اقتوبەدە سوت ەكى جەرگىلىكتى تۇرعىندى جانە شىمكەنت قالاسىنىڭ ءبىر تۇرعىنىن راديواكتيۆتى ۋراندى ساتقانى ءۇشىن باس بوستاندىعىنان ايىرۋ جازاسىنا كەستى. بۇل تۋرالى «دياپازون» باسىلىمى جازدى، دەپ حابارلايدى “ادىرنا”.
قىلمىستىق ءىس ماتەريالدارىنا سايكەس، وزبەكستان ازاماتى زاڭسىز جولمەن سالماعى 958,7 گرامم بولاتىن ازايتىلعان ۋراندى ساتىپ العان. كەيىن ول شىمكەنتتە تۇراتىن تانىسى رۋدولفقا راديواكتيۆتى زاتتى ساتۋ مۇمكىندىگى بار ەكەنىن ايتقان. ال رۋدولف بۇل تۋرالى ءوز كەزەگىندە اقتوبە قالاسىنىڭ تۇرعىندارى قونىسباي مەن ەركىنگە جەتكىزگەن. ولار ءوز ورتالارىندا ۋراندى ساتىپ الاتىن ادامداردى ىزدەي باستاعان.
قىركۇيەك ايىندا وزبەكستان ازاماتى ازايتىلعان ۋراندى رۋدولفقا بەرگەن، ال ول تاۋاردى ەركىن مەن قونىسبايعا تاپسىرعان. ولار ۋراندى Chevrolet Tracker اۆتوكولىگىنىڭ جۇك سالعىشىندا شىمكەنتتەن اقتوبەگە الىپ كەلگەن.
بۇل جاعداي تۋرالى ۇقك-گە ءمالىم بولىپ، ارنايى قىزمەت ءىستى باقىلاۋعا الىپ، جالعان ساتىپ الۋشىنى ىسكە قوسقان. وعان 500 مىڭ دوللاردان ءسال اساتىن سوماداعى اقشا بەرىلگەن. وسى «ساتىپ الۋشى» ۋران ساتۋشىلارىمەن قالا سىرتىنداعى ورمان القابىندا كەزدەسكەن.
ۇقك جۇرگىزگەن ارنايى وپەراتسيا ناتيجەسىندە شىمكەنت تۇرعىنى مەن ەكى اقتوبەلىك ۇستالدى. تاركىلەنگەن زات ساراپتاماعا جىبەرىلىپ، ونىڭ راديواكتيۆتى زاتتان جاسالعانى جانە ۋران ەكەنى انىقتالدى. سوتتا ءۇش ادام دا ءوز كىنالارىن مويىندادى.
سوت ۇكىمىمەن ۋران ساتقانى ءۇشىن ەكى اقتوبەلىك ەكى جىلعا باس بوستاندىعىنان ايىرىلدى. ال شىمكەنتتەن كەلگەن سىبايلاسى بۇرىن سوتتالعاندىقتان، التى ايعا ۇزاق مەرزىمگە سوتتالدى. سوت شەشىمىنە سايكەس، ۋران جويىلاتىن بولدى.
