ءال-فارابي اتىنداعى قازاق ۇلتتىق ۋنيۆەرسيتەتى دەنەسى سۋبۇرقاق جانىنان تابىلعان 17 جاستاعى بوزبالانىڭ ولىمىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى كتك-عا سىلتەمە جاساپ.
19 ماۋسىمدا مەكتەپ تۇلەگى ۋنيۆەرسيتەتكە ۇبت تاپسىرۋعا كەلگەن. الايدا تەحنيكالىق سەبەپتەرگە بايلانىستى ەمتيحان تاپسىرۋ مەرزىمى كەيىنگە شەگەرىلگەن. ال بوزبالا بىردەن ۇيىنە قايتپاي، جوو الدىنداعى سۋبۇرقاققا شومىلا كەتۋدى ءجون كورىپتى.
«سۋبۇراققا بىرنەشە بالا كەلگەن. بىراق اراسىندا سول بالا عانا سۋعا تۇسكەن. ونى سۋدان سول جانىنداعى بالالار الىپ شىققان. كىسى ءولىمى سەبەبىن مەديتسينالىق ساراپتاما انىقتايتىن بولادى. جالپى مىندا «سۋعا تۇسۋگە تىيىم سالىنادى» دەگەن جازۋ ءتورت جاعىندا جازىلعان. سەبەبى ۋنيۆەرستيتەت اۋماعى كوركەم ءارى جايلى بولعاندىقتان، تۇرعىندار مەن ستۋدەنتتەر مۇندا ەركىن جۇرەدى. ولاردىڭ قاۋىپسىزدىگى ءۇشىن مىندەتتى تۇردە سول بەلگىلەردى قويعانبىز. ۋنيۆەرسيتەتىمىزدىڭ اۋماعىندا بولعان وقيعاعا بايلانىستى مارقۇمنىڭ جاقىندارىنا قايعىرىپ كوڭىل ايتامىز»،— دەدى قازۇۋ پرورەكتورى ەركىن دۇيسەنوۆ.
ءبىلىم وشاعى قايعىلى وقيعادان كەيىن سۋبۇرقاقتى ءوشىرىپ تاستادى.
ەسكە سالايىق، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك تە قازۇۋ سۋبۇرقاعىندا بولعان قايعىلى وقيعاعا قاتىستى پىكىر بىلدىرگەن ەدى.
