پرەزيدەنت قاسىم-جومارت توقاەۆتىڭ كامبودجا پرەمەر-ءمينيسترى حۋن مانەتپەن كەزدەسۋى ەلىمىزدىڭ وڭتۇستىك-شىعىس ازيا مەملەكەتتەرىمەن بايلانىسىن كەڭەيتۋگە جاڭا مۇمكىندىكتەر اشتى. كەلىسسوزدەر بارىسىندا ساياسي ديالوگتى نىعايتۋ، ەكونوميكالىق جانە تسيفرلىق ىنتىماقتاستىقتى دامىتۋ، مادەني-گۋمانيتارلىق بايلانىستاردى جانداندىرۋ ماسەلەلەرى تالقىلاندى. بۇل كەزدەسۋ قازاقستاننىڭ كوپۆەكتورلى سىرتقى ساياساتى اياسىندا جاڭا سەرىكتەستەرمەن بايلانىس ورناتۋعا دەگەن ۇمتىلىسىن كورسەتەدى.
ساياساتتانۋشى جانسايا نۇراليەۆانىڭ پىكىرىنشە، كامبودجامەن قارىم-قاتىناستى دامىتۋ قازاقستاننىڭ ازياداعى ديپلوماتيالىق مۇمكىندىكتەرىن كەڭەيتىپ، وتاندىق كومپانيالاردىڭ جاڭا نارىقتارعا شىعۋىنا جول اشۋى مۇمكىن. ساراپشى ەكى ەل اراسىنداعى كەلىسىمدەردىڭ، اسىرەسە تسيفرلىق ۇكىمەت سالاسىنداعى ىنتىماقتاستىقتىڭ الەۋەتىنە نازار اۋدارىپ، ءبىلىم بەرۋ مەن مادەني بايلانىستاردىڭ ۇزاقمەرزىمدى سەرىكتەستىكتى نىعايتۋداعى ماڭىزىن اتاپ ءوتتى.
سونىمەن قاتار كامبودجانىڭ اسەان ۇيىمىنا مۇشەلىگى قازاقستاننىڭ وڭتۇستىك-شىعىس ازيا ەلدەرىمەن ىقپالداستىعىن تەرەڭدەتۋگە مۇمكىندىك بەرەدى. جانسايا نۇراليەۆا حالىقارالىق ۇيىمدار اياسىنداعى ساياسي قولداۋدىڭ، ستۋدەنتتەر الماسۋىنىڭ جانە حالىقتار اراسىنداعى سەنىمنىڭ ەكىجاقتى قاتىناستاردى دامىتۋداعى رولىنە توقتالدى. ونىڭ ايتۋىنشا، مۇنداي باستامالار قازاقستاننىڭ حالىقارالىق ارەناداعى ۇستانىمىن نىعايتىپ، ىنتىماقتاستىقتىڭ جاڭا باعىتتارىن قالىپتاستىرۋعا ىقپال ەتەدى.
— قازاقستان پرەزيدەنتى قاسىم-جومارت توقاەۆتىڭ كامبودجا پرەمەر-ءمينيسترى حۋن مانەتپەن كەزدەسۋى ەلىمىزدىڭ وڭتۇستىك-شىعىس ازياداعى مەملەكەتتەرمەن ساياسي ىنتىماقتاستىعىن تەرەڭدەتۋگە قالاي ىقپال ەتەدى؟ بۇل ساپار قازاقستاننىڭ كوپۆەكتورلى سىرتقى ساياساتتى جۇزەگە اسىرۋداعى الەۋەتىن قالاي ايقىندايدى؟
— مەنىڭ ويىمشا، بۇل كەزدەسۋدەن مەملەكەت باسشىسى قاسىم-جومارت توقاەۆتىڭ قازاقستاننىڭ سىرتقى ساياسي بايلانىستارىن كەڭەيتۋگە باعىتتالعان ۇستانىمىن كورۋگە بولادى. پرەزيدەنت ەلىمىزدىڭ كوپۆەكتورلى سىرتقى ساياساتىن ءداستۇرلى سەرىكتەستەرمەن قارىم-قاتىناستى ساقتاۋمەن عانا شەكتەمەي، جاڭا وڭىرلەرمەن بايلانىس ورناتۋعا دا باسىمدىق بەرىپ كەلەدى. بۇل قازاقستاننىڭ حالىقارالىق ارەناداعى مۇمكىندىكتەرىن كەڭەيتىپ، سىرتقى ساياساتتاعى دەربەس ۇستانىمىن نىعايتۋعا جول اشادى.
وسى تۇرعىدان العاندا، كامبودجا پرەمەر-ءمينيسترىنىڭ قازاقستانعا العاش رەت رەسمي ساپارمەن كەلۋى ايرىقشا ماڭىزعا يە. ەكى مەملەكەت اراسىندا ديپلوماتيالىق قاتىناستار بۇرىننان قالىپتاسقانىمەن، جوعارى دەڭگەيدەگى ساياسي بايلانىستاردى ودان ءارى جانداندىرۋعا مۇمكىندىك تۋىپ وتىر. مەملەكەت باسشىسىنىڭ وسى باعىتتاعى باستامالارى قازاقستاننىڭ وڭتۇستىك-شىعىس ازيا ەلدەرىمەن ىنتىماقتاستىعىن جاڭا دەڭگەيگە كوتەرۋگە ىقپال ەتەدى.
قازاقستاننىڭ بۇل وڭىرگە قىزىعۋشىلىق تانىتۋىنىڭ وزىندىك سەبەپتەرى بار. قازىرگى تاڭدا الەمدىك ەكونوميكالىق بەلسەندىلىكتىڭ ەداۋىر بولىگى ازياعا قاراي ويىسىپ كەلەدى. وڭىردە ءوندىرىس كولەمى ارتىپ، حالىق سانى ءوسىپ، تۇتىنۋ نارىعى كەڭەيىپ جاتىر. مۇنداي جاعدايدا قازاقستاننىڭ جاڭا ەكونوميكالىق جانە ساياسي مۇمكىندىكتەردى قاراستىرۋى ماڭىزدى. پرەزيدەنتتىڭ سىرتقى بايلانىستار گەوگرافياسىن كەڭەيتۋگە باعىتتالعان ساياساتى ەلىمىزدىڭ وسى وزگەرىستەرگە بەيىمدەلۋىنە جانە حالىقارالىق سەرىكتەستىك الەۋەتىن ارتتىرۋىنا جاعداي جاسايدى.
سونىمەن قاتار كامبودجانىڭ اسەان ۇيىمىنا مۇشە بولۋى ەكىجاقتى بايلانىستىڭ ستراتەگيالىق ماڭىزىن ارتتىرا تۇسەدى. اتالعان ۇيىم وڭتۇستىك-شىعىس ازيا مەملەكەتتەرىنىڭ ەكونوميكالىق جانە ساياسي ىقپالداستىعىندا ماڭىزدى ءرول اتقارادى. سوندىقتان كامبودجامەن قارىم-قاتىناستى نىعايتۋ قازاقستاننىڭ وسى وڭىردەگى ديپلوماتيالىق مۇمكىندىكتەرىن كەڭەيتۋگە جول اشادى. بۇل رەتتە ەلىمىزدىڭ ءىرى دەرجاۆالارمەن قالىپتاسقان بايلانىستارىن ساقتاي وتىرىپ، باسقا مەملەكەتتەرمەن دە دەربەس ءارى ءوزارا ءتيىمدى قارىم-قاتىناس ورناتۋعا ۇمتىلۋى كوپۆەكتورلى سىرتقى ساياساتتىڭ ءمانىن ايقىندايدى.
مەنىڭشە، مەملەكەت باسشىسىنىڭ ديپلوماتيالىق ءتاسىلىنىڭ باستى ەرەكشەلىكتەرىنىڭ ءبىرى دە وسىندا. قازاقستان سىرتقى ساياساتتاعى ءداستۇرلى باعىتتاردى ساقتاي وتىرىپ، بۇرىن جەتكىلىكتى دەڭگەيدە قامتىلماعان وڭىرلەرمەن ىنتىماقتاستىقتى دامىتۋعا نازار اۋدارىپ كەلەدى. مۇنداي ۇستانىم ەلىمىزدىڭ حالىقارالىق بايلانىستارىن ارتاراپتاندىرۋعا، جاڭا سەرىكتەستەرمەن قارىم-قاتىناس ورناتۋعا جانە جاھاندىق وزگەرىستەر جاعدايىندا قازاقستاننىڭ سىرتقى ساياسي الەۋەتىن نىعايتۋعا مۇمكىندىك بەرەدى.
— قازاقستان مەن كامبودجا اراسىنداعى ديپلوماتيالىق قاتىناستاردىڭ ورناعانىنا بيىل 32 جىل تولىپ وتىر. وسى ۋاقىت ىشىندە قالىپتاسقان بايلانىستاردى جاڭا بەلەسكە كوتەرۋدە مەملەكەت باسشىسىنىڭ باستامالارى قانداي ءرول اتقارادى؟ كامبودجانىڭ قازاقستاندى اسەان ەلدەرىمەن ىنتىماقتاستىقتى دامىتۋداعى سەرىكتەسى رەتىندە باعالاۋى ەلىمىزدىڭ حالىقارالىق ارەناداعى بەدەلىنە قالاي اسەر ەتەدى؟
— قازاقستان مەن كامبودجا اراسىنداعى ديپلوماتيالىق قاتىناستاردىڭ ورناعانىنا 32 جىل تولۋى ەكىجاقتى بايلانىستاردىڭ قالىپتاسۋ تاريحىن كورسەتەدى. دەگەنمەن ديپلوماتيالىق قاتىناستاردىڭ ۇزاقتىعى ءاردايىم ىنتىماقتاستىقتىڭ دامۋ دەڭگەيىمەن سايكەس كەلە بەرمەيدى. قازاقستان مەن كامبودجا اراسىنداعى بايلانىستاردى ودان ءارى تەرەڭدەتۋگە جانە ەكونوميكالىق ءارى ساياسي ىنتىماقتاستىقتىڭ الەۋەتىن كەڭىنەن پايدالانۋعا مۇمكىندىك مول. سوندىقتان قازىرگى كەزدەسۋدىڭ ماڭىزىن قالىپتاسقان قارىم-قاتىناستارعا جاڭا مازمۇن بەرىپ، ولاردى ناقتى باستامالارمەن تولىقتىرۋ مۇمكىندىگىمەن بايلانىستىرار ەدىم.
مىسالى، كەلىسسوزدەر بارىسىندا تىكەلەي اۋە قاتىناسىن اشۋ ماسەلەسىنىڭ كوتەرىلۋى ەكى ەل اراسىنداعى بايلانىستى دامىتۋعا ىقپال ەتەتىن ماڭىزدى قادام. ءبىر قاراعاندا، بۇل تۋريزم سالاسىنا قاتىستى ۇسىنىس بولىپ كورىنۋى مۇمكىن. الايدا مەملەكەتتەر اراسىنداعى ىنتىماقتاستىقتىڭ قارقىنى ولاردىڭ ءبىر-بىرىنە قولجەتىمدىلىگىمەن دە تىعىز بايلانىستى. تىكەلەي اۋە قاتىناسىنىڭ اشىلۋى كاسىپكەرلەردىڭ، تۋريستەردىڭ جانە ستۋدەنتتەردىڭ ساپارلارىن جەڭىلدەتىپ، ىسكەرلىك، مادەني جانە ءبىلىم بەرۋ بايلانىستارىن كەڭەيتۋگە مۇمكىندىك بەرەدى.
كامبودجانىڭ قازاقستانعا قىزىعۋشىلىعىن ورتالىق ازيانىڭ حالىقارالىق ارەناداعى ماڭىزىنىڭ ارتۋىمەن دە بايلانىستىرۋعا بولادى. سوڭعى جىلدارى ءوڭىر مەملەكەتتەرى سىرتقى سەرىكتەستەرمەن ديالوگتى جانداندىرىپ، حالىقارالىق ىنتىماقتاستىقتى نىعايتۋعا باسىمدىق بەرىپ كەلەدى. بۇگىندە ورتالىق ازياعا دەگەن قىزىعۋشىلىق تابيعي رەسۋرستارمەن عانا شەكتەلمەيدى. ءوڭىردىڭ كولىك-لوگيستيكالىق مۇمكىندىكتەرى، ەكونوميكالىق الەۋەتى جانە حالىقارالىق بايلانىستاردى دامىتۋداعى ءرولى دە ارتىپ وتىر.
قازاقستان وسى ۇدەرىستە ءوزىنىڭ گەوگرافيالىق ورنالاسۋىن، ترانزيتتىك مۇمكىندىكتەرى مەن ەكونوميكالىق الەۋەتىن ءتيىمدى پايدالانا الادى. بۇل ەلىمىزدىڭ ازيا مەملەكەتتەرىمەن بايلانىسىن كەڭەيتۋگە جانە جاڭا باعىتتار بويىنشا ءوزارا ءتيىمدى سەرىكتەستىك ورناتۋعا جول اشادى.
— كەلىسسوزدەر ناتيجەسىندە ەكى ەلدىڭ بىرلەسكەن مالىمدەمە قابىلداپ، ۇكىمەتارالىق جانە ۆەدومستۆوارالىق دەڭگەيدەگى بىرقاتار قۇجاتقا قول قويۋى ەكىجاقتى ساياسي ديالوگتىڭ ناقتى كەلىسىمدەرمەن بەكىتىلگەنىن اڭعارتادى. بۇل قۇجاتتاردىڭ قازاقستاننىڭ حالىقارالىق سەرىكتەستىك بايلانىستارىن كەڭەيتۋ مەن نىعايتۋداعى ماڭىزى قانداي؟ پرەزيدەنتتىڭ ديپلوماتيالىق كەلىسسوزدەردى ناقتى ناتيجەلەرگە باعىتتاۋ ۇستانىمىن قالاي باعالايسىز؟
— حالىقارالىق كەزدەسۋلەردىڭ ناتيجەسىن باعالاعاندا، قول جەتكىزىلگەن ۋاعدالاستىقتاردىڭ كەيىنگى ىسكە اسىرىلۋىنا جانە ولاردىڭ قانداي ناقتى وزگەرىستەرگە جول اشاتىنىنا نازار اۋدارۋ قاجەت. مەملەكەت باسشىلارىنىڭ كەزدەسۋى ەكىجاقتى قارىم-قاتىناستى دامىتۋدا ماڭىزدى ءرول اتقارادى. ال ونىڭ ناتيجەلەرى قابىلدانعان قۇجاتتاردىڭ ورىندالۋىنان، بىرلەسكەن جوبالاردىڭ ىسكە قوسىلۋىنان جانە ەلدەر اراسىنداعى بايلانىستىڭ جاڭا باعىتتار بويىنشا كەڭەيۋىنەن كورىنەدى.
بۇل جولعى كەلىسسوزدەردىڭ ماڭىزدى ناتيجەلەرىنىڭ ءبىرى – تاراپتاردىڭ بىرلەسكەن مالىمدەمەمەن قاتار التى مەموراندۋمعا قول قويۋى. ولاردىڭ قاتارىندا تسيفرلىق ۇكىمەت سالاسىنداعى ىنتىماقتاستىققا قاتىستى ەكى قۇجات بار. سونىمەن بىرگە استانا مەن پنومپەن قالالارى اراسىندا باۋىرلاستىق بايلانىس ورناتۋ جونىندە ۋاعدالاستىققا قول جەتكىزىلدى. بۇل كەلىسىمدەر ەكى ەل اراسىنداعى ىنتىماقتاستىقتىڭ اياسىن كەڭەيتىپ، جاڭا باستامالاردى جۇزەگە اسىرۋعا نەگىز قالايدى.
مەن اسىرەسە تسيفرلىق ۇكىمەت سالاسىنداعى كەلىسىمدەرگە نازار اۋدارار ەدىم. قازاقستان ەلەكتروندىق مەملەكەتتىك قىزمەتتەردى دامىتۋ باعىتىندا بەلگىلى ءبىر تاجىريبە جيناقتاپ، وسى سالادا ءوز الەۋەتىن قالىپتاستىردى. ەندى قازاقستاندىق تاجىريبەگە باسقا مەملەكەتتەردىڭ قىزىعۋشىلىق تانىتۋى ەلىمىز ءۇشىن جاڭا مۇمكىندىكتەرگە جول اشادى. بۇل رەتتە ەكونوميكالىق ىنتىماقتاستىقتى دامىتۋعا دا الەۋەت بار. ەگەر كەلىسىمدەر ناقتى جوبالارمەن جالعاسسا، قازاقستاندىق IT-كومپانيالار ءۇشىن جاڭا نارىقتارعا شىعۋعا مۇمكىندىك تۋىپ، وتاندىق تسيفرلىق شەشىمدەردىڭ حالىقارالىق دەڭگەيدە قولدانىلۋ اياسى كەڭەيۋى مۇمكىن.
ارينە، مۇنداي مۇمكىندىكتەردى جۇزەگە اسىرۋ الداعى جۇمىستىڭ ناتيجەسىنە بايلانىستى. قازاقستاننىڭ سىرتقى ساياساتى حالىقارالىق سەرىكتەستىكتى نىعايتۋمەن قاتار، وتاندىق كومپانيالاردىڭ شەتەلدىك نارىقتارعا شىعۋىنا دا قولايلى جاعداي قالىپتاستىرا الادى. بۇل ءوز كەزەگىندە ۇلتتىق ەكونوميكانىڭ دامۋىنا، تەحنولوگيالىق تاجىريبە الماسۋعا جانە ەلىمىزدىڭ حالىقارالىق ەكونوميكالىق بايلانىستارىنىڭ كەڭەيۋىنە وڭ ىقپال ەتەدى.
— كەزدەسۋ بارىسىندا قازاقستان مەن كامبودجانىڭ بۇۇ شەڭبەرىندەگى ىنتىماقتاستىعى جانە حالىقارالىق باستامالارعا قاتىستى ءبىر-ءبىرىن قولداۋى ءسوز بولدى. بۇل باعىتتاعى بايلانىستار ەكى مەملەكەتتىڭ كوپجاقتى ديپلوماتيا سالاسىنداعى ىقپالداستىعىن تەرەڭدەتۋگە قانداي مۇمكىندىكتەر اشادى؟ مەملەكەت باسشىسىنىڭ حالىقارالىق ۇيىمدار اياسىندا كوتەرىپ جۇرگەن باستامالارى قازاقستاننىڭ جاھاندىق ماسەلەلەردى شەشۋ ۇدەرىسىنە قوساتىن ۇلەسىن قالاي ارتتىرادى؟
— قازاقستان مەن كامبودجانىڭ بىرىككەن ۇلتتار ۇيىمى (بۇۇ) اياسىنداعى ىنتىماقتاستىعىن حالىقارالىق ديپلوماتياداعى ءوزارا قولداۋدىڭ ماڭىزىمەن بايلانىستىرار ەدىم.
كەيدە حالىقارالىق ساياساتتا تەك ءىرى دەرجاۆالاردىڭ ۇستانىمى شەشۋشى ءرول اتقارادى دەگەن پىكىر قالىپتاسادى. الايدا بۇۇ سياقتى حالىقارالىق ۇيىمداردا شاعىن جانە ورتا مەملەكەتتەردىڭ دە ءوز داۋىسى مەن مۇددەسى بار. اسىرەسە باس اسسامبلەيا اياسىندا ءار مەملەكەتتىڭ ۇستانىمى ماڭىزدى ءرول اتقارادى.
قازاقستان ءۇشىن كامبودجا سياقتى مەملەكەتتەرمەن ساياسي تۇسىنىستىكتى نىعايتۋ حالىقارالىق باستامالاردى ىلگەرىلەتۋگە قولداۋ تابۋعا مۇمكىندىك بەرەدى. ماسەلەن، ەلىمىز يادرولىق قارۋسىزدانۋ، حالىقارالىق قاۋىپسىزدىك جانە مەملەكەتتەر اراسىنداعى ديالوگتى دامىتۋ ماسەلەلەرىن تۇراقتى تۇردە كوتەرىپ كەلەدى. مۇنداي باستامالاردى حالىقارالىق دەڭگەيدە ىلگەرىلەتۋ ءۇشىن باسقا مەملەكەتتەردىڭ قولداۋى مەن ورتاق ۇستانىم قالىپتاستىرۋدىڭ ماڭىزى زور.
كامبودجانىڭ بۇل باعىتتا وزىندىك تاريحي تاجىريبەسى بار. ەل ۇزاق جىلدارعا سوزىلعان قاقتىعىستاردىڭ زارداپتارىن باستان وتكەردى. اسىرەسە مينا مەن سوعىس ۋاقىتىنان قالعان جارىلعىش زاتتار ماسەلەسى كامبودجا ءۇشىن ءالى دە وزەكتى. وسى تۇرعىدان العاندا، بەيبىتشىلىكتى نىعايتۋ مەن قارۋسىزدانۋعا قاتىستى حالىقارالىق باستامالار ەكى مەملەكەت اراسىندا تاجىريبە الماسۋعا جانە ورتاق ماسەلەلەر بويىنشا پىكىر الماسۋعا نەگىز بولا الادى.
كەلىسسوزدەر بارىسىندا پرەزيدەنت قاسىم-جومارت توقاەۆ كامبودجا تاراپىنىڭ بۇۇ باس اسسامبلەياسىنىڭ كۇن تارتىبىندەگى بىرقاتار ماسەلە بويىنشا قازاقستاننىڭ باستامالارىن قولداعانىن جوعارى باعالادى. بۇل ەكى ەل اراسىنداعى ساياسي ىنتىماقتاستىقتىڭ حالىقارالىق الاڭدا دا ناقتى كورىنىس تاۋىپ وتىرعانىن اڭعارتادى.
— قازاقستان مەن كامبودجا مادەني-گۋمانيتارلىق بايلانىستاردى دامىتۋعا، ءبىلىم بەرۋ سالاسىنداعى ارىپتەستىكتى نىعايتۋعا جانە تسيفرلىق دامۋ باعىتىندا تاجىريبە الماسۋعا نيەتتى. وسىنداي اۋقىمدى سالالاردى قامتيتىن ىنتىماقتاستىق ەكى ەل اراسىنداعى ۇزاقمەرزىمدى ساياسي سەنىمنىڭ قالىپتاسۋىنا قالاي ىقپال ەتەدى؟ جالپى، پرەزيدەنت قاسىم-جومارت توقاەۆتىڭ ديپلوماتيالىق باستامالارى قازاقستاننىڭ ازيا مەملەكەتتەرىمەن سەرىكتەستىك بايلانىستارىن كەڭەيتۋگە قانداي مۇمكىندىكتەر بەرەدى؟
— بۇل كەزدەسۋدە مەنىڭ نازارىمدى اۋدارعان قىزىقتى دەرەكتەردىڭ ءبىرى – كامبودجا پرەمەر-ءمينيسترى حۋن مانەتتىڭ قازاقستاندا ءبىلىم العان كامبودجيالىق ازاماتتار تۋرالى ايتقانى بولدى.
ونىڭ مالىمەتىنشە، قازاقستاندا 120-دان استام كامبودجيالىق ستۋدەنت ءبىلىم العان. ولاردىڭ اراسىندا كەيىن ءوز ەلىندە جوعارى مەملەكەتتىك قىزمەتتەرگە تاعايىندالعان ازاماتتار دا بار. اتاپ ايتقاندا، پروۆينتسيا گۋبەرناتورلارى، مەملەكەتتىك حاتشىلار مەن مينيسترلىك قىزمەتكەرلەرى كەزدەسەدى. بۇل ءبىز ءۇشىن ماڭىزدى دەرەك. ويتكەنى ءبىلىم بەرۋ سالاسىنداعى حالىقارالىق ىنتىماقتاستىقتىڭ ۇزاقمەرزىمدى ىقپالىن ءاردايىم جەتكىلىكتى باعالاي بەرمەيمىز.
قازاقستاندا بىرنەشە جىل ءبىلىم العان شەتەلدىك ستۋدەنت ەلىمىزدىڭ قوعامىمەن، مادەنيەتىمەن جانە حالقىمەن جاقىنىراق تانىسادى. كەيىن ءوز ەلىنە ورالعان سوڭ دا قازاقستان تۋرالى قالىپتاسقان تۇسىنىگى مەن العان اسەرىن ساقتايدى. ەگەر ول بولاشاقتا مەملەكەتتىك قىزمەتتە نەمەسە بيزنەس سالاسىندا جۇمىس ىستەسە، ەكى ەل اراسىنداعى بايلانىستاردى نىعايتۋعا ۇلەس قوسا الادى.
حالىقارالىق قاتىناستاردا مۇنداي ادامي بايلانىستاردىڭ ماڭىزى زور. ساياسي باسشىلار اۋىسىپ، ۇكىمەتتەردىڭ باسىمدىقتارى وزگەرۋى مۇمكىن. ال ادامدار اراسىندا قالىپتاسقان سەنىم مەن ءوزارا تۇسىنىستىك ۇزاق ۋاقىت ساقتالىپ، مەملەكەتتەر اراسىنداعى ىنتىماقتاستىقتىڭ بەرىك نەگىزىنە اينالادى.
مادەني بايلانىستارعا كەلسەك، قازاقستان مەن كامبودجا حالىقتارىنىڭ ءبىر-ءبىرى تۋرالى ءبىلىمى مەن تۇسىنىگىن ودان ءارى كەڭەيتۋگە مۇمكىندىك بار. قازاقستاندىقتاردىڭ باسىم بولىگى كامبودجانى ايگىلى انگكور-ۆات تاريحي كەشەنى ارقىلى تانۋى مۇمكىن. سول سياقتى كامبودجا ازاماتتارىنىڭ دا قازاقستان تۋرالى تۇسىنىگىن كەڭەيتۋ ماڭىزدى. سوندىقتان مادەني ىنتىماقتاستىق تۋرالى مەموراندۋمنىڭ قابىلدانۋى وسى باعىتتاعى بايلانىستى جانداندىرىپ، ەكى حالىقتىڭ مادەنيەتى مەن داستۇرلەرىن تەرەڭىرەك تانىستىرۋعا جول اشادى.
