما مويناعىنا جەتەدى. سول جەردەن باسقا كەمەگە اۋىسىپ، بۇل جولى سولتۇستىكتى كوزدەپ، كاليفورنيانى بەتكە الادى. لەۆي ستراۋسس سان-فرانتسيسكوعا 1850 جىلى جەتەدى. نيۋ-يوركتان اتتاناردا اعالارى وعان مۇندا سەگىز جۇزدەي عانا ادام مەكەن ەتەتىنىن ايتقانىمەن، مۇندا كەلگەندە شىن كورسەتكىش 34 ەسە ارتىق بولىپ شىقتى. التىن شىققان ايماقتاعى تۇرعىندار سانى 30 مىڭ ادامعا تاياپتى.
جاڭا ورىنعا تابانى ءتيىپ، سان-فرانتسيسكوعا ورنىققاننان سوڭ، ارادا كوپ ۋاقىت وتپەي لەۆي ستراۋسس ءوزى اكەلگەن زاتتاردىڭ ءبارىن ساتىپ وتكىزەدى. تەك ءبىر كەنەپ ماتا عانا ساتىپ الۋشىسىن تابا الماي-اق قويادى. كەنەپتى ارى تاسىپ، بەرى تاسىپ وتكىزە الماي، قالا شەتىندەگى تراكتيردىڭ قوجايىنىنا ساۋدالاماق بولىپ سوندا بارادى. ايتكەنمەن ول دا ستراۋسستىڭ كەنەپ ماتاسىن جاراتپادى.
سان-فرانتسيسكوداعى التىن ىزدەۋشىلەر
كەنەپ ماتاسىن ۇزاق ارقالاعان لەۆي ەندى ونى التىن ءوندىرىپ جۇرگەن قارا جۇمىسشىلارعا اپارىپ جارنامالايدى. ويتكەنى جۇمىسشىلار وزدەرى قۇرعان شاتىرلاردا مەكەن ەتەتىن، لەۆي ستراۋسس كەنەپ ماتا سولاردىڭ شاتىرىنا جاراپ قالار دەپ ۇمىتتەنگەن. بىراق مۇنداعى التىن وندىرۋشىلەر شاتىر دايىندايتىن ماتەريالعا ەمەس، قارا جۇمىسقا ءتوزىمدى شالبار قاجەت ەكەنىن ايتىپ ارىزدانادى. كەن ءوندىرىسى اۋىر جۇمىس بولعاندىقتان، جۇمىسقا كيگەن شالبارلارى تەز توزىپ، تەز جىرتىلادى ەكەن. ولار جاس ساۋداگەرگە ەندى كەلگەنىندە كەنەپ ماتانىڭ ورنىنا شالبار الىپ كەلۋگە كەڭەس بەرەدى.
قارا جۇمىسشىلاردىڭ ءسوزىن بايىپپەن تىڭداعان لەۆي ستراۋسس بىرەسە التىن وندىرۋشىلەردىڭ بۇتىنداعى شالبارلارعا، بىرەسە قولىنداعى كەنەپ ماتاعا كەزەك-كەزەك قاراپ، ويلانىپ تۇرىپ قالادى. اكەسى تىگىنشى، اعالارى تىگىنشى. نەگە ءوزى تىكپەسكە شالباردى؟ ونىڭ ۇستىنەن شالبار قولىندا ۇستاپ تۇرعان كەنەپ ماتامەن تىگىلسە، ول شالباردىڭ توزۋى دا، جىرتىلۋى دا قيىن.
«Levi Strauss & Co» كاسىپورنىنىڭ شەبەرحاناسى
شالبار سۇراپ ارىزدانعان العاشقى جۇمىسشىنىڭ ولشەمىن العاننان كەيىن، ۇيىنە كەلە سالا سول ولشەم بويىنشا جۇمىسشىعا شاق ەتىپ، كەنەپ ماتادان ەكى جانىندا كەڭ قالتاسى بار، تىگىسى ەكى قاتار شالبار تىگەدى. ول شالبارىن بەلدىك ارقىلى بەلگە بايلايتىن ەمەس، اسپا باۋ ارقىلى يىققا ىلەتىن ەتتى. لەۆي ستراۋسستىڭ قولىمەن تىگىلگەن قوڭىر شالباردىڭ العاشقى داناسى تاپسىرىس بەرۋشىگە 1 دوللار 20 تسەنتكە ساتىلادى. شالباردىڭ جاڭا ءتۇرىن كورگەن باسقا جۇمىسشىلار لەۆيگە الدىن الا اقشالارىن تولەپ، كەزەككە تۇرا باستايدى. كەنەپ ماتادان تىگىلگەن شالبارعا سۇراۋ سالعانداردىڭ سانى 500-گە جۋىقتاعاندا ستراۋسس بۇل ىسپەن جانىن سالا اينالىسسا، كوپ پايداعا كەنەلەتىنىنە كوزى جەتتى.
ول 1853 جىلى سان-فرانتسيسكونىڭ ساكرامەنتو كوشەسىنەن «Levi Strauss & Co» دۇكەنىن اشادى. دۇكەن ۇساق-تۇيەك تۇرمىستىق بۇيىمدار ساتۋمەن اينالىسقانمەن، ونىڭ نەگىزگى ءوتىمدى تاۋارى جۇمىسشىلارعا ارنالعان شالبارلار بولدى.
دجينسىدىڭ قالتاسىنا قاعىلعان مىس شەگەن. بۇل دا ءبىر كەزدەرى جاڭالىق بولعان
لەۆي ستراۋسستىڭ پاتەنتى
«Levi Strauss & Co» كاسىپورنىنىڭ ءوندىرىس كولەمىنىڭ ۇلعايۋىنا بايلانىستى شيكىزات جەتىسپەۋشىلىگى تۋىندايدى. ستراۋسس جاعالاۋعا تابان تىرەگەن بۇكىل كەمەلەردەگى كەنەپ ماتالاردى تۇگەل ساتىپ العانىمەن، ول دا كوپ ۋاقىت وتپەي تاۋسىلدى. 60-جىلدارعا تامان لەۆي شالبار تىگەتىن ماتەريالدى فرانتسيانىڭ وڭتۇستىگىندەگى نيمە قالاسىنان تاسىمالداناتىن ينديگو ءتۇستى (كوكشىل ءتۇستى) جۇمساق ءتوزىمدى ماتامەن الماستىرادى. ماتانىڭ رۋلونىندا «Serge de Nime» دەپ جازىلعاندىقتان، التىن وندىرۋشىلەر ول شالبارعا «دەنيم» دەپ ات قويادى. بۇرىنعى كەنەپ ماتادان دايىندالعان شالبارلاردىڭ ءتۇسى قوڭىر بولاتىن. ەندى التىن وندىرۋشىلەر كوك ءتۇستى شالبار كيدى. يىق باۋمەن بىرگە تىگىلگەندىكتەن، شالبار كومپانيا كاتالوگىندا «جوعارى بەلدى كومبينەزون» (waist high overalls) دەپ تىركەلدى.
لەۆي ستراۋسستىڭ شالبارى كەمشىلىكسىز بولمادى. قۇرامىندا التىننىڭ تۇيىرشىكتەرى بار كەسەكتەر مەن جىنىستاردى قالتالارىنا سالىپ جينايتىن بولعاندىقتان، جۇمىسشىلاردىڭ شالبارلارىنا جابىستىرىلعان قالتالاردىڭ تىگىستەرى اجىراپ، جىرتىلىپ قالا بەردى. ولاردىڭ تىگىن فابريكاسىنا اكەلىپ تاستاعان شالبارلارىنا قايتادان قالتا تىگىپ بەرگەنىمەن، قالتا تىگىسىنىڭ سوگىلۋى تىم جيىلەيدى.
1872 جىلى لەۆي ستراۋسسقا نەۆادا شتاتىنداعى ارىپتەسى، تىگىنشى، «Levi Strauss & Co» دۇكەنىنىڭ تۇراقتى كليەنتى، لاتۆيادان اۋىپ كەلگەن ەۆرەي دجەيكوب دەۆيستەن ۇسىنىس حات كەلەدى. حات پاتەنت ماسەلەسىنە قاتىستى جازىلعان ەكەن. دجەيكوب دەۆيس تالاي جىلدان بەرى كەنشىلەرگە كيىم تىگىپ بەرۋمەن شۇعىلدانىپ جۇرگەندىكتەن، قالتا تىگىسىنىڭ ءالسىز بولۋى وعان دا قيىندىق تۋعىزىپتى. قالتالارىنىڭ سوگىلگەنىن ايتىپ، ءجيى شاعىمدانعان كەنشىلەردەن مەزى بولعان دەۆيس ءبىر كۇنى جاڭاشا قادامعا بارادى. ۇيىندەگى ات ابزەلدەرىنىڭ باۋلارىن ءبىر-بىرلەرىنە بەكىتىپ تۇرعان مىس شەگەندەردى سۋىرىپ الادى دا، ولاردى ارىزدانىپ كەلىپ وتىرعان ايك ەسىمدى ۆيردجينيالىق شاحتەردىڭ شالبارىنىڭ جان قالتاسىنىڭ استىڭعى جانە ۇستىڭگى شەتىنە قاعىپ تاستايدى. ەكى مىس شەگەنمەن شالبارعا بەكىتىلگەن قالتا ومىرشەڭ بولىپ، ول شالباردىڭ يەسى ودان كەيىن قايتىپ دجەيكوب دەۆيستىڭ الدىنا شاعىم ايتىپ كەلمەپتى. كەزدەيسوق تاپقان جاڭالىعىن پاتەنتتەگىسى كەلگەن تىگىنشى پاتەنت ورتالىعى تالاپ ەتكەن 68 دوللاردى تاۋىپ بەرە الماي، ءىرى دۇكەن يەسى لەۆي ستراۋسستان كومەك قولىن سوزۋىن وتىنگەن ەكەن. ەگەر 68 دوللار تاۋىپ بەرە السا، پاتەنت ەكەۋىنىڭ اتىنا قاتار تىركەلەتىنىن ەسكەرتىپتى. لەۆي ارىپتەسىنىڭ ۇسىنىسىنا كەلىستى.
1873 جىلى 20-مامىردا كيىمدەرگە مەتالل شەگەندەر مەن مەتالل تۇيمەلەر قاعۋ-قاداۋ جونىندەگى 139121 ءنومىرلى پاتەنت لەۆي ستراۋسس پەن دجەيكوب دەۆيستىڭ اتىنا راسىمدەلەدى. بۇل كۇن دجينسىدىڭ تۋعان كۇنى رەتىندە تاريحتا قالدى. لەۆي دجەيكوب دەۆيستى اعالارىمەن قاتار كومپانيانىڭ جاۋاپتى قىزمەتىنە تاعايىنداپ، ءوزى كاسىپورىننىڭ باس قوجايىنىنا اينالادى.
«Levi Strauss & Co» كومپانياسىنىڭ كەڭسەسى جانە ونىڭ قىزمەتكەرلەرى
لەۆي ستراۋسس شالبارلارىن ەكى ءتۇرلى ماتادان تىكتى. ءبىرى جوعارىدا اتى اتالعان فرانتسيالىق «دەنيم» ماتاسى بولسا، ەكىنشىسى يتاليانىڭ گەنۋيا قالاسىندا توقىلاتىن ماتا ەدى. كەمەگە جۇك بولىپ تيەلگەن ماتا تەڭدەرىنىڭ سىرتىنا «Genoa» دەگەن تاڭبا باسىلعاندىقتان، ول اتاۋ تىلدىك تۇرعىدان بۇرمالانىپ، بريتاندىقتار مەن امەريكاندىقتاردىڭ اۋزىندا «دجين» دەپ اتالىپ كەتەدى. «دەنيم» مەن «دجين» شالبارلارى وتە ۇقساس بولدى. ايىرماشىلىقتارى بىرەۋ عانا: «دجين» اق جانە كوك ءتۇستى جىپتەن توقىلسا، ال «دەنيم» تەك كوك جىپتەن توقىلدى.
پاتەنت العان جىلى «Levi Strauss & Co» كاسىپورنى باسقا كيىم تۇرلەرىنەن بولەك مىس شەگەن قادالعان 21 مىڭ شالبار ساتىپ وتكىزەدى. مەتالل تۇيمەلى، قالتاسى مىس شەگەندەرمەن بەكىتىلگەن، تىگىستەرى ەكى-ءۇش قاتاردان تۇراتىن، جانىنداعى قالتالارىنان بولەك شالباردىڭ ارتىنا تاعى ءبىر قالتا قوسىلعان، يىق باۋمەن اسىلاتىن كوك جانە كوكشىل ءتۇستى شالبارلار «Leviʹs» («لەۆيدىكى»، «لەۆيدىڭ شالبارى» دەگەن ماعىنادا) دەپ اتالادى. بۇل بۇگىنگى دجينسىلاردىڭ العاشقى ۇلگىسى بولعانىمەن، شالبارلارعا لەۆي ستراۋسس ولگەن سوڭ وتىز جىلداي ۋاقىت وتكەننەن كەيىن عانا دجينسى دەپ ات قويىلدى. وعان دەيىن شالبار يەسىنىڭ اتىنا مەنشىكتەلىپ جوعارىداعىداي اتپەن تارالادى. سونىمەن قاتار بەلدىكپەن بۋىلاتىن دجينسى شالبارلار XX عاسىردىڭ 20-جىلدارىندا عانا پايدا بولدى. وعان دەيىنگىلەرى كومبينەزون ىسپەتتى ەدى. ال «Leviʹs» ديزاينى بۇگىنگى زامانداعى دجينسى تۇرلەرىنىڭ ىشىندەگى ەڭ تانىمال برەندتەردىڭ ءبىرى بولىپ سانالادى.
«Leviʹs» شالبارىن ەندى تەك التىن وندىرۋشىلەر ەمەس، باقتاشىلار، فەرمەرلەر، شاباندوزدار كيدى. اقش-تىڭ تاۋەلسىزدىگى ءۇشىن بولعان سوعىس «Levi Strauss & Co» كومپانياسىنىڭ تىنىس-تىرشىلىگىنە ەش زيانىن تيگىزبەدى. سەبەبى مايدان ۇرىستارى كاليفورنيا شتاتىنان تىم جىراق ايماقتاردا ءجۇردى.
1886 جىلى «Leviʹs»-ءتىڭ لوگوتيپى جاسالادى. لوگوتيپتە ەكى جىلقىنىڭ «Leviʹs» شالبارىن ەكى جاقتان تارتىپ، جىرتا الماي جاتقانى بەينەلەنەدى. «Leviʹs»-ءتىڭ ساپاسىن ناسيحاتتايتىن لوگوتيپ ارنايى دايىندالعان تەرى ماتەريالدارعا باسىلىپ، شالباردىڭ ارتقى جاعىنا جاپسىرىپ تىگىلدى. ءبىز قازىرگى كۇنى كيىپ جۇرگەن دجينسىلاردىڭ ارتقى بەتىنىڭ بەلبەۋ وتەتىن تۇسىنا جاپسىرىلعان ءتۇرلى ساۋدا بەلگىلەرى تاڭبالانعان الاقانداي ءتورتبۇرىش تەرىلەر ومىرگە وسىلاي كەلگەن.
«Leviʹs»-ءتىڭ لوگوتيپى
لەۆي ستراۋسس 1890 جىلدان باستاپ كومپانياسىنا تيەسىلى تاۋارلارعا ءنومىر بەلگىلەيدى. كاسىپورىن تىزىمىندە 501-ءىنشى تۇرعان كوك ءتۇستى، مەتالل شەگەندى شالبار بۇدان بىلاي «Leviʹs 501» دەپ جازىلاتىن بولىپ شەشىم قابىلدانادى.
لەۆي ستراۋسس «Levi Strauss & Co» كاسىپورنىنان باسقا ەكى ساقتاندىرۋ كومپانياسىنىڭ، ءبىر ەلەكتر كومپانياسىنىڭ جانە «Nevada Bank»-ءتىڭ قوجايىنى، سونىمەن بىرگە سان-فرانتسيسكو ساۋدا پالاتاسىنىڭ قۇرىلتايشىسى ءارى قازىناشىسى بولدى. جەتىمدەر ۇيىنە، قارتتار ۇيىنە، ءبىلىم وشاقتارىنا قارجىلاي قامقورلىق جاسادى.
ل.ستراۋسس سالدىرعان «يمانۋەل حرامى»
ول ءوزىنىڭ ەڭ يگى شارۋاسىنا 1850 جىلى كىرىسكەن بولاتىن. كاليفورنيا شتاتىنا تابانى تيە سالا، العاشقى ساۋداسىنان تۇسكەن قارجىعا سان-فرانتسيسكونىڭ ورتالىق كوشەلەرىنىڭ ءبىرىنىڭ بويىنان ەۆرەيلەر زيراتىن جانە «يمانۋەل حرامى» دەپ اتالاتىن ەۆرەيلەر قاۋىمىنىڭ سيناگوگاسىن سالۋعا ارنايى جەر تەلىمىن ساتىپ الادى. 1864 جىلى بيىك قوس مۇنارالى، كەرەمەت كۇمبەزى بار سيناگوگانىڭ قۇرىلىسىن اياقتاپ پايدالانۋعا بەرەدى. سيناگوگا سارايى 1906 جىلعى اۋىر زىلزالاعا دەيىن ءومىر ءسۇردى.
جەكە قازىناسى 6 ميلليون دوللارعا جەتكەن لەۆي ستراۋسس 1902 جىلى 26-قىركۇيەكتە ءوز ۇيىندە باقيلىق بولادى. ول قايتىس بولعاننان سوڭ، ارادا ءتورت جىل وتكەننەن كەيىن، سان-فرانتسيسكودا ءىرى جەر سىلكىنىسى بولىپ، «Levi Strauss & Co» كومپانياسىنىڭ باس كەڭسەسى جەرمەن-جەكسەن قيرايدى. ءزىلزالانىڭ كەسىرىنەن ءورت بولىپ، قيراعان باس كەڭسە ءۇش كۇن جانعان. مۇراعاتتاعى قۇجاتتار تۇگەل ورتەنىپ كەتكەندىكتەن، كومپانيانىڭ تىنىس-تىرشىلىگى مەن قوجايىنى تۋرالى مالىمەتتەر تىم تاپشى.
سان-فرانتسيسكو. 1906 جىلعى ءزىلزالادان كەيىنگى كورىنىس
ءتۇيىن
تىگىنشىلىك – ەجەلدەن كەلە جاتقان كاسىپ. شالبار – ەجەلدەن كەلە جاتقان كيىم. بىراق شالباردى قوس تىگىسپەن قاتارلاپ تىگەتىن، قالتاسىنا مىس تۇيمە قاعاتىن تىگىنشى ءجۇز سەكسەن جىلدان ءسال استام ۋاقىت بۇرىن عانا دۇنيەگە كەلىپتى. ونىڭ شالبارىنا ايتىلعان سىن دا از ەمەس: بەلدى قىسادى، بۇتى تار جانە ت.ب. دەگەنمەن، ودان بەرى دجينسى شالبارى جۇزدەگەن ديزاينەرلەردىڭ قولىنان ءوتتى. لەۆي ستراۋسس ءوز قولىمەن تىككەن شالباردى كوزىمەن كورگەندەر جوق. 1993 جىلى نەۆادا شتاتىنىڭ شاباندوزدارى اتپەن جورتىپ ءجۇرىپ، قوڭىر ءتۇستى كونە دجينسى تاۋىپ العان. ماماندار ونى ستراۋسس توقىعان شالبارعا بالاپ، كومپانيانىڭ مۇراجايىندا ساقتاپ وتىر. ول شالباردىڭ ءستيلى بۇگىنگى دجينسىلاردىڭ پوشىمىنا ۇقسامايدى. قالاي دەسەك تە، دجينسى شالبارى قازىرگى تاڭدا ەڭ ءوتىمدى تاۋارلاردىڭ الدىڭعى قاتارىندا.
اقان بىرلىك
“ادىرنا” ۇلتتىق پورتالى
