سەنات توراعاسى ماۋلەن اشىمباەۆ كايردەگى سۇلتان بەيبارىس مەشىتىنىڭ اشىلۋىنا قاتىسىپ، پرەزيدەنت قۇتتىقتاۋىن جەتكىزدى، دەپ حابارلايدى "ادىرنا" پورتالى.
مەملەكەت باسشىسى ءوز قۇتتىقتاۋىندا ۇلى بابامىز ەرجۇرەكتىگىمەن بىرگە وركەنيەتتىڭ ءورىسىن كەڭەيتۋ جولىندا دا وشپەس ءىز قالدىرعانىن جەتكىزدى.
"قازاقستان پرەزيدەنتى قاسىم-جومارت كەمەلۇلى توقاەۆ بەيبارىس سۇلتاننىڭ 800 جىلدىعىنا ارنالعان ءىس-شارالارعا قاتىسۋشىلارعا ءوزىنىڭ جىلى لەبىزىن جولدادى. مەملەكەت باسشىسى بۇل مەرەيتويدى جوعارى دەڭگەيدە اتاپ وتۋگە باسا ءمان بەرىپ وتىر. مەرەيلى داتا اياسىندا 600-دەن استام ءىس-شارا ۇيىمداستىرىلادى. بۇگىن كۇردەلى جوندەۋدەن كەيىن قايتا اشىلىپ وتىرعان «سۇلتان از-زاھير بەيبارىس» مەشىتى مىسىر مەن قازاقستان ءۇشىن عانا ەمەس، يسلام الەمى ءۇشىن دە بىرەگەي مادەني مۇرا ەكەنى انىق", دەدى ماۋلەن اشىمباەۆ سويلەگەن سوزىندە.
سەنات توراعاسى ەكى ەلدىڭ تىعىز بايلانىسىنداعى ماڭىزدى باعىتتاردىڭ تاعى ءبىرى تەولوگيالىق ءبىلىم ەكەنىن تىلگە تيەك ەتتى. بۇل رەتتە قازاقستاندىق ءدىنتانۋشىلاردىڭ ۇزاق جىلدار بويى ءال-ازھار ۋنيۆەرسيتەتىندە ءبىلىم الىپ، ءوز بىلىكتىلىكتەرىن ارتتىرىپ كەلە جاتقانىن ايتقان ابزال.
ساپار بارىسىندا ماۋلەن اشىمباەۆ مىسىر پارلامەنتى سەناتىنىڭ توراعاسى ابدەل ۋاحاب ابدەل رازەكپەن دە كەزدەستى. كەزدەسۋدە ول مىسىر قازاقستاننىڭ يسلام الەمىندەگى ماڭىزدى جانە سەنىمدى سەرىكتەسى ەكەنىنە توقتالىپ، الداعى ۋاقىتتا ءبىزدىڭ ەل كوپجاقتى بايلانىستى ودان ءارى دامىتۋعا مۇددەلى ەكەنىن جەتكىزدى. سەنات سپيكەرى ءوزارا ىنتىماقتاستىقتى ارتتىرۋ جولىندا پارلامەنتارالىق بايلانىستىڭ ءرولى ماڭىزدى ەكەنىن ايتتى.
