بيىل «Almaty» تەلەارناسىنا 25 جىل تولدى. وتاندىق مەديايندۋستريانىڭ دامۋىنا ۇلەس قوسىپ كەلە جاتقان تەلەارنا اقپارات ايدىنىندا ەرەكشە ورىن الادى. مەرەيتوي اياسىندا وت اۋىزدى، وراق ءتىلدى جۋرناليستەردىڭ ۇستاحاناسىنا اينالعان تەلەارنانىڭ تاريحىنا توقتالىپ، بولاشاق جوسپارىن ءبىلۋدى ءجون كوردىك. سۇراقتارعا جاۋاپ الۋ ءۇشىن «Almaty» تەلەارناسى باس ديرەكتورىنىڭ ورىنباسارى يلزات اكچۋريندى سوزگە تارتتىق.
– يلزات مىرزا، Almaty TV-نىڭ 25 جىلدىق مەرەيتويىمەن «ادىرنانىڭ» اتىنان قۇتتىقتايمىز! وسىعان وراي تەلەارنانىڭ تاريحىنا توقتالا كەتسەڭىز؟
- سىمبات، راقمەت! «ادىرنا» ۇجىمىن دا كاسىبي مەرەكەمەن قۇتتىقتايمىن!
«وڭتۇستىك استانا» تەلەراديوكومپانياسى» اق «الماتى قالالىق تەلەراديوكومپانياسى» 1999 جىلى 14 ساۋىردە تىركەلدى. بۇقارالىق اقپارات قۇرالدارىنىڭ تىزىمىنە العاش رەت 1999 جىلى 30 ساۋىردە ەندى. سوندىقتان تەلەارنانىڭ تۋعان كۇنى 30 ءساۋىر بولىپ ەسەپتەلەدى.
1999 جىلى قۇرىلعان Almaty TV– ەلىمىزدەگى بۇرىننان كەلە جاتقان تەلەارنالاردىڭ ءبىرى. سول كەزدەگى ايماقتىق رەسۋرستىڭ العاشقى ەفيرى نەبارى 3 ساعات بولعان ەدى. سپەكتاكلدەر، فيلمدەر، سونداي-اق جاڭالىقتار ەكسپەريمەنت رەتىندە تاراتىلدى. شىعارماشىلىق توپتىڭ كۇش-جىگەرى مەن ەرەن ەڭبەگىنىڭ ارقاسىندا تەلەارنا بىرتىندەپ كورەرمەننىڭ كوڭىلىنەن شىعىپ، ىستىق ىقىلاسىنا بولەنە باستادى.
– العاشقى ەفير تۋرالى ايتىپ قالدىڭىز. قاتەلەسپەسەم، ءبىرىنشى شىعارىلىم 2000 جىلدىڭ 6 شىلدەسىندە بولىپتى. سول كەزدەگى ەفيردەن بەرىلگەن حابار تۋرالى نە ايتۋعا بولادى؟
- ءيا، العاش رەت الماتى تەلەارناسى 2000 جىلدىڭ 6 شىلدەسىندە ەفيرگە شىققان ەكەن. ول كەزدە ارنا اتاۋى «وڭتۇستىك استانا» بولدى. وزدەرىڭىزگە بەلگىلى، سول ۋاقىتتا ايماقتىق ارنا رەتىندە جۇمىس ىستەگەن تەلەارنانىڭ العاشقى ەفيرى بار-جوعى 3 ساعاتقا سوزىلعان. سوندىقتان ءاۋ باستان-اق، باستى باعىت – مەگاپوليستىڭ تىنىس-تىرشىلىگىنەن حاباردار ەتۋ بولعان. ال ارنادان العاشقى جىلدارى كورسەتىلگەن «سۆەتوفور»، «سويىل»، «ەكولوگيا بەكەتى»، «ستوليچنىە رەبياتا»، «كوممۋنالكا»، «مەنىڭ قالام»، «تاريح بەزبەنى»، «ءانشى بولعىم كەلەدى» سىندى باعدارلامالار كوپشىلىكتىڭ كوڭىلىنەن شىقتى. ونى ءوزىمىز دە كوردىك، سول كەزدە قىزمەت اتقارعان جاستار، جاس تىلشىلەر قازىر اعا بۋىن وكىلدەرىنە اينالدى. ولاردان كەيىن دە بۇل ارنادا كوپتەگەن جاستار ەڭبەك ەتتى. ول ادامداردىڭ ءبارى بۇگىندە ۇلكەن باسىلىمداردىڭ، اقپارات اگەنتتىكتەرىنىڭ بەلدى وكىلدەرىنە اينالىپ ۇلگەردى.
– ءيا، شىنىمەن تەلەارنانىڭ تاريحى باي ەكەن. ال 25-جىلدىق مەرەيتويدى قالاي اتاپ ءوتىپ جاتىرسىزدار؟ سوعان توقتالساڭىز.
- ءبىز Almaty TV-نىڭ 25-جىلدىق مەرەيتويىن ءساۋىر ايىندا اتاپ وتەمىز دەپ جوسپارلاعانبىز. سەبەبى ارنانىڭ تۋعان كۇنى دە جوعارىدا ايتقانىمداي 30 ءساۋىر. بىراق، وزىڭىزگە ءمالىم سول كەزدە ەلىمىزدىڭ بىرنەشە وڭىرىندە سۋ تاسقىنى بولىپ، توتەنشە جاعداي جاريالاندى. حالقىمىزدىڭ باسىنا قيىندىق ءتۇسىپ جاتقان كەزدە، اۋىلداردىڭ تۇرعىندارى ۇيىنەن ايىرىلىپ، قينالىپ جاتقاندا تەلەارنامىزدىڭ 25-جىلدىعىن تويلاۋدى ءجون كورمەدىك. كەرىسىنشە، ەل ەسىن جيسىن، جاعداي تۇراقتالسىن دەپ بىرنەشە رەت ۋاقىتتى شەگەردىك.
سول كەزدە ارىپتەستەردىڭ وزدەرى دە سۋ باسقان ايماقتاردا ءجۇرىپ، بارىنشا اقپارات تاراتتتى. بۇدان بولەك تەلەارنامىزدىڭ ۇجىمى گۋمانيتارلىق كومەككە قارجى جيناپ، زارداپ شەككەن وڭىرلەرگە قاجەتتى زاتتار جىبەردى. «تامشىدان تەڭىز قۇرالادى» دەگەندەي، مۇنىڭ ءوزى قيىن ساتتە قالعان اعايىننىڭ كادەسىنە جارادى دەگەن ۇمىتتەمىز. باستىسى وسىنداي شاقتاردا ءبىر جاعادان باس، ءبىر جەڭنەن قول شىعارۋ ماڭىزدى ەكەنىن تۇسىنگەن ءجون.
سونىمەن قاتار تەلەارنامىز 30 ساۋىردە تىكەلەي ەفيردە ۇيىمداستىرىلعان 5 ساعاتتىق جالپىۇلتىق تەلەمارافونعا قاتىستى. بۇل جاعدايدا ءبىزدىڭ ۇجىم سۋ تاسقىنى سالدارىمەن كۇرەسكەن مەملەكەتتىك ورگاندار قىزمەتكەرلەرىنىڭ، قۇتقارۋشىلاردىڭ، اسكەرلەردىڭ جانە دە قاراپايىم وتانداستارىمىزدىڭ ەرلىگىن كورسەتۋدى ءجون كوردى.
ال، نەگىزىنەن 25 جىلدىق مەرەيتويدا Almaty TV ەكى جاڭا تەلەۆيزيالىق ماۋسىممەن قۋانتپاق. ولاردىڭ ءبىرى كوكتەمدە ۇلىستىڭ ۇلى كۇنى – ناۋرىزدىڭ الدىندا كورەرمەنگە جول تارتقان ەدى. ەسىڭىزدە بولسا، مەملەكەت باسشىسى قاسىم-جومارت توقاەۆ «ەگەمەن قازاقستان» گازەتىنە بەرگەن كولەمدى سۇقباتىندا ناۋرىز مەرەكەسىنىڭ قازاقستاندىقتار ءۇشىن قانشالىقتى ماڭىزدى ەكەنىن اتاپ كورسەتتى.
«ناۋرىز - جاڭارۋدىڭ بەلگىسى، سوندىقتان ونى جاڭاشا: ەرەكشە ءبىر ەلەمەنتتەر ەنگىزىپ، ماعىنالى، كرەاتيۆتى تۇردە تويلاۋ كەرەك. بۇل قوعامنىڭ بىرىگۋىنە، ءبىزدىڭ ۇلتتىق بىرەگەيلىگىمىزدى نىعايتۋعا ىقپال ەتەرىنە سەنىمدىمىن»، - دەگەن ەدى ەل پرەزيدەنتى.
سونى ەسكەرە وتىرىپ كوكتەم مەن جاڭارۋ مەرەكەسىنىڭ قۇرمەتىنە ءبىزدىڭ تەلەارنا بىرقاتار وتاندىق كينو جانە انيماتسيا ونىمدەرىن دايىندادى. سونىمەن قاتار، كورەرمەندەر ءۇشىن سىيلىق ۇتىپ الۋ سياقتى كوپتەگەن توسىنسىيلار ازىرلەگەن بولاتىن.
بۇدان بولەك، ناۋرىزعا ارناپ تەلەارنا جارقىن ءارى رۋحتى باعدارلامالار جاسادى. ولاردىڭ ىشىندە «ءبىرجان-سارا ىزىمەن» ايتىسىنىڭ جالعاسى، «الماتى ءان قاناتىندا»، كورەرمەن كوزايىمىنا اينالعان مۋزىكالىق شوۋ «جۇلدىزدى كاراوكە»، «كەشكى الماتى» سياقتى باعدارلامالار بولدى.
- اڭگىمە باسىندا ايتقانداي، Almaty TV ۇجىمى ءۇشىن بيىل - ەرەكشە جىل. قىزمەتكەرلەر تۋرالى ايتساڭىز. بۇدان بولەك بىلەتىنىمىز بىلتىر Almaty TV-نىڭ ستۋديالىق پاۆيلونى جاڭارتىلدى جانە دە تەلەارنا رەسپۋبليكالىق مارتەبە الدى. تاعى قانداي وزگەرىستەر بولدى؟
- قازىرگى تاڭدا Almaty TV ۇجىمىندا 200-دەن استام ادام قىزمەت ەتەدى. شيرەك عاسىر بويى وتاندىق مەديايندۋستريانىڭ دامۋىنا ۇلەس قوسىپ كەلەدى.
ارنادا قىزمەت ىستەيتىن ءار مامانعا ەرەكشە كوڭىل بولىنەدى دەسەم ارتىق ەمەس. ونىڭ الەۋمەتتىك جاعدايىنان باستاپ، ايلىق جالاقىلارى دا كوتەرىلدى. ءبىر سوزبەن ايتقاندا جايلى جۇمىس ىستەۋىنە مۇمكىندىك جاساپ جاتىرمىز.
ال، وزگەرىستەگە كەلەتىن بولساق. وزدەرىڭىزگە بەلگىلى، 2022 جىلدىڭ تامىزىنان باستاپ Almaty TV رەسپۋبليكالىق مارتەبە الىپ، قازاقستان رەسپۋبليكاسىنىڭ اۋماعىندا تاراتىلاتىن ارنالار تىزىمىنە ەندى، ال اۋديتوريانى تەحنيكالىق قامتۋى 47 پايىزدان 89 پايىزعا ءوستى.
سول جىلى ارنانىڭ رەبرەندينگى جاسالدى. برەندتىڭ اشىق جاسىل تۇستە جاڭعىرتىلۋى Almaty TV ارناسىنىڭ جاڭا كەزەڭىن: ءداستۇرلى ەفيرلىك جانە تسيفرلىق ينتەرنەت-ورتانىڭ سينەرگياسىن بەينەلەدى. ءبىز «زاماناۋي كلاسسيكاعا» باسىمدىق بەردىك. بۇل تەلەۆيدەنيەنىڭ ەرەسەكتەر اۋديتورياسى مەن الەۋمەتتىك جەلى كونتەنتىن، ستريمينگتىك ونلاين-رەسۋرستاردى قولداناتىن جاس ۇرپاقتىڭ باسىن بىرىكتىرەرى ءسوزسىز.
سالىنعانىنا 7 جىل بولعاندا، ياعني، 2023 جىلى تەلەارنانىڭ باس ستۋديالىق پاۆيلونى جاڭارتىلدى. جاڭعىرتۋ اياسىندا زاماناۋي بەيىمدەلگىش دەكوراتسيالار جاسالىپ، العاش رەت پوليمەرلىك قۇيمالى جابىن پايدالانىلدى. ستۋديانىڭ پايدالى اۋماعى 2 ەسە ۇلكەيتىلدى. الماتى قالاسى اكىمدىگىنىڭ قولداۋىمەن جاڭادان ءتۇسىرۋ جانە مونتاجداۋ قۇرىلعىسى ساتىپ الىندى.
2024 جىل ءبىزدىڭ ۇجىم ءۇشىن ەرەكشە بولماق. سەبەبى، جوعارىدا دا اتاپ ءوتتىم، بيىل Almaty TV-نىڭ 25-جىلدىق مەرەيتويى. بىراق سوعان قاراماستان ءبىز بۇل داتانى قاراپايىم تۇردە اتاپ ءوتۋدى ءجون كوردىك. وتكەن ايدىڭ 19-ندا سالتاناتتى جيىن بارىسىندا ارنانىڭ بارلىق قىزمەتكەرىنە العىس حاتتار مەن ۆەدومستۆولىق ماراپات تاپسىرىلدى. وسى ورايدا ءبىزدىڭ سەرىكتەستەرىمىزگە، اسىرەسە الماتى قالاسى اكىمدىگىنە، مادەنيەت جانە اقپارات مينيسترىنە جانە الماتى قالاسى ءماسليحاتى مەن قوعامدىق كەڭەسىنە ريزاشىلىعىمىزدى بىلدىرەمىز.
سونىمەن قاتار، قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ Almaty TV ۇجىمىن تەلەارنانىڭ 25 جىلدىق مەرەيتويىمەن قۇتتىقتاپ، ارنايى حات جولدادى. مەملەكەت باسشىسى تىلەك حاتىندا تەلەارنانىڭ شيرەك عاسىر ىشىندە كوپتەگەن بىرەگەي جوبالاردى جۇزەگە اسىرىپ، يگى باستامالار الاڭىنا اينالعانىن اتاپ ءوتتى. Almaty TV ارناسىندا كورەرمەندەردىڭ كوڭىلىنەن شىققان اقپاراتتىق، ساراپتامالىق جانە مادەني-تانىمدىق باعدارلامالار از ەمەس.
«بۇگىندە «Almaty» تەلەارناسى ءوز اۋديتورياسى قالىپتاسقان رەسپۋبليكالىق مەدياقۇرىلىمعا اينالدى. ۇجىم وزىنە جۇكتەلگەن مىندەتتى ابىرويمەن اتقارىپ كەلەدى. سىزدەر الداعى ۋاقىتتا دا ەل مۇددەسى ءۇشىن قىزمەت ەتىپ، تەلەۆيزيا سالاسىن زامان تالابىنا ساي دامىتۋعا ۇلەس قوسا بەرەسىزدەر دەپ سەنەمىن. ۇجىمعا تولاعاي تابىس جانە شىعارماشىلىق شابىت تىلەيمىن»، - دەدى قاسىم-جومارت توقاەۆ.
سونداي-اق تەلەارنا ۇجىمىن سەنات توراعاسى ماۋلەن اشىمباەۆ، ءماجىلىس توراعاسى ەرلان قوشانوۆ، پرەمەر-مينيستر ولجاس بەكتەنوۆ، الماتى قالاسىنىڭ اكىمى ەربولات دوساەۆ، مادەنيەت جانە اقپارات ءمينيسترى ايدا بالاەۆا، تاعى باسقالار قۇتتىقتادى.
– قاتەلەسپەسەم، Almaty TV باق قىزمەتكەرلەرى مەرەكەسىندە «تۇمار» ۇلتتىق تەلەۆيزيالىق بايقاۋىنىڭ «ارنايى جۇلدەسىن» الدى عوي؟
- ءيا، وتكەن اپتادا Almaty TV «تۇمار» ۇلتتىق تەلەۆيزيالىق بايقاۋىنىڭ «ارنايى جۇلدەسىن» الدى. تەلەارنانىڭ باس ديرەكتورى تيمۋر بازارباەۆ مىرزا ايتقانداي - وتاندىق تەلەجۋرناليستيكانىڭ دامۋىنا قوسقان ۇلەس ءۇشىن بەرىلەتىن بۇل سىيلىق - ارنامىزدا 25 جىل ىشىندە قىزمەت ەتكەن بارشا ارىپتەسىمىزدىڭ ماڭداي تەرى، ادال ەڭبەگىنىڭ جەمىسى دەپ بىلەمىز.
ايتىپ وتسەك، ءار باسشىنىڭ ارنا ءۇشىن بەرگەنى، سىڭىرگەن ەڭبەگى كوپ. ەسكە سالا كەتەيىن، تەلەارنانىڭ العاشقى ديرەكتورى يسااك ياكوۆلەۆيچ دۆوركين 2005 جىلعا دەيىن قىزمەت ەتتى. 2005 جىلى تەلەارنا باسشىلىعىنا مۋستافين سانجار اناتولەۆيچ تاعايىندالىپ، 3 جىل ارنانىڭ دامۋىنا ۇلەس قوستى. جاناحمەت جانىبەكۇلى اعىباەۆ، گريۋنبەرگ ەۆگەني ۆالەرەۆيچ، كۋيانوۆ سەرگەي لەونيدوۆيچ باسشىلىق ەتتى. 2015 جىلدىڭ قاراشا ايىندا تەلەارنا ديرەكتورى بولىپ الدەنەي الىبەك ۇسەنۇلى تاعايىندالدى. 2019 جىلى ارنانى قاليانبەكوۆ بولات سەرىكۇلى باسقاردى. ودان كەيىن تەلەارنا ديرەكتورلىعىندا مۋحامەدجانوۆا نۇرجان جالاۋقىزى بولدى. ال 2022 جىلدىڭ 28 ناۋرىزىندا «Almaty» تەلەارناسىنىڭ باسشىلىعىنا بازارباەۆ تيمۋر تالعاتۇلى تاعايىندالدى.
ايتپاقشى، كۇزگە قاراي ءبىز تاعى بىرنەشە عاجايىپ شوۋ جانە ءوزىمىز وندىرگەن 7 تەلەحيكايانى ۇسىنباقپىز. مەرەيلى جىلى ءبىزدىڭ ۇجىم الەۋمەتتىك جانە قايىرىمدىلىق باعىتتاعى 40-قا جۋىق ءىس-شارا وتكىزبەك. مىسالى، جاڭالىقتار ەفيرىندە «25 يگى ءىس» ايدارى، ال digital-پلاتفورمامىزدا بالالارعا ارنالعان «ارمانىڭا جەت» جوباسى جارىققا شىعادى. بۇدان بولەك مامىر ايىندا «Almaty» تەلەارناسى جانە بوستاندىق اۋدانى ارداگەرلەر كەڭەسى بىرىگىپ، «اگروكراۋدسورسينگ» جوباسىنىڭ 3 جىلدىعىن اتاپ ءوتتى. مەرەكەلىك ءىس-شارا اياسىندا زەينەتكەرلەر سونداي-اق بەلگىلەنگەن ۋچاسكەلەرگە جەمىس-جيدەك پەن كوكونىس داقىلدارىن تەگىن ەگىپ، سول ءونىمدى تۇتىنۋعا مۇمكىندىك الدى. ال ارنايى شاقىرتىلعان بوستاندىق اۋدانىنىڭ ارداگەرلەرىنە تەلەارنانىڭ اتىنان سىي-سياپاتتار تابىستالدى. ءبىزدىڭ ماقسات - كوممەككە مۇقتاج جاندارعا قولداۋ كورسەتۋ.
– تۇسىنىكتى. ال قازىر اتالعان تەلەارنا ءوز كورەرمەنىن قانداي باعدارلامالارمەن قۋانتىپ ءجۇر؟
- ءبىزدىڭ ارنادا كورەرمەننىڭ كوزايىمىنا اينالعان باعدارلامالار جەتەرلىك. «وبو ۆسەم بەز كۋپيۋر»، «الماتينسكيە يستوري»، «تاڭعى studio» باعدارلامالارى بىرنەشە ماۋسىم بويى جالعاسىپ كەلەدى. ءبىرىنشى ماۋسىمدا «كەشكى الماتى»، «ءبىرجان-سارا ىزىمەن»، «الماتى ءان قاناتىندا» باعدارلامالارى، «جۇلدىزدى كاراوكە» سىندى جوبالاردىڭ ەكىنشى ماۋسىمى كوپشىلىكتىڭ سۇرانىسىمەن ەفيرگە جول تارتتى. سونداي-اق، ءتۇرلى جانرداعى تەلەحيكايالاردى دا ۇسىنىپ جاتىرمىز. ايتپاقشى، ەندى بيىل ءبىز ءۇشىن مەرەيلى جىل دەپ جاتىرمىز عوي. سوندىقتان تەلەارنا كوپشىلىك ءۇشىن ەكى ماۋسىم ۇسىنادى. ءبىرىن كوكتەمدە باستادىق، ەكىنشىسىن كۇزدە دەپ جوسپارلاپ وتىرمىز. اتاپ ايتساق، كۇزگى ماۋسىمدا «شىرقا، قازاقستان!» تالانت-شوۋى كوپشىلىككە جول تارتادى. كورەرمەندى بۇدان دا باسقا تىڭ جوبالارمەن قۋانتامىز. ايتا كەتۋ كەرەك، «شىرقا، قازاقستان!» ارنامىزدا بۇرىن-سوڭدى بولماعان اۋقىمدى مۋزىكالىق باعدارلاما. جوبا ارقىلى 18 بەن 45 جاس ارالىعىنداعى انشىلىك دارىنى بار ونەرپازداردى ءدۇيىم قازاقستانعا تانىتپاقپىز. سونىمەن قوسا، ءارتۇرلى جانرداعى سەريالدار جانە ءتۇرلى تاقىرىپتاعى دەرەكتى فيلمدەر دايىندايمىز. وسى تۇستا قوسا كەتكىم كەلەدى، بيىل ءبىز كورەرمەن نازارىنا 7 وتاندىق تەلەسەريالدى ۇسىندىق.
ءوندىرىس بارىسىندا اقپاراتتىق-ساراپتامالىق، مادەني، تانىمدىق جوبالارعا باسىمدىق بەرىلگەن. بىلتىردىڭ وزىندە 10 000-نان استام جاڭالىقتار سيۋجەتى، ارنايى رەپورتاج بەن دەرەكتى فيلم، سونداي-اق 30-دان استام باعدارلاما مەن تەلەحيكايا جارىققا شىقتى.
— وسى تۇستا مەنى ءبىر سۇراق قىزىقتىرادى. «Almaty» تەلەارناسى ءوز كورەرمەنىنە قاي تىلدە اقپاراتتى كوپ تاراتادى؟
- ەفيرلىك ساياساتتى جەتىلدىرۋ شارالارىنىڭ ناتيجەسىندە Almaty TV ارناسىنىڭ تەلەقارالىم كورسەتكىشتەرى تۇراقتى تۇردە جاقسارىپ كەلەدى. «K Research Central Asia» مالىمەتتەرى بويىنشا، بىلتىر كورەرمەن سانى 4,2 ملن بولدى. جالپى كورسەتكىش بويىنشا، ورتا ەسەپپەن كورەرمەننىڭ 75 پايىزى – قازاقتىلدى اۋديتوريا. ال مەملەكەتتىك تىلدەگى وزىندىك ءوندىرىس ۇلەسى 83 پايىزعا جەتتى. ودان بولەك، جاڭا اقپاراتتىق ستراتەگيانى جۇزەگە اسىرۋ ناتيجەسىندە تەلەارنانىڭ ينتەرنەتتەگى ورنى دا ايتارلىقتاي نىعايدى. ماسەلەن، سايت كورسەتكىشتەرى 5 ەسەگە ارتتى. بۇل دەگەنىمىز، 9 ملن-نان 45 ملن قارالىمعا كوبەيدى دەگەن ءسوز. ال، YouTube جازىلۋشىلارىنىڭ سانى 1,2 ملن-نان استى. جاقىندا ءبىز جاڭارتىلعان ۆەب-سايت پەن ونىڭ موبيلدىك نۇسقاسىن ۇسىنامىز.
ءسوز سوڭىندا دوستارعا، ارىپتەستەرگە، اسىرەسە كورەرمەنىمىزگە تاعى دا ريزاشىلىق بىلدىرگىم كەلەدى. سىزدەردىڭ قولداۋلارىڭىزبەن تەلەارنامىز بيىكتەن بيىككە جەتە بەرەدى دەپ سەنەمىن.
– يلزات مىرزا، ۋاقىت ءبولىپ سۇحبات بەرگەنىڭىز ءۇشىن العىسىمدى بىلدىرەم.
- سىزگە دە راحمەت سىمبات!
