الەۋمەتتىك جەلىلەردە باس پروكۋراتۋرانىڭ جامبىل وبلىسى بويىنشا قۇقىق قورعاۋ ورگاندارىنىڭ قىزمەتىن ۇيلەستىرۋ دەپارتامەنتىنىڭ قازىرگى قىزمەتكەرى ءاليا قوجابەكوۆانىڭ بەينەۇندەۋى تارادى. ول ۆيدەودا قازاقستان پرەزيدەنتى قاسىم-جومارت توقاەۆقا ۇندەۋ جولداپ، باسشىلىق تاراپىنان زاڭسىز ارەكەتتەرگە جول بەرىلىپ جاتقانىن مالىمدەدى, دەپ حابارلايدى “ادىرنا” ۇلتتىق پورتالى.
قوجابەكوۆانىڭ ايتۋىنشا، دەپارتامەنت باسشىلىعى بىرىڭعاي تەرگەۋ تىزىلىمىنەن كەيبىر مالىمەتتەردى قاساقانا جويىپ، ىشكى ىستەر ورگاندارىنىڭ قىلمىستاردى اشۋ ستاتيستيكاسىنا اسەر ەتۋدە.
ول 2013 جىلى بولعان وقيعانى بايانداپ بەردى.
"مەن ەڭبەك دەمالىسىنا كەتكەنمىن. سول ۋاقىتتا دەپارتامەنت قىزمەتكەرلەرى مالىمەتتەر بازاسىنان قىلمىستىق جاۋاپقا تارتىلعان ادامدار تۋرالى اقپاراتتى ءوشىرىپ تاستاعان. ەڭبەك دەمالىسىنان كەلگەننەن كەيىن قىزمەتتىك تەكسەرىس ءجۇرىپ، مەنى كىنالى ەتىپ، مەنى ءبولىم باسشىسى قىزمەتىمنەن الىپ تاستادى. مەن سوتقا جۇگىنىپ، جەڭدىم. سودان بەرى ماعان جۇمىستا كۇن كورسەتپەيدى. مەنى كىشكەنتاي بالاممەن بىرگە ءارتۇرلى اۋداندارعا "جەر اۋدارىپ" جەبىرگەندەي بولدى", دەيدى ءاليا قوجابەكوۆا.
ونىڭ سوزىنشە، باسشىلىق بۇل جايتتان حاباردار بولعان. ءاليا 11 جىلدان كەيىن قۇقىق قورعاۋ ورگاندارىنىڭ قىزمەتىن ۇيلەستىرۋ دەپارتامەنتىنە ورالعان.
"قايتىپ كەلگەنىمدە بىرىڭعاي تەرگەۋ تىزىلىمىنەن كەيبىر مالىمەتتەردى قاساقانا جويۋ دەرەكتەرى ءالى بولىپ جاتقانىن انىقتادىم", دەيدى ءاليا.
ونىڭ ايتۋىنشا، بۇل قىزمەتكەرلەر ءوز ارەكەتتەرىن اقتاۋ ءۇشىن جامبىل وبلىستىق پوليتسيا ورگاندارىنىڭ پروكۋراتۋراعا جولداعان راپورتتارىن سىلتاۋ ەتكەن. الايدا، كوپ جاعدايدا بۇل كۇماندى راپورتتار پروكۋراتۋرانىڭ كەڭسەسىنە (كانتسەليارياسىنا) مۇلدە تىركەلمەگەن دە بولاتىن، ياعني رەسمي تۇردە قابىلدانباعان.
ول ىسكە قاتىسى بار بىرنەشە باسشىنىڭ اتىن اتايدى. قوجابەكوۆانىڭ ايتۋىنشا، باس پروكۋروردىڭ قۇجات اينالىمى بويىنشا بۇيرىعىنا سايكەس، قۇقىقتىق ستاتيستيكا ورگاندارىنا بارلىق قۇجاتتار تەك «قاداعالاۋ» اقپاراتتىق جۇيەسى ارقىلى عانا جولدانۋى ءتيىس. الايدا بۇل تالاپ ءجيى ەلەنبەي، رۇقساتسىز تۇزەتۋلەر ەنگىزىلگەن، جانە بۇل ىشكى ىستەر ورگاندارىنىڭ "جاقسى" ستاتيستيكاسىن قامتاماسىز ەتۋگە باعىتتالعان.
"بۇل ارەكەتتەرگە مەنى كىنالى ەتپەك بولدى، بىراق ولار ونى جۇزەگە اسىرا المادى، سەبەبى ەڭ ءبىرىنشى بولىپ مەن ءوزىم باسشىلىققا راپورتپەن جۇگىندىم", دەيدى ءاليا قوجابەكوۆا.
ونىڭ ايتۋىنشا، دەرەكتەر بازاسىنان ەشقانداي نەگىزسىز قۇجاتتارسىز قالتا ۇرلىقتارى تۋرالى ىستەر جويىلعان، سونداي-اق قوعامدىق ورىنداردا جاسالعان قىلمىستار، ماس كۇيدە جاسالعان قۇقىقبۇزۋشىلىقتار دا ەسەپتەن الىنىپ تاستالعان.
