كاسىپكەر عالىمجان جاقيانوۆتىڭ «ادىرنا» ۇلتتىق پورتالىنىڭ ۇستىنەن جانە وسى سايتقا سۇحبات بەرگەن تولەن توقتاسىنوۆتىڭ ۇستىنەن بەرگەن شاعىمى بويىنشا سوت شەشىمىنە حالىقارالىق ازاتتىق راديوسى دا نازار اۋداردى، دەپ حابارلايدى «ادىرنا».
ازاتتىقتىڭ حابارلاۋىنشا, 4 ناۋرىزدا الماتى قالاسىنىڭ الاتاۋ اۋداندىق سوتى ساياساتكەر، پاۆلودار وبلىسىنىڭ بۇرىنعى اكىمى عالىمجان جاقيانوۆتىڭ ساياساتكەر تولەن توقتاسىنوۆ پەن "ادىرنا" پورتالى ۇستىنەن تۇسىرگەن ارىزىن جارتىلاي قاناعاتتاندىرعان.
Sud.kz سايتىندا جاريالانعان سوت شەشىمىنە قاراعاندا، سوت تولەن توقتاسىنوۆتى 2 قاڭتار 2023 جىلى "ادىرنا" پورتالى جانە YoutTube-تا جاريالانعان "عالىمجان جاقيانوۆقا سەنىپ ەدىم" اتتى ۆيدەوسۇحباتتاعى ايتىلعان كەيبىر تۇجىرىمداردى تەرىستەۋدى مىندەتتەگەن. شەشىمدە سۇحباتتان بىرنەشە ءۇزىندى كەلتىرىلەدى. سوت ولاردى "شىندىققا جاناسپايدى" دەپ تانىعان. شەشىمگە سايكەس پورتال سول سۇحباتتى وشىرۋگە ءتيىس. ودان بولەك، توقتاسىنوۆ مورالدىق شىعىن رەتىندە جاقيانوۆقا 200 مىڭ تەڭگە (447 دوللار) تولەۋى كەرەك.
تاراپتاردىڭ ءبىر اي ىشىندە شەشىمدى اپەللياتسياعا بەرۋىنە قۇقىعى بار. تولەن توقتاسىنوۆتىڭ ادۆوكاتى گاۋحار سالىمباەۆا "رەسپۋبليكا" سايتىنا شەشىمدى اپەللياتسياعا بەرەتىنىن ايتقان.
"رەسپۋبليكا" سايتىنىڭ جازۋىنشا، جاقيانوۆ پەن توقتاسىنوۆ اراسىنداعى داۋ موڭعوليالىق ALGT كومپانياسىمەن بايلانىستى. سوتقا تۇرتكى بولعان 2023 جىلدىڭ باسىندا جاريالانعان داۋلى سۇحباتتا توقتاسىنوۆ موڭعوليانىڭ اقپارات قۇرالدارىنداعى ماتەريالدارعا جانە ىسكەرلىك قۇجاتتارعا سۇيەنە وتىرىپ، جاقيانوۆتى "زاڭسىز بيزنەس جۇرگىزدى" دەپ ايىپتاعان. ال سۇحباتتا جالعان مالىمەتتەر بارىن ايتقان جاقيانوۆ سۇحباتتى جاريالاعان پورتال مەن توقتاسىنوۆتى سوتقا بەرگەن.
ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ جازۋىنشا، سوتتا جاقيانوۆ تارابى "سۇحباتتا كەلتىرىلگەن ءبىراز سوزدەر" شىندىققا جاناسپايتىنىن "قۇر سوزبەن ەمەس، ناقتى مالىمەتتەرمەن، قۇجاتتارمەن جانە كۋاگەرلەردىڭ دەرەكتەرىمەن دالەلدەپ شىققان".
ال توقتاسىنوۆ سوتتا "رەسپۋبليكا" سايتىنىڭ جازۋىنشا، "سۇحباتتا كەلتىرگەن دەرەكتەردى اشىق دەرەككوزدەردەن" العانىن ايتىپ، جاقيانوۆتىڭ ار-نامىسىنا نۇقسان كەلتىرگەنىن جوققا شىعارعان. "ادىرنا" پورتالى وكىلدەرى سوتتا "توقتاسىنوۆ بۇعان دەيىن شىندىققا جاناسپايدى دەپ تانىلماعان سۋبەكتيۆتى پىكىرىن جەتكىزگەنىن", جاقيانوۆقا دا ءوز پىكىرىن ايتۋعا مىنبەر ۇسىنعانىن ايتقان.
جەرگىلىكتى باق-تىڭ جازۋىنشا، جاقيانوۆ پەن توقتاسىنوۆ العاش رەت سوتتاسىپ وتىرعان جوق. بىلتىر الماتى اكىمشىلىك سوتى "جالا جابۋ ءىسى" بويىنشا توقتاسىنوۆتى ايىپتى دەپ تانىعان. "رەسپۋبليكا" سايتىنىڭ جازۋىنشا، جۋىردا الماتىنىڭ مەدەۋ اۋداندىق سوتى جاقيانوۆتىڭ توقتاسىنوۆتىڭ ايەلى الما توقتاسىنوۆانىڭ ۇستىنەن تۇسىرگەن ارىزىن قاناعاتتاندىرماعان. سوتقا جاۋاپكەردىڭ ALGT توڭىرەگىندەگى داۋ تۋرالى جازعان Facebook-تاعى جازبالارى تۇرتكى بولعان.
عالىمجان جاقيانوۆ پەن تولەن توقتاسىنوۆ - 2001 جىلى سول كەزدەگى پرەزيدەنت نۇرسۇلتان نازارباەۆتىڭ رەجيمىن سىناپ، ەلدە تىڭ ساياسي رەفورمالار جۇرگىزۋ تۋرالى باستاما كوتەرگەن «قازاقستاننىڭ دەموكراتيالىق تاڭداۋى» وپپوزيتسيالىق قوزعالىسىن قۇرۋشىلاردىڭ ءبىرى. قوزعالىس وكىلدەرى سول كەزدە قۋعىندالىپ، ۇيىمنىڭ ءوزى كەيىن تاراپ كەتكەن ەدى.
PS: بەلگىلى بولعانىنداي، 4 ناۋرىزدا جاريالانعان شەشىمدە سوت عالىمجان جاقيانوۆتىڭ «ادىرناعا» قويعان قارجىلىق تالابىن قاناعاتتاندىرماعان. الايدا سوت جاقيانوۆ تۋرالى ايتقان توقتاسىنوۆتىڭ سۇحباتىن پورتالدىڭ يۋتۋب ارناسىنان الىپ تاستاۋعا جانە سوندا ايتىلعانداردى جوققا شىعارۋعا مىندەتتەگەن. بۇل تۋرالى ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسى عالىمجان جاقيانوۆتىڭ ارىزى بويىنشا جۇرگىزىلگەن سوت شەشىمىن «جاقيانوۆتىڭ ار-نامىسىن قورعاۋى» رەتىندە باعالادى. سول رەتتە بيۋرونىڭ رەسمي سايتىندا 6 ناۋرىزدا «جاقيانوۆ ار نامىسىن قورعاپ شىقتى» دەگەن مالىمدەمە جاريالاندى.
“ادىرنا” ۇلتتىق پورتالىنىڭ باسشىسى، ۆيدەوماتەريالدا توقتاسىنوۆپەن سۇحباتتاسقان جۋرناليست ارمان اۋباكىر سوت شەشىمىنە قاناعاتتانبايتىنىن ايتقان. ال ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ وسى سوت شەشىمىنە بايلانىستى تولىق ەمەس، بىرجاقتى مالىمەتتەردى تەرىپ تاراتۋىن «ادىرنا» «ادام قۇقىعىن قورعايدى، ءسوز ەركىندىگى مەن باسپاسوز بوستاندىعىنا جاناشىر بولادى دەگەن حالىقارالىق ۇيىمنىڭ قازاقستانداعى بەدەلى مەن رەپۋتاتسياسىنا كولەڭكە تۇسىرەتىن» ارەكەت رەتىندە قابىلداعان.
«ادىرنا» ۇلتتىق پورتالى
