ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسى بەلگىلى ساياساتكەر، قازىرگى كاسىپكەر عالىمجان جاقيانوۆتىڭ ارىزى بويىنشا جۇرگىزىلگەن سوت پروتسەسسىندە شىعارىلعان شەشىم تۋرالى پىكىر ءبىلدىردى. اراسىندا ەموتسيالىق سارىن بايقالاتىن مۇنداي كوزقاراس ادام قۇقىعىنىڭ جاناشىرى بولۋعا ءتيىستى حالىقارالىق ۇيىمنىڭ بەت-بەدەلىنە كولەڭكە ءتۇسىرۋى مۇمكىن. قازىر كورشى ەلدەردە ادام قۇقىعىن قورعايتىن جانە ءسوز بوستاندىعىن جوقتايتىن ۇكىمەتتىك ەمەس ۇيىمدارعا قىسىم ۇلعايعاندا ايگىلى بيۋرونىڭ مۇنداي قادامعا بارۋى جۇمسارتىپ ايتقاندا، مۇلدە قيسىنسىز.
ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسى عالىمجان جاقيانوۆتىڭ ارىزى بويىنشا جۇرگىزىلگەن سوت شەشىمىن «جاقيانوۆتىڭ ار-نامىسىن قورعاۋى» رەتىندە باعالادى. سول رەتتە بيۋرونىڭ رەسمي سايتىندا بۇگىن, 6 ناۋرىزدا «جاقيانوۆ ار نامىسىن قورعاپ شىقتى» دەگەن مالىمدەمە جاريالاندى.
بۇدان الدىن الماتى قالاسى الاتاۋ اۋداندىق سوتىندا عالىمجان جاقيانوۆتىڭ “ادىرنا” ۇلتتىق پورتالى مەن تولەن توقتاسىنوۆتىڭ ۇستىنەن بەرگەن شاعىمى بويىنشا ازاماتتىق ءىستىڭ شەشىمى جاريا ەتىلگەن ەدى. 4 ناۋرىزدا جاريالانعان سوت قورىتىندىسى “ادىرنا” ۇلتتىق پورتالىنىڭ YouTube ارناسىنداعى سۇحباتتى وشىرۋگە جانە ونداعى دەرەكتەردى جوققا شىعارۋ تۋرالى شەشىم شىعاردى. ال تولەن توقتاسىنوۆقا 200 مىڭ تەڭگە تولەۋدى جۇكتەدى جانە عالىمجان جاقيانوۆتىڭ “ادىرناعا” قويعان قارجىلىق تالاپتارى نەگىزسىز دەپ تانىلدى. تاراتا ايتقاندا، جاقيانوۆ بۇل سۇحباتتى كورگەننەن كەيىن، شىندىققا سايكەس كەلمەيتىن اقپارات بار دەپ شەشىپ، توقتاسىنوۆتان ونى جوققا شىعارۋىن، ال “ادىرنا” جۋرناليستەرىنەن ۆيدەوماتەريالدى ءوشىرۋىن، ودان كەشىرىم سۇراۋىن، سونداي-اق، جاۋاپكەرلەردىڭ ارقايسىسىنان مورالدىق شىعىن رەتىندە 1 ميلليون تەڭگە تالاپ ەتكەن. ونى سوت نەگىزسىز دەپ تانىدى.
وسى ماسەلەگە وراي ادام قۇقىعى جونىندەگى بيۋرونىڭ ەموتسيالىق سارىندا مالىمدەمە جاريالاۋى تاڭعالارلىق وقيعا بولعانى جاسىرىن ەمەس.
«بەلگىلى مەملەكەت جانە قوعام قايراتكەرى، پاۆلودار وبلىسىنىڭ بۇرىڭعى اكىمى عالىمجان جاقيانوۆ ار-نامىسىن سوتتا قورعاپ شىقتى. كەيبىر اقپارات قۇرالدارى ءتۇرلى قۇيتىرقى سەبەپتەرمەن «جاقيانوۆ ءسوز بوستاندىعىنا قارسى شىقتى»، «ەكس-اكىم جۋرناليستەردى سوتقا بەردى» دەپ جەردەن جەتى قويان تاپقانداي جالعان ءسوزدى جاپپاي تاراتىپ جاتقانى ءمالىم. سونداعى تاققان ايىپتارى – عالىمجان جاقيانوۆ «ادىرنا» پورتالىن سوتقا بەردى, وسىلايشا جۋرناليستەردى قۋدالاپ جاتىر-مىس دەگىسى كەلەدى. ال شىن مانىندە جاعداي مۇلدەم باسقاشا ەكەنىن سوتتىڭ شەشىمىنەن انىق كورۋگە بولادى. الاتاۋ اۋداندىق سوتىنىڭ قاۋلىسىنا سايكەس, جاقيانوۆتىڭ بۇرىنعى بيزنەس ارىپتەسى ءماجىلىستىڭ ەكس-دەپۋتاتى تولەن توقتاسىنوۆتىڭ «ادىرنا» پورتالىندا ايتقان ءۋاجى مەن ءسوزى جالعان بولىپ شىقتى»,- دەپ باستالادى ادام قۇقىعى بيۋروسىنىڭ وسى مالىمدەمەسى.
بيۋرو جاقيانوۆ شاعىمىن تولىق ايتپايدى.
«ودان بولەك توقتاسىنوۆتىڭ «ادىرنا» پورتالىنا بەرگەن سۇحباتىندا كەلتىرىلگەن ءبىراز سوزدەردىڭ وتىرىك ەكەنىن، اقيقاتتان الشاق جاتقانىن سوت رەسمي تۇردە راستادى. ونىڭ بارلىعىن جاقيانوۆ قۇر سوزبەن ەمەس, ناقتى مالىمەتتەرمەن, قۇجاتتارمەن جانە كۋاگەرلەردىڭ دەرەكتەرىمەن دالەلدەپ شىقتى. ەندى الاتاۋ اۋداندىق سوتىنىڭ قاۋلىسىنا سايكەس, «ادىرنا» پورتالى Youtube جەلىسىندە جاريالانعان توقتاسىنوۆپەن سۇحباتتى ءوشىرۋى كەرەك, ال ەكس-دەپۋتات ءوزىنىڭ جالعان سويلەگەنىن مويىنداپ, بەينە ۇندەۋ جاريالاۋى ءتيىس. ودان بولەك, توقتاسىنوۆ بىرقاتار سوت شىعىندارىن دا وتەۋى ءتيىس»,- دەلىنگەن ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ مالىمدەمەسىندە.
بيۋرو بۇدان كەيىن ءسوز بوستاندىعىنا قىسىم جاسالماعانىن سەنىمدى تۇردە اتاپ كورسەتەدى.
«ال ەندى بۇل جاعدايدان جۋرناليستەردى قۋدالاۋدى ءبىز كورىپ تۇرعان جوقپىز. بىرىنشىدەن, توقتاسىنوۆقا ءوز شىندىعىن جەتكىزۋگە اشىق سوت پروتسەسىندە مۇمكىندىك بەرىلدى. بىراق, ناقتى قۇجاتتاردى, دالەلدەردى ەكس-دەپۋتات كورسەتە العان جوق. ەكىنشىدەن, «ادىرنا» پورتالىنا ەشقانداي دا قىسىم جاسالعان جوق. ودان ونداعان ميلليون وتەماقى تالاپ ەتكەن جاقيانوۆ بولدى ما? بيلىك ءبىر كەزدەرى وپپوزيتسيالىق باسىلىمداردى ونداعان, ءتىپتى جۇزدەگەن ميلليون وتەماقى تولەۋگە ماجبۇرلەپ, سول ارقىلى جاۋىپ تىناتىن. «ادىرنا» پورتالى جاقيانوۆقا ءبىر تيىن دا تولەۋگە مىندەتتى ەمەس. بار بولعانى – جاريالانعان ماتەريالدى ءوشىرۋى ءتيىس. سەبەبى, كەلتىرىلگەن مالىمەتتەر جالعان, شىندىققا جاناسپايدى. ۇشىنشىدەن, جاقيانوۆ جۋرناليستەرگە قىسىم كورسەتەتىندەي قۇزىرەتى بار جوعارى لاۋازىمدى شەنەۋنىك پا ەدى? جوق, ارينە. ونىڭ بيلىكتەن كەتكەنىنە 23 جىل بولعانىن جۇرت بىلەدى. وعان بيلىك لاۋازىم بەرمەك تۇگىلى, ءبىراز جىل قۋدالاۋعا سالدى, تۇرمەگە وتىرعىزدى»,- دەيدى ادام قۇقىعى بيۋروسى جاقيانوۆتىڭ بىرجاقتى تۇردە حاق-قۇقىعىن جوقتاپ.
بيۋرو مۇنىمەن شەكتەلمەيدى. ءوز دەگەنىن ودان ارمەن شەگەلەي تۇسەدى.
«قازىر بەلگىلى كاسىپكەر، تاۋەلسىز قوعام قايراتكەر ەكەنى بارشاعا ايان. جاقيانوۆتىڭ ەشقانداي دا اكىمشىلىك رەسۋرستارى جوق. ولاي بولسا, ول «ادىرنا» جۋرناليستەرىنە قانداي قىسىم كورسەتە الادى? بۇل ءتىپتى ميعا قونبايتىن ءسوز عوي! تورتىنشىدەن, جاقيانوۆ توقتاسىنوۆ پەن «ادىرنانى» سوتقا بەرسە, دەمەك, ءوزىنىڭ ار-نامىسىن, بەدەلىن قورعاۋعا دايىن, اقيقات ءوزىنىڭ جاعىندا ەكەنىنە سەنىمدى دەگەن ءسوز. جاسىراتىنى بولسا, جالعان سويلەسە, ولارمەن سوتتاسار ما ەدى? جوق, ارينە. دەمەك, ايتار ارگۋمەنتى دە, كەلتىرەر ءۋاجى دە جەتكىلىكتى دەگەندى بىلدىرەدى. ازامات رەتىندە, بەلگىلى قايراتكەر رەتىندە ءوزىنىڭ ار-نامىسىن زاڭدى جولمەن قورعاۋعا تولىق قۇقىعى بار ەمەس پە? ايتپاقشى, بۇل تولەن توقتاسىنوۆتىڭ سوتتاعى العاشقى جەڭىلىسى ەمەس. وعان بىلتىر دا جالا جابۋ ءىسى بويىنشا اكىمشىلىك سوت ونى ايىپتى دەپ تانىعان ەدى. الماتى سوتى ول كەزدە بىلاي دەپ جازدى:«ت.م.توحتاسىنوۆ 2023 جىلى 2 قاڭتاردا «Youtube» əلەۋمەتتىك تەلەكوممۋنيكاتسيا جەلىسىن پايدالانا وتىرىپ, جارىق كورگەن «Adyrna Ulttyq Portaly» سۇحبات بەرۋ بارىسىندا ادامدى سىبايلاس جەمقورلىق, اۋىر نەمەسە اسا اۋىر قىلمىس جاسادى دەپ ايىپتاۋ مەن جəبىرلەنۋشى گ.ب. جاكيانوۆتىڭ بەدەلىن تۇسىرەتىن كورىنەۋ جالعان مəلىمەتتەر تاراتقان».
ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ قىزبالىقپەن جاسالعان مالىمدەمەسى ودان ارمەن بىلاي جالعاسقان.
«ءبىزدىڭ ەلدە ءادىل سوت جوق، ونىڭ شەشىمىنە قالاي سەنەمىز؟» دەپ سۇراق قويۋىڭىز دا مۇمكىن. ارينە, ساياسي تاپسىرىس بولعان جەردە سوت ادىلدىك قاعيداسىنا ەمەس, بيلىكتىڭ بۇيرىعىنا باعىنىپ جاتادى. بىراق, قازىر جاقيانوۆ تا, توقتاسىنوۆ تا بيلىكتە ەمەس. بار گاپ, ءبىزدىڭ ويىمىزشا, توقتاسىنوۆ اقپارات كەڭىستىگىنە شىعىپ, بۇرىنعى سەرىگىن قارالاپ, سول ارقىلى جاقيانوۆقا قىسىم كورسەتۋگە بەكىنۋىندە بولعان سياقتى. بىراق, عالىمجان جاقيانوۆ وعان كونبەدى. ءوزىنىڭ اق ەكەنىن تولىق دالەلدەپ شىقتى. ءبىر ايتا كەتەرلىگى, الاتاۋ اۋداندىق سوتىنىڭ قاۋلىسىنا ءالى اپەللياتسيالىق شاعىم تۇسىرۋگە بولادى. الماتى قالالىق سوتىندا قارالاتىن پروتسەستى ءبىز دە قاداعالايمىز»,- دەگەن پىكىرلەرگە قاراپ، بۇل مالىمدەمەدەن سۋبەكتيۆتى سارىن بايقايسىز.
ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ بۇل مالىمدەمەسىن وسى كۇيدە قابىلداساق، بيۋرونىڭ جۇمىسى قۇقىق بۇزۋشىلىقتى باعالاۋ ەمەس، بەلگىلى ءبىر تۇلعالاردى جاقتاۋ ما دەگەن ويعا كەلەسىڭ.
بالكىم، بيۋرو باسشىلىعى قازاقشا جاريالانعان بۇل مالىمدەمەدەن ازىرگە حابارسىز دا شىعار.
نە بولسا دا، ازىرگە ءبىر قايناۋى كەم مۇنداي مالىمدەمە ادام قۇقىعىن قورعايدى، ءسوز ەركىندىگى مەن ءباسپاسوز بوستاندىعىنا جاناشىر بولادى دەگەن حالىقارالىق ۇيىمنىڭ قازاقستانداعى بەدەلى مەن رەپۋتاتسياسىنا كولەڭكە تۇسىرەتىنىن ايتۋمەن عانا شەكتەلەمىز.
ارمان اۋباكىر
«ادىرنا» ۇلتتىق پورتالىنىڭ نەگىزىن قالاۋشى
