مەملەكەت باسشىسى قاسىم-جومارت توقاەۆ الماتى قالاسىنا جۇمىس ساپارى بارىسىندا تۇرعىندارمەن كەزدەسىپ، قاڭتار وقيعاسى تۋرالى ايتتى، دەپ حابارلايدى “ادىرنا” ءتىلشىسى.
«قاسىرەتتى قاڭتار ەلىمىز ءۇشىن زور سىناق بولدى. قاساقانا ارەكەت ەتكەن قاراقشىلار توبى مەملەكەتتىگىمىزدىڭ تۇعىرىن شايقالتۋعا تىرىستى، ەلدەگى تۇراقتىلىقتىڭ تامىرىنا بالتا شاپقىسى كەلدى. ءبىز بۇل جەردە ءبىر ماسەلەنىڭ باسىن اشىپ الۋىمىز كەرەك. بەيبىت شەرۋلەردىڭ سەبەبى – ءبىر بولەك. ال، مەملەكەتتىك توڭكەرىس جاساعىسى كەلگەندەردىڭ ماقساتى – مۇلدە باسقا.
قاڭتار وقيعاسىنىڭ استارىنا ۇڭىلسەك، ونىڭ سەبەپتەرى ايقىن كورىنەدى. ەلىمىزدە ۇزاق ۋاقىت الەۋمەتتىك ادىلدىك نازاردان تىس قالدى. مەملەكەت پەن قوعامنىڭ اراسى الشاقتاپ كەتتى. جىلدار بويى شەشىلمەگەن الەۋمەتتىك-ەكونوميكالىق ماسەلەلەردەن جۇرت ابدەن قاجىدى. بۇل – تۇسىنىكتى جايت. الايدا، قىلمىسكەرلەردىڭ كوزدەگەنى باسقا ەدى. ولار بەيبىت شەرۋدى جاپپاي تارتىپسىزدىككە اينالدىرعىسى كەلدى. الدىن-الا ازىرلەگەن ارانداتۋشىلار، بۇزاقىلار، ءتىپتى قاراقشىلاردى پايدالاندى»، – دەدى توقاەۆ.
پرەزيدەنت قاڭتار وقيعاسى كەزىندە الماتىداعى جاعداي كۇرت ناشارلاپ، ءتىپتى، باقىلاۋدان شىققانىن ايتتى.
قىلمىسكەرلەر اكىمشىلىك عيماراتتاردى باسىپ الدى. كوشەلەردى جاۋىپ، جولىندا كەزدەسكەننىڭ ءبارىن قيراتتى، تونادى. قىسقاسى، ويلارىنا نە كەلسە، سونى ىستەدى. بىراق، قانداي جاعداي بولسىن، ازاماتتارىمىز، ەڭ باستىسى، الماتىنىڭ اسقاق رۋحىن قۇلاتقان جوق. قالا تۇرعىندارى جۇدىرىقتاي جۇمىلدى، سۇيىكتى قالاسىن قورعاپ قالۋ ءۇشىن بىرىكتى. ارينە، سودىرلاردىڭ مۇندايدى كۇتپەگەنى ايدان انىق، – دەپ قوستى پرەزيدەنت.
پرەزيدەنت قازىر كەيبىرەۋلەر قاڭتارداعى قىلمىستىق ارەكەتتى حالىق كوتەرىلىسى دەپ اقتاۋعا تىرىسىپ جۇرگەنىن دە اتاپ ءوتتى.
«ەلىمىزدىڭ التىن بەسىگى – الماتىنى قيراتىپ جاتقانى وسى قالانىڭ پەرزەنتى رەتىندە مەنىڭ دە جانىما باتتى. دەگەنمەن، ءدال سول ساتتە ابدىراپ، ۋاقىت ۇتتىرۋعا ەش قاقىمىز بولعان جوق. وندا ابدەن داندايسىپ كەتكەن قاراقشىلار قالامىزدى كۇل-تالقان ەتەر ەدى.
ەل تاعدىرى سىنعا تۇسكەن جاۋاپتى ساتتە حالقىمىز مىزعىماس بىرلىگى مەن قايتپاس قايسارلىعىن تانىتتى. مەملەكەتتىگىمىزدى ساقتاپ قالۋ ءۇشىن ءبىز قانداي تاۋەكەلگە دە باراتىنىمىزدى ايقىن كورسەتتىك. سول قيىن كۇندەردە بۇكىل قازاقستان حالقى الماتىلىقتاردىڭ تىلەۋىن تىلەدى. وكىنىشكە قاراي، قازىر كەيبىرەۋلەر قىلمىستىق ارەكەتتى حالىق كوتەرىلىسى دەپ اقتاۋعا تىرىسىپ ءجۇر.
تاعى دا ايتامىن: حالىقتىڭ بەيبىت شەرۋى مەن قاراقشىلار جاساعان قاندى قىلمىستىڭ اراسىن اجىراتا ءبىلۋ كەرەك. ءبىز جەدەل جانە باتىل ارەكەت جاساعاننىڭ ارقاسىندا ەل ىشىندە دەرەۋ ءتارتىپ ورناتتىق. قابىلداعان شەشىمدەرىمىز جانە ءىس-ارەكەتىمىز بۇكىل دۇنيە جۇزىندە تۇسىنىستىكپەن مويىندالدى، ءتىپتى، قولداۋ تاپتى»، – دەدى ول.
