استانادا ءۇش جاڭا كاسساتسيالىق سوت پايدا بولادى، دەپ حابارلايدى “ادىرنا” ۇلتتىق پورتالى.
«مەملەكەت باسشىسى «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا قول قويدى»، - دەپ حابارلايدى اقوردانىڭ ءباسپاسوز قىزمەتى.
تۇزەتۋلەرگە سايكەس، استانادا قىلمىستىق، ازاماتتىق جانە اكىمشىلىك ىستەر بويىنشا ءۇش كاسساتسيالىق سوت قۇرىلادى.
سونداي-اق، قاسىم-جومارت توقاەۆ بىرنەشە زاڭدارعا قول قويدى.
“مەملەكەت باسشىسى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ادام ساۋداسىنا، ۆانداليزم كورىنىسىنە جانە بوتەننىڭ مۇلكىن بۇلدىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى” دەلىنگەن حابارلامادا.
زاڭ پرەزيدەنت قاسىم-جومارت توقاەۆتىڭ ادام ساۋداسىنا قارسى ءىس-قيمىل شارالارىن كۇشەيتۋ، سونداي-اق ۆانداليزم مەن قوعامدىق ءتارتىپتى بۇزعانى ءۇشىن جاۋاپكەرشىلىكتى قاتاڭداتۋ جونىندەگى تاپسىرماسىن جۇزەگە اسىرۋعا باعىتتالعان.
بالالاردى، اسىرەسە، جاڭا تۋعان نارەستەلەردى ساتۋ فاكتىلەرىنە توسقاۋىل قويۋ ءۇشىن اكىمشىلىك قۇقىق بۇزۋشىلىق تۋرالى كودەكس جاڭا باپپەن تولىقتىرىلدى. اتالعان نورما جاڭا تۋعان بالانى تاستاپ كەتۋ، جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ كەلىپ ءتۇسۋى جانە جەتكىزىلۋى تۋرالى فاكتىلەردى حابارلاماعانى ءۇشىن لاۋازىمدى تۇلعالارعا جاۋاپكەرشىلىك جۇكتەيدى (135-1).
سونىمەن قاتار وسى زاڭ ارقىلى عيماراتتاردى، وزگە دە قۇرىلىستاردى، تۇرعىن ءۇي-جايلاردى، ورتاق پايدالانۋ ورىندارىن، كولىكتەگى جانە وزگە دە قوعامدىق ورىندارداعى مۇلىكتى ءبۇلدىرۋ سياقتى ۇساق بۇزاقىلىقتار ءۇشىن جاۋاپكەرشىلىك كۇشەيتىلدى.
سونداي-اق مۇلىكتى جويعانى نەمەسە بۇلدىرگەنى (ۆانداليزم) ءۇشىن اكىمشىلىك جازا قاتاڭداتىلدى.
زاڭنىڭ ءماتىنى باسپاسوزدە جاريالانادى.
